મહત્વના સમાચાર / આવતીકાલે અંબાજી મંદિરમાં પ્રક્ષાલન વિધિ: દર્શનાર્થે જનારા ભક્તો પહેલા આ વાંચી લેજો, નહીં તો થશે ધરમધક્કો

• આવતીકાલે નિજ મંદિરની પ્રક્ષાલન વિધિ
• બપોરે 1:30 સુધી થશે માં અંબાના દર્શન
• બપોરે 1:30 બાદ મંદિર રહેશે બંધ

Ambaji Temple: યાત્રાધામ અંબાજી ખાતે આવતીકાલે માં અંબાના નિજ મંદિરની પ્રક્ષાલન વિધિ કરવામાં આવશે. બપોરે 1:30 કલાક સુધી માં અંબાના દર્શન થશે. જે બાદ એટલે કે બપોરે 1:30 બાદ મંદિર બંધ  કરવામાં આવશે. મહત્વનું છે કે, ભાદરવી પૂનમના મેળા બાદ ચોથના દિવસે દર વર્ષે અંબાજી મંદિરમાં પ્રક્ષાલન વિધિ કરવામાં આવે છે. પ્રક્ષાલન વિધિમાં મંદિર સહિત માતાજીના સોના-ચાંદીના ઘરેણા અને ચાંચર ચોકની સાફ-સફાઇ કરવામાં આવે છે.  

અંબાજી ખાતે યોજાશે પ્રક્ષાલન વિધિ
આ અંગે શ્રી આરાસુરી અંબાજી માતા દેવસ્થાન ટ્રસ્ટ દ્વારા જણાવવામાં આવ્યું છે કે, મંદિરની પ્રણાલિક મુજબ તા- 01/10/2023 ભાદરવા વદ -2 (બીજ)ને રવિવારના રોજ માતાજીના નિજમંદિરમાં પ્રક્ષાલન વિધિ બપોરે 1:30 કલાકે શરૂ થશે, જેથી સદરહું દિવસ પુરતો માતાજીની આરતી તથા દર્શનનો સમય સવારે 07:10થી 11:30 સુધી અને બપોરે 12:30થી 01:30 સુધી રહેશે. 

શું છે પ્રક્ષાલન વિધિ
- અંબાજી મંદિરમાં પ્રક્ષાલનવિધિ વર્ષમાં એકવાર ભાદરવી પુનમ બાદ ચોથે કરવામાં આવે છે. 
- જેમાં અંબાજી નિજ મંદિરના ગોખ સહિત સમગ્ર મંદિર પરીસરની સાફ સફાઈ કરે છે. 
- આ ખાસ કરીને અમદાવાદના એક સોની પરિવાર દ્વારા કરવામાં આવે છે. જે છેલ્લા 187 વર્ષથી આ વિધિ સાથે સંકળાયેલા છે. 
- આ વિધિમાં અંબાજી મંદિર પરિસરને નદીઓના નીરથી ધોવામાં આવે છે. 
- માતાજીના શણગારના સોના-ચાંદીના દાગીનાઓને મંદિરના પવિત્રજળની ધોવામાં આવે છે.
- આ મંદિરની પવિત્રતા જાળવવા ખાસ પ્રક્ષાલન વિધિ કરવામાં આવે છે.