સરકારી શિક્ષકોનો પગાર ખિસ્સામાં પણ ન સમાઈ શકે એટલો તોતિંગ પગાર રાજ્ય સરકાર આપતી હોય છે પણ અમુક શિક્ષકોની પાડા જેવી આળસાઈ બહાર આવી રહી છે. નવસારી જિલ્લાના શિક્ષકે મહેસાણાના ખાનગી સાહિત્ય માંથી બેઠું પ્રશ્નપત્ર ઉઠાવીને ધોરણ 10ની પરીક્ષામાં મૂકી દીધું છે. જેના કારણે નવસારીના શિક્ષણ અધિકારીએ શાળાના તમામ આચાર્યને આડેહાથ લીધા છે જેની ઓડિયો ક્લિપ વાઇરલ થઈ છે જેને લઈને શિક્ષણ જગતમાં ખળભળાટ મચી ગયો છે.
નવસારીમાં ધો. 10 ની દ્ધિતીય પરીક્ષાના પેપરમા ભૂલ સામે આવી
દ્વિતીય સામાયિક પરીક્ષાના ગુજરાતીના પેપરમાં ક્ષતિ
ખાનગી પ્રકાશન માંથી ગુજરાતી વિષયના પેપરની ઉઠાંતરી કરી
શિક્ષણ જગતમાં એક પછી એક છાબરડાઓ બહાર પડતા આવ્યા છે. પેપર લીકથી માંડીને શિક્ષકો દ્વારા કરવામાં આવતી આળસાઈ વારંવાર ઉઘાડી પડતી આવી છે. ત્યારે નવસારીના એક શિક્ષકે પોતાની આળસાઈ પુરવાર કરીને તૈયારનું પ્રશ્નપત્ર ધોરણ 10ની પરીક્ષામાં કાઢતા જિલ્લા શિક્ષણ અધિકારીએ ઠપકો આપ્યો છે જે ઓડિયો કલીપ વાઇરલ થતા હડકંપ મચી જવા પામી છે. શિક્ષકો રાજ્ય સરકારને છેતરીને કામચોર બની ગયા હોય એવો કિસ્સો પ્રકાશમાં આવ્યો છે. સરકાર આટલી મોટી રકમનો પગાર આપવા છતાં હરામખોરી કરતા શિક્ષકોને જિલ્લા શિક્ષણ અધિકારીએ બરાબરના તતડાવ્યા છે.
હરામખોરી કરતા શિક્ષકને ખખડાવતા શિક્ષણ અધિકારીનો ઓડિયો વાઇરલ થયો છે જે ખૂબ નિંદનીય બન્યો છે. ત્યારે વિદ્યાર્થીઓના ભવિષ્ય સાથે ચેડા કરતા શિક્ષકો જ્યારે આવું કૃત્ય કરે ત્યારે વાલીઓનો વિશ્વાસ ક્યાંક ને ક્યાંક ઉઠી જતો હોય છે. ત્યારે શિક્ષકોને આદર્શ માનતો વર્ગ આજે માથે હાથ દઈને ઘટનાને વખોડી રહ્યો હશે.
શિક્ષક અધિકારીએ શું કહ્યું?
વાયરલ ઓડિયોમાં શિક્ષક અધિકારીએ કહી રહ્યા છે કે, 'આચાર્ય મિત્રો, ગુજરાતીના પેપરમાં શિક્ષક આળસું હોય છે તેવું સામે આવ્યું છે. જેમ જેમ શિક્ષકોને પગારનો ભાર વધતો જાય છે તેમ તેમ શિક્ષકો મોટા આળસુ બનતા જાય છે. આળસુ હોવાનું ઉત્તમ ઉદાહરણ પુરૂ પાડ્યું છે. શિક્ષકોએ સહેજ પણ તકલીફ લીધા વગર પ્રકાશનમાં આવેલું બેઠું પેપર છાપી નાખ્યું છે. તમને જે કામ મળ્યું છે તેને સારી રીતે નિભાવો. તમે કેટલી હદે આળસના શિકાર બની ગયા છો. એવું લાગે છે કે તમે ટેસ્ટ લેતા જ નહીં હો, કારણ કે તેના માટે પેપર કાઢવા પડે. ત્યારે તમે ટેસ્ટ પેપરની ચકાસણી કરતા હશો કે કેમ તેનો પણ સવાલ થાય છે. એટલા માટે આ સમાજ તમારા પર ધિક્કાર કરે છે.'
વધુમાં અધિકારી કહી રહ્યા છે કે, 'પ્રાઇવેટ શાળઓ સતત મહેનત કરી રહી છે. પ્રાઇવેટ શાળાની મુલાકાત લઇને ક્યારેક જાણી લેજો. પ્રાઇવેટ શાળા જેવી ટેસ્ટ તો ક્યારે લેશો. તો ના છુટકે તમારા પગાર કાપવા પડશે. આનું સમાજને સહન કરવું પડે છે. અત્યારે હાલ પરીક્ષા ચાલી રહી છે. તેમને વહેલા જવાના બદલે પેપર કઢાવો. આચાર્યએ કામ લેતા આવડવું જોઇએ. ઘણા બધા શિક્ષકો સારી રીતે કામ કરે છે. કેટલાક શિક્ષકોએ શરમ આવવી જોઇએ. દીલથી કામ કરો. મોડા સુધી રોકાઇને કામ કરોને. ઘર વાલુ છે તેમ શાળાને પણ વાલી કરો. આપણા બાળકો માટે મહેનત કરીએ છીએ ત્યારે શાળા માટે કેમ નહીં? આવું વારંવાર ન કહેવાનું હોય. તમને જવાબદારી આપીએ અને તમે બેઠું પેપર છાપી કાઢો છો. આવું તો અમે ગમે તેને આપી શકીએ છીએ. આવુ ચલાવી લેવામાં નહીં આવે, આવું ન થવું જોઇએ. અમે શાળાની મુલાકાત લઇએ છીએ ત્યારે એકત્રીકરણ કરેલું નથી હોતું.'