જામનગરઃ MP શાહ મેડિકલ કોલેજમાં રેગિંગની ઘટના સિનીયર વિદ્યાર્થીઓ દ્વારા જુનીયર વિદ્યાર્થીઓને ત્રાસ...

જામનગરઃ એમ.પી. શાહ મેડીકલ કોલેજના રેડિયોલોજી વિભાગમાં રેગિંગની ઘટનાની ફરિયાદ સામે આવી છે. ઈ-મેઈલ દ્વારા કરવામાં આવેલ ફરિયાદ બાદ તાત્કાલિક એન્ટી રેગિંગ કમિટી એક્શનમાં આવી હતી. પરંતુ રેડિયોલોજી વિભાગમાં કરવામાં આવેલ તપાસ અને સીનીયર-જુનીયરના નિવેદન બાદ કોલેજ દ્વારા સબ સલામતના દાવા કરવામાં આવ્યા છે.

શું છે સમગ્ર મામલો ?
જામનગરની એમપી શાહ મેડીકલ કોલેજ રાજ્યમાં તબીબી અભ્યાસને લઈને અગ્ર સ્થાન ધરાવે છે. દર વર્ષે અહીંથી અનેક નામી તબીબો પોતાનો અભ્યાસક્રમ પૂર્ણ કરી કેરિયરની શરૂઆત કરે છે. અહીંની કોલેજમાં અભ્યાસ દરમિયાન સિનીયર વિદ્યાર્થીઓ તરફથી જુનીયર વિદ્યાર્થીઓની રેગીંગના નામે પજવણીના સમયાન્તરે બનાવો બનતા રહ્યા છે. કેટલાક સામે આવ્યા પણ છે. કોલેજના રેડિયોલોજી વિભાગમાં રેગિંગની ઘટનાની ફરિયાદ સામે આવતા વધુ એક વખત કોલેજ ચર્ચાના એરણે આવી છે.

જામનગરની મેડીકલ કોલેજમાં રેગિંગની ઘટનાને લઈને સ્થાનિક પ્રસાસન હરકતમાં આવ્યું હતું. એન્ટી રેગીંગ રેડ્યુસ હેલ્પ લાઈન પરથી મેડીકલ કોલેજના ચીફ વોર્ડનને એક મેઈલ આવ્યો. જેમાં રેડીઓલોજી વિભાગમાં સીનીયરો રેસીડેન્ટ તબીબો દ્વારા જુનીયર રેસીડેન્ટ તબીબો પર ત્રાસ ગુજારવામાં આવતો હોવાની ફરિયાદ કરવામાં આવી. વધારે પડતું કામ અને અપ-શબ્દોનો ઉપયોગ કરવામાં આવતો હોવાની રાવ મેઈલમાં કરવામાં આવી. જેને લઈને સ્થાનિક કોલેજની એન્ટી રેગિંગ કમિટી હરકતમાં આવી હતી. સવારે ઈ-મેઈલ મળ્યા બાદ બપોરે કમિટીની મીટીંગ મળી હતી. જેમાં રેડીયોલોજી વિભાગના સીનીયર-જુનિયરના તબીબી છાત્રોના નિવેદનો નોંધવામાં આવ્યા હતા. પરંતુ કોઈ વિદ્યાર્થી તરફથી ફરિયાદ કરવામાં આવી ન હતી. આ મીટીંગની મીનીટસ રેગીંગ સેલને મોકલી દેવામાં આવી છે.

રેગિંગના આરોપને લઈને તાત્કાલિક મીટીંગ મળી. જેમાં કોઈ તથ્યો સામે આવ્યા નથી એવો તાત્પર્ય સામે આવ્યો છે. એક મેડીકલ કોલેજ તરફથી સતાવાર જાહેર કરવામાં આવ્યુ છે. રેગીંગની ઘટનાને નકારતો રીપોર્ટ દિલ્હી રેગિંગ સેલને મોકલવામાં આવશે એમ સતાવાર જાહેર કરવામાં આવ્યું છે.