સિક્યુરીટી બ્રીચ / PM મોદીની સુરક્ષા ચૂક મામલો : ખરેખર શું બન્યું હતું? આખરે પંજાબ CM ચન્નીએ કરી દીધો મોટો ખુલાસો

• PM મોદીની સૂરક્ષા ચૂક પર પંજાબના સીએમ ચરણજીત સિંહ ચન્નીનું નિવેદન
• PM મોદી હેલિકોપ્ટરથી આવવાના હતા અંતિમ ઘડીએ રુટ બદલાયો
• મેં જાતે જઈને સુરક્ષા વ્યવસ્થા જોઈ હતી-સીએમ ચન્ની

પંજાબના મુખ્યમંત્રી ચરણજીત સિંહ ચન્નીએ ભારપૂર્વક કહ્યું કે PM મોદીની સૂરક્ષામાં કોઈ ચૂક થઈ નથી. તેમણે કહ્યું કે PM મોદી હેલિકોપ્ટરથી આવવાના હતા પરંતુ અંતિમ ઘડીએ તેમનો રુટ બદલાયો હતો અને તેમણે બાય રોડ આવવાનું નક્કી થયું હતું. મેં ગઈ કાલે મોડી રાતે સુધી તમામ સુરક્ષા વ્યવસ્થા પર નજર રાખી હતી. 

PMના રુટની માહિતી ફક્ત પોલીસને જ હતી રસ્તા પર પ્રદર્શનકારીઓ ક્યાંથી આવ્યાં-કેન્દ્રીય ગૃહ મંત્રાલય 
હવે સીએમ ચાન્નીએ આ વાત કહીને ચોક્કસપણે પોતાની સરકારનો બચાવ કર્યો છે પરંતુ ભાજપ અને ગૃહ મંત્રાલય સતત તેનું ખંડન કરી રહ્યું છે. ગૃહમંત્રાલયે સ્પસ્ટ કહ્યું છે કે પ્રધાનમંત્રીના પ્રવાસની સંપૂર્ણ માહિતી  પંજાબ સરકાર અને પોલીસને પહોંચાડવામાં આવી હતી. PMના રુટની માહિતી ફક્ત પોલીસને જ હતી તો પછી રસ્તા વચ્ચે પ્રદર્શનકારીઓ ક્યાંથી આવ્યાં તે સવાલ ભાજપ અને કેન્દ્રીય ગૃહ મંત્રાલયે ઉઠાવ્યો છે. 

ભાજપે હવે કોંગ્રેસ પર નિશાન સાધવાનું શરુ કર્યું

પંજાબમાં પીએમ મોદીની સુરક્ષામાં થયેલી ચૂક મામલે ભાજપે હવે કોંગ્રેસ પર નિશાન સાધવાનું શરુ કર્યું છે. ભાજપના રાષ્ટ્રીય અધ્યક્ષ જેપી નડ્ડાએ ટ્વીટ કરીને દાવો કર્યો હતો કે જ્યારે પીએમ મોદીનો કાફલો ઓવરબ્રિજ પર ફસાયો હતો ત્યારે સીએમ ચન્નીએ ફોન પર વાત કરવાનો ઇનકાર કરી દીધો હતો.

કોંગ્રેસ સરકારે પીએમનો કાર્યક્રમ રદ કરવા યુક્તિ અજમાવી-નડ્ડા 
જેપી નડ્ડાએ એક પછી એક શ્રેણીબદ્ધ ટ્વીટ કર્યા હતા. તેમણે લખ્યું હતું કે, પંજાબમાં આગામી ચૂંટણીમાં મતદારોના હાથે કારમી હારના ડરથી કોંગ્રેસ સરકારે પીએમનો કાર્યક્રમ રદ કરવા માટે શક્ય તેટલી બધી યુક્તિ અજમાવી હતી. આમ કરીને તેમને એ પણ યાદ ન હતું કે પીએમ મોદીએ ભગત સિંહ અને અન્ય શહીદોને શ્રદ્ધાંજલિ આપવાની છે અને વિકાસના કામોનો શિલાન્યાસ કરવાનો હતો.