નિવેદન / જીતુ વાઘાણીએ 2023ના CMની કરી જાહેરાત, કોંગ્રેસ નેતા રઘુ શર્મા લાલચોળ, કહ્યું આ ઘમંડ લોકતંત્રનું અપમાન છે

• જીતુ વાઘાણીના નિવેદન મુદ્દે રઘુ શર્માની પ્રતિક્રિયા
• "જીતુ વાઘાણીએ જનતાનું અપમાન કર્યું"
• ભૂપેન્દ્રભાઈ 2023માં મુખ્યમંત્રી હશે: જીતુ વાઘાણી

રાજ્યના શિક્ષણમંત્રી જીતુ વાઘાણીએ વિધાનસભા ચૂંટણીને લઇ નિવેદન આપ્યું હતું. જેમાં તેમણે આગામી મુખ્યમંત્રી ભૂપેન્દ્ર પટેલ જ રહેવાનું જણાવ્યું હતું. આ મુદ્દે ગુજરાત કોંગ્રેસના પ્રભારી રઘુ શર્માએ પ્રતિક્રિયા આપી છે. રઘુ શર્માએ કહ્યું કે, મુખ્યમંત્રી પસંદ કરવાનો હક ભાજપ પાસે નથી. કોને મુખ્યમંત્રી બનાવવા, તે જનતા નક્કી કરશે. જીતુ વાઘાણીએ જનતા અને લોકતંત્રનું અપમાન કર્યું છે. આ પ્રકારનું નિવેદન ભાજપનો ઘમંડ દર્શાવે છે.

ભૂપેન્દ્રભાઈ 2023માં મુખ્યમંત્રી હશે: જીતુ વાઘાણી
આજ રોજ ગુજરાત યુનિવર્સિટીના કોન્વોકેશન હોલમાં LD કોલેજનો કાર્યક્રમ યોજાયો હતો. જીતુ વાઘાણીએ આ કાર્યક્રમમાં મહત્વનું નિવેદન આપતા જણાવ્યું કે, '2023માં ભૂપેન્દ્રભાઈ મુખ્યમંત્રી હશે. એટલે જાન્યુઆરીમાં LDના જલસાના કાર્યક્રમમાં પાછા આવીશું.આ વાત કહેતાની સાથે જ કાર્યક્રમમાં હાજર લોકોએ તાળીઓ અને ચીસો પાડી વધાવી લીધી હતી.

2022-23ના વર્ષથી કોલેજમાં બે નવી ફેકલ્ટી શરૂ કરાશે
LD ઇજનેરી કોલેજના 75 વર્ષ ઉજવણી અવસરે રાજ્ય સરકારે કોલેજને એક મહત્વપૂર્ણ ભેટ આપી છે. શિક્ષણ મંત્રી જીતુ વાઘાણીએ જણાવ્યું કે, '2022-23ના વર્ષથી કોલેજમાં બે નવી ફેકલ્ટી શરૂ કરાશે. રોબોટિક ઓટોમેશન અને આર્ટીફિશયલ ઈન્ટેલિજન્સ અને મશીન લર્નિંગ નવી ફેકલ્ટી કાર્યરત થશે.' મુખ્યમંત્રી ભૂપેન્દ્ર પટેલના નેતૃત્વમાં રાજ્ય સરકારે ઇજનેરી શાખામાં ઉચ્ચ શોધ સંશોધનને વેગ આપવા આ કૉલેજની અદ્યતન લેબ માટેની અગાઉની રૂપિયા 10 કરોડની ગ્રાન્ટ પણ પુનઃજીવિત કરી આપવાનો નિર્ણય કર્યો છે.'

કોંગ્રેસનું વિધાનસભા ચૂંટણીને લઈ મોટું આયોજન
રાજ્યમાં વિધાનસભાની ચૂંટણી ડિસેમ્બર મહિના સુધીમાં યોજાઈ શકે છે..જેને અનુલક્ષીને કોંગ્રેસે તૈયારીઓ શરૂ કરી દિધી છે..અમદાવાદમાં કોંગ્રેસના પ્રદેશ કાર્યલય પર ગુજરાત કોંગ્રેસ પ્રભારી રઘુ શર્મા અને પ્રદેશ પ્રમુખ જગદીશ ઠાકોરની આગેવાનીમાં બેઠક મળી. આ બેઠકમાં ઉત્તર ગુજરાતના ધારાસભ્યો, જિલ્લાના પ્રભારીઓ હાજર હતા. આ બેઠક અંગે રઘુ શર્માએ મીડિયા સાથે વાત કરતા જણાવ્યું કે, અલગ અલગ ઝોન મુજબ બેઠકો કરીને રણનીતિ ઘડવામાં આવી રહી છે..જે અનુસાર ગુજરાત તેમજ  અન્ય રાજ્યના કોંગ્રેસના નેતાઓને પ્રત્યેક બેઠકની જવાબદારી સોંપવામાં આવશે... પ્રત્યેક વિધાનસભા બેઠક પર એક સ્થાનિક, એક રાજ્યકક્ષાના નેતા અને એક ગુજરાત બહારની વ્યક્તિ નિરીક્ષક હશે... આમ કુલ ત્રણ લોકો એક વિધાનસભા બેઠકની જવાબદારી સંભાળશે... આવનારા બે મહિનામાં કોંગ્રેસ દ્વારા એક હજાર બેઠક કરવાનું આયોજન છે.