નવી દિલ્હી / રાહુલ ગાંધીએ કોરોના વાયરસ અંગે એવું ટ્વિટ કર્યું કે જબરા ભરાયા, આખરે ડિલીટ કરવું પડ્યું

• રાહુલ ગાંધીએ ટ્વિટમાં ખોટો નકશો મૂકતાં ટ્રોલ થયા, આખરે ટ્વિટ ડિલિટ કર્યું
• સોશિયલ મીડિયા પર વાઇરલ થતાં જ યુઝર્સે રાહુલ ગાંધીને ટ્રોલ કરવાનું શરૂ કરી દીધું
• ચીનમાં ઘાતક કોરોના વાઇરસથી મૃતકોની સંખ્યા ગુરુવારે 1300ને વટાવી ગઇ છે

આ ટ્વિટ સોશિયલ મીડિયા પર વાઇરલ થતાં જ યુઝર્સે રાહુલ ગાંધીને ટ્રોલ કરવાનું શરૂ કરી દીધું હતું અને ત્યાર બાદ રાહુલ ગાંધીને આ ટ્વિટ ડિલિટ કરવાની ફરજ પડી હતી. કોંગ્રેસના નેતા રાહુલ ગાંધીએ કોરોના વાઇરસને લઇને ટ્વિટ કર્યું હતું જેમાં તેમણે જણાવ્યું હતું કે કોરોના વાઇરસ આપણા લોકો અને આપણા અર્થતંત્ર માટે ગંભીર ખતરો બનતો જાય છે. સરકાર આ ખતરાને ગંભીરતાથી લેતી નથી. આ માટે સમયસર પગલાં લેવાની જરૂર છે. 

રાહુલ ગાંધીની આ ટ્વિટ બાદ ભાજપના આઇટી સેલના વડા અમિત માલવીએ આ ટ્વિટને શેર કરતાં લખ્યું હતું કે આપ વારંવાર આ નકશાનો ઉપયોગ કેમ કરો છો કે જેમાં જમ્મુ-કાશ્મીરને ભારતથી અલગ દર્શાવવામાં આવેલ છે?

આ ટ્વિટ વાઇરલ થયા બાદ યુઝર્સે રાહુલ ગાંધીને ટ્રોલ કરવાનું શરૂ કરી દેતાં તેમણે આખરે આ ટ્વિટ ડિલિટ કરી નાખ્યું હતું અને ત્યાર બાદ બીજુ નવું ટ્વિટ કર્યું હતું. બીજું નવું ટ્વિટ એક ન્યૂ સ્ટોરી સાથે કરવામાં આવ્યું હતું.

અત્રે ઉલ્લેખનીય છે કે ચીનમાં ઘાતક કોરોના વાઇરસથી મૃતકોની સંખ્યા ગુરુવારે 1300ને વટાવી ગઇ છે અને અત્યાર સુધીમાં 44,200 કરતાં વધુ સંક્રમિત કેસ સામે આવ્યા છે. હુબેઇમાં ગઇ કાલે એક જ દિવસમાં 200થી વધુ લોકોનાં મોત કોરોના વાઇરસને કારણે થયાં હતાં.