ડિજીટલના સમયમાં રાજકીય લડાઈઓ માત્ર ભાષણ અને રેલીથી જ નહીં પણ સોશ્યલ મીડિયા ઉપર પણ લડવામાં આવે છે. જો કે સોશ્યલ મીડિયાની લડાઈની હાર જીતનો નિર્ણય તેની લોકપ્રિયતા અને ફોલોઅર્સની સંખ્યા પરથી લગાવવામાં આવે છે. ત્યારે હાલ એક એવો આંક સામે આવ્યો છે જેમાં કોંગ્રેસ અધ્યક્ષ રાહુલ ગાંધીએ નરેન્દ્ર મોદીને પાછળ પાડી દીધા છે. માઈક્રો બ્લોગિંગ સાઈટ ટ્વિટર પર કરવામાં આવેલા ટ્વિટ્સની લોકપ્રિયતામાં રાહુલ ગાંધી પીએમ મોદી કરતાં અઢી ગણા આગળ છે.
લોકસભા ચૂંટણીના પ્રચાર દરમિયાન ઈન્ડિયા ટુડેની ડેટા ઈન્ટેલિજન્સ યૂનિટ (DIU)એ લોકસભા સાંસદ અને દેશના મંત્રીઓનો ટ્વિટર રેકોર્ડ તપાસ્યો હતો. 1 ઓક્ટોબર 2018થી લઈને 30 એપ્રિલ 2019 સુધી ટ્વિટ્સનો સર્વે કરવામાં આવ્યો છે.
ટ્વિટની લોકપ્રિયતામાં આગળ કોણ?
ટ્વિટર પર સૌથી લોકપ્રિય નેતામાં વડાપ્રધાન મોદી સૌથી આગળ છે. પરંતુ ટ્વિટના મામલે કોંગ્રેસ અધ્યક્ષ રાહુલ ગાંધી તેમના કરતાં ઘણાં આગળ છે. સર્વેમાં જોવા મળ્યું છે કે, રાહુલ ગાંધીની ટ્વિટ એવરેજ 7661 વખત રિટ્વિટ કરવામાં આવે છે. જ્યારે વડાપ્રધાન મોદીની ટ્વિટ એવરેજ 2984 વખત રિટ્વિટ કરવામાં આવે છે.
સૌથી વઘારે રિટ્વિટ કરવાના મામલે રાહુલ ગાંધી અને મોદી પછી સુષ્મા સ્વરાજ, નાણા પ્રધાન અરુણ જેટલીનો નંબર આવે છે. અને ત્યારપછી પીયુષ ગોયલ, રાજનાથ સિંહની ટ્વિટ સૌથી વધુ વખત રિટ્વિટ થાય છે.
ભારતમાં ટ્વિટર પર સૌથી ફોલોઅર્સ મામલે વડાપ્રધાન મોદી સૌથી આગળ છે. ટ્વિટર પર તેમના અંદાજે 4.7 કરોડ ફોલોઅર્સ છે. ત્યારપછી અરુણ જેટલી, રાજનાથ સિંહ અને સુષ્મા સ્વરાજનો નંબર છે. આ લિસ્ટમાં રાહુલ ગાંધી પાંચમા નંબરે છે. તેમને 9.3 મિલિયન ફોલોઅર્સ છે એટલે કે 93 લાખ.
નોંધનીય વાત એ છે કે, રાહુલ ગાંધીએ ખૂબ મોડા ટ્વિટરમાં એન્ટ્રી કરી હતી.
આ સર્વે દરમિયાન અંદાજે 2 લાખ 68 ટહાર ટ્વિટ્સનું અધ્યયન કરવામાં આવ્યું હતું. તેમાં દેશના કુલ 224 લોકસભા સાંસદના એકાઉન્ટનું અધ્યયન કરવામાં આવ્યું હતું. તેમાં 160 બીજેપીના સાંસદ છે.