ચૂંટણી / રાહુલ ગાંધી ભારતીય કે બ્રિટિશર? આજે થઇ શકે છે નિર્ણય

કોંગ્રેસ અધ્યક્ષ રાહુલ ગાંધી આ વખતે 2 સીટ પરથી લોકસભા ચૂંટણી લડી રહ્યા છે. આ બંને જગ્યાએ ઉમેદવારી પત્રક ભરવામાં વિવાદ થયો છે. ઉત્તરપ્રદેશની અમેઠી સીટ પર રાહુલ ગાંધીના ઉમેદવારી ફોર્મ ભરતી વખતે વિવાદ થતા સ્ક્રૂટથી પાછી ઠેલવામાં આવી હતી, જે આજે ફરી કરવામાં આવશે. જ્યારે કેરળથી વાયનાડ સીટ ઉપર પણ રાહુલ ગાંધી પાસે 2 પાસપોર્ટ હોવાથી ફરિયાદ ચૂંટણી પંચમાં કરવામાં આવી છે. આ બંને ઘટનાઓથી રાહુલની ઉમેદવારી પર વિવાદ ઉભો થયો છે. 
 

અમેઠી સીટ પર 20 એપ્રિલે રાહુલ ગાંધીની ઉમેદવારીની સ્ક્રૂટની થવાની હતી. આ દરમિયાન રિટર્નિંગ ઓફિસમાં સ્ક્રૂટનીની પ્રક્રિયા શરૂ થતાં જ રાહુલ ગાંધીનું નામ બોલવામાં આવ્યું હતું. ત્યારપછી ચાર લોકોએ તેમની ઉમેદવારી સામે વાંધો ઉઠાવ્યો હતો.

વિરોધ કરવામાં અપક્ષના ઉમેદવાર ધ્રુવ લાલે બ્રિટનમાં રજિસ્ટર્ડ કંપનીના દસ્તાવેજો દર્શાવતા દાવો કર્યો હતો કે તેમાં રાહુલ ગાંધીને બ્રિટિશ નાગરિક દર્શાવવામાં આવ્યા છે. ધ્રુવ લાલના વકીલ રવિ પ્રકાશે દાવો કર્યો છે કે,આ બ્રિટિશ કંપની પાંચ વર્ષથી ચાલી રહી છે અને તેમાં તેમણે નફો પણ કર્યો છે. પરંતુ એફિડેવિટમાં આ વિશે કોઈ ખુલાસો કરવામાં આવ્યો નથી. આ આરોપમાં બીજેપીએ પણ રાહુલ ગાંધી સામે સવાલ કર્યા છે અને નાગરિકતાની સ્થિતિ સ્પષ્ટ કરવા કહ્યું છે.
 

બીજી બાજુ ઉત્તરપ્રદેશના મુખ્યમંત્રી યોગી આદિત્યનાથે એક ડગલુ વધીને રાહુલ ગાંધીના નામ ઉપર પણ સવાલ ઉભા કર્યા છે. યોગીએ રવિવારે એક જનસભામાં દાવો કર્યો હતો કે રાહુલ ગાંધી તેમના નામથી પણ દેશને મુરખ બનાવી રહ્યા છે. તેમનું અસલી નામ તો રાઉલ વિંસી છે.

વાયનાડમાં પણ કરવામાં આવી છે ફરિયાદ 

અમેઠી પછી વાયનાડમાં પણ રાહુલ ગાંધી સામે ફરિયાદ કરવામાં આવી છે. વાયનાડ લોકસભા સીટથી એનડીએ ઉમેદાવર ટી. વેલ્લાપ્પલ્લીએ આરોપ લગાવ્યો છે કે, ''રાહુલ ગાંધી પાસે અન્ય દેશનો પણ પાસપોર્ટ છે. પરંતુ તેમણે આ વિશે તેમણે એફિડેવિટમાં કોઈ ઉલ્લેખ કર્યો નથી. તેથી રાહુલ ગાંધીની ઉમેદવારી સ્વીકારવી જોઈએ નહીં.''