કલંક / 60 વિદ્યાર્થીઓને સવારમાં 100 ઉઠકબેઠક કરાવી, ગુજરાતમાં વિદ્યાર્થીઓ સાથે રેગિંગની સૌથી મોટી ઘટના

• ગોત્રી મેડિકલ કોલેજની રેગિંગનો મામલો
• વિદ્યાર્થી પાસે ઉઠક બેઠક કરાવાઇ હતી
• 3 વિદ્યાર્થીની હોસ્પિટલમાં છે દાખલ

ગુજરાતની કોલેજોમાં હજુ પણ રેગિંગ જેવી ઘટનાઓ સામે આવે તે શિક્ષણ જગત માટે કલંક છે. વડોદરાની ગોત્રી GMERS હોસ્પિટલમાંથી એક ભયંકર રેગિંગની ઘટના સામે આવી છે. જેમાં મેડિકલમાં અભ્યાસ કરતા 60 જેટલા વિદ્યાર્થીઓને 100 જેટલી ઉઠબેસ કરવાવાની ઘટનાથી તંત્ર માટે ખળભળાટ મચ્યો છે. સમગ્ર મામલો સામે આવતા ગોત્રી મેડિકલ કોલેજમાં બેઠક મળી હતી. અને જેમાં વિદ્યાર્થીઓના વાલીઓ પણ હાજર રહ્યા હતા. 

કેવી રીતે મેડિકલના જૂનિયર વિદ્યાર્થીઓનું થઈ રહ્યું છે રેગિંગ

વડોદરાની ગોત્રી હોસ્પિટલમાં અભ્યાસ કરીને મેડિકલ ક્ષેત્રે સેવા આપવા માગતા વિદ્યાર્થીઓને અભ્યાસની સાથે સિનિયરોના રેગિંગનો પણ ભોગ બનવું પડી રહ્યું છે. અને કેન્દ્ર સરકાર સહિત સુપ્રીમ કોર્ટે પણ ભૂતકાળમાં રેગિંગની અનેક ઘટનાઓ અંગે કડક વલણ અપનાવવાનો નિર્દેશ આપ્યો છે. આમ છતાં સંસ્કાર નગરી કહેવાતા વડોદરામાં આ પ્રકારની ઘટના શરમજનક છે. ગત શનિવારે જ આ સમગ્ર કાંડ કરવામાં આવ્યો હતો.

જેમાં સવારના 4 વાગ્યે ગોત્રી હોસ્પિટલમાં નોકરી કરતા MO, જૂનિયર રેસિડન્ટ અને એક પૂર્વ વિદ્યાર્થીની મદદથી ત્રીજા વર્ષના મેડિકલ સ્ટુડન્ટને બોલાવવામાં આવ્યા હતા. જે પછી સમગ્ર રેગિંગનો કાંડ રચાયો હતો. જેમાં બીજા વર્ષમાં અભ્યાસ કરતા વિદ્યાર્થીને એકઠા કરવાનું કહ્યું હતું. અને 60 જેટલા બીજા વર્ષના વિદ્યાર્થીને એકઠા કર્યા હતા. આ બાદ તમામને વહેલી સવારે 100 ઉઠકબેઠક કરવાનું કહેતા વિદ્યાર્થીઓ ચોંકી ગયા હતા. અને પોતાની સાથે રેગિંગની ઘટના થઈ રહી છે. તે પણ સમજી ગયા હતા. તમામે ડરમાં ઉઠકબેઠક પણ શરૂ કરી હતી. તો 3 વિદ્યાર્થીઓની તબિયત પણ ખરાબ થઈ હતી. આ જ ત્રણ વિદ્યાર્થીઓની તબિયત ખરાબ થતા ડીનને જાણ કરાઈ હતી. અને સમગ્ર ઘટનાનો ભાંડો ફૂટ્યો હતો. એક વિદ્યાર્થીને ડિપ્રેશન પણ થયું હતું. 

સમગ્ર મામલે રેગિંગનો ભોગ બનનારા વિદ્યાર્થીઓના નિવેદન લેવાયા હતા. અને હોસ્પિટલમાં કાર્યરત રેગિંગ કરનારા ડૉક્ટરને તાત્કાલિક છૂટા કરાયા હતા. જેમાં નૈતિક પટેલ અને ભાર્ગવ બલદાણીયાને છૂટા કર્યા હતા.