બેઠક / રાહુલ ગાંધીની કોંગ્રેસ શાસિત રાજ્યોના CM સાથે મુલાકાત, અધ્યક્ષ અંગે થઇ શકે છે ચર્ચા

રાજસ્થાનના મુખ્યમંત્રી અશોક ગેહલોત, મધ્યપ્રદેશના મુખ્યમંત્રી કમલનાથ, પંજાબના મુખ્યમંત્રી અમરિન્દર સિંહ, છત્તીસગઢના મુખ્યમંત્રી ભૂપેશ બધેલ અને પોંડીચેરીના મુખ્યમંત્રી વી નારાયણ સ્વામી રાહુલ ગાંધીની આ બેઠકમાં ઉપસ્થિત રહેશે.

જો કે હજુ સુધી આ બેઠકને લઇને શું એજન્ડા છે તેના અંગે કોઇ જાણકારી પ્રાપ્ત થઇ નથી. જો કે લોકસભામાં કોંગ્રેસ પાર્ટીને મળેલા કારમા પરાજય અંગે બેઠકમાં ચર્ચા કરવામાં આવે તેવી શક્યતા છે. 

કોંગ્રેસ અધ્યક્ષ રાહુલ ગાંધી આજે કોંગ્રેસ હેડક્વાર્ટરમાં કોંગ્રેસના વરિષ્ઠ નેતાઓ અને કોંગ્રેસના મુખ્યમંત્રીઓ સાથે બેઠક કરશે. આ બેઠકમાં કોંગ્રેસ શાસિત રાજ્યોના તમામ મુખ્યમંત્રીઓ હાજર રહેશે. બેઠકમાં રાજસ્થાનના મુખ્યમંત્રી અશોક ગહેલોત પણ હાજર રહેશે. આ સાથે જ કોંગ્રેસના વરિષ્ઠ અને મોટા નેતાઓ પણ આ બેઠકમાં હાજર રહેશે.

સૂત્રોનું માનીએ તો આ બેઠકમાં કોંગ્રેસના નવા અધ્યક્ષ અંગે ચર્ચા વિચારણા થઈ શકે છે. કોંગ્રેસના આગામી અધ્યક્ષ અંગે પાર્ટીમાં ચર્ચાઓ ચાલી રહી છે. જે નિર્ણાયક ચરણમાં પહોંચી ગઈ હોવાની શક્યતા છે. આ સાથે સૌથી જૂની પાર્ટીના અધ્યક્ષનું નામ લગભગ નક્કી થઈ ગયું છે.
 

જોકે પાર્ટીના વરિષ્ઠ નેતાઓ અને મુખ્યમંત્રીઓ હજુ પણ ઈચ્છે છે કે પાર્ટીના અધ્યક્ષ પદે રાહુલ ગાંધી યથાવત્ રહે અને તે પોતાનું રાજીનામું પરત ખેંચી લે. કોંગ્રેસ પાર્ટીને આગામી દિવસોમાં નવા અધ્યક્ષ મળી શકે છે. રાહુલ ગાંધી કોંગ્રેસ અધ્યક્ષ પદ પરથી રાજીનામું આપવા અડગ છે.

ત્યારે હવે કોંગ્રેસ નેતા સુશીલ કુમાર શિંદે નવા અધ્યક્ષ બને તેવી સૂત્રોના અહેવાલથી જાણકારી મળી છે. કોંગ્રેસ હાઇકમાન્ડે પણ સુશીલ શિંદેના નામ પર સહમત છે અને રાહુલ ગાંધીએ પણ સુશીલ શિંદેના નામ પર સહમતી દર્શાવી હોવાના અહેવાલ પ્રાપ્ત થયા છે. સુશીલ શિંદે પૂર્વ ગૃહમંત્રી રહી ચૂક્યા છે અને મહારાષ્ટ્રના જાણિતા દલિત નેતા પણ છે.