અરેરાટી / અન્ય ધર્મની છોકરી સાથે વાતો કરવી યુવકને મોંઘી પડી, બન્યું એવું કે જાણીને કંપારી છૂટી જશે

• દિલ્હીના આદર્શન નગરમાં બની અરેરાટી ફેલાવતી ઘટના
• યુવકને ટ્યૂશનની વાતચીત કરવાના બહાને બોલાવી યુવતીના પરિવારે માર્યો માર
• યુવકનું કમકમાટીભર્યું મોત

ઉલ્લેખનીય છે કે,  આ કેસ પણ અંકિત સક્સેના હત્યા કેસની જેમ જ બહાર આવ્યો છે. મૃતક રાહુલ બીએ બીજા વર્ષનો વિદ્યાર્થી હોવાનું જણાવાયું છે. દિલ્હી પોલીસે 5 લોકોની ધરપકડ કરી છે. આ ઘટનાના સીસીટીવી ફૂટેજ પણ બહાર આવ્યા છે.

ટ્યૂશનની વાત કરવાના બહાને ઘરે બોલાવીને માર્યો માર

પ્રાપ્ત થતી જાણકારી પ્રમાણે, 18 વર્ષનો રાહુલ આદર્શ નગર વિસ્તારમાં રહે છે.  તે ડીયૂના એસઓએલના સેકન્ડ યરના અભ્યાસની સાથે ટ્યૂશન કરાવતો હતો. જ્યારે તેના પિતા ડ્રાઇવર છે. રાહુલની માતા રેણુએ જણાવ્યું કે, ઘટનાના દિવસે રાહુલને ફોન કરીને ટ્યૂશનની વાત કરવાનું કહી ઘરે બોલાવ્યો હતો. ત્યારબાદ તેને ઘરથી થોડા અંતરે લઇ જઇને માર મારવામાં આવ્યો હતો અને તેનું અંતે મોત થયું હતું. 

રાહુલની માતાએ કહ્યું- કોઇ વ્યક્તિને આવી રીતે માર કોઇ કેવી રીતે મારી શકે 

રાહુલની માતા રેનુએ કહ્યું હતું કે રાહુલ ઘણા લોકો સાથે વાતો કરતો હતો, પરંતુ જો કોઈની સાથે વાત કરવામાં આવે તો કોઈ આવી રીતે કોઈની હત્યા કેવી રીતે કરી શકે. રાહુલની દાદીની હાલત ખરાબ છે. રાહુલના પિતા સંજયે કહ્યું કે પોલીસે 5 લોકોને પકડ્યા છે, જ્યારે માર મારનારા 15 જેટલા લોકો હતા. આ બધાની ધરપકડ થવી જોઈએ. રાહુલના પિતાએ જણાવ્યું હતું કે કેટલાક લોકોએ કહ્યું હતું કે યુવતી પણ આવી ગઈ છે અને રાહુલને તેના ફોન પરથી ફોન કરીને બોલાવવામાં આવ્યો હતો. આ મામલે યુવતીની પણ પૂછપરછ થવી જોઈએ.

કાકાએ કહ્યું - સાંજ સુધી તેની સારવાર કરવામાં આવી હતી અને રાતે તેનું મોત થયું 

રાહુલના કાકા ધરમપાલે જણાવ્યું હતું કે બુધવારે એક વ્યક્તિ આવ્યો અને તેણે તેના ભત્રીજાને માર માર્યો હતો. ઘટના સ્થળે પહોંચતા ધર્મપાલે કોઈક રીતે રાહુલને હુમલો કરનારાઓની ચુંગાલથી બચાવ્યો હતો અને ત્યારબાદ સ્થાનિક ડોક્ટર પાસે સારવાર માટે ગયો હતો. એવું કહેવામાં આવે છે કે રાહુલની તબિયત મોડી રાત્રે બગડી હતી, અને તેમને બાબુ જગજીવન રામ હોસ્પિટલમાં દાખલ કરવામાં આવ્યા હતા જ્યાં તેમને મૃત જાહેર કરાયો હતો.

ઘરથી 500 મીટરના અંતરે બની ઘટના 

આપને જણાવી દઇએ કે, આ ઘટના કિશોરીના ઘરથી 500 મીટરના અંતરે બની હતી. આદર્શનગરથી કેટલાક અંતરે રાહુલને માર મારવામાં આવ્યો હતો. સમગ્ર બનાવના CCTV પણ મળી આવ્યા છે. હાલ આ મામલે પોલીસ વધુ તપાસ હાથ ધરી છે.