એપલની કાંડા ઘડિયાળ ક્યારેક જીવ બચાવવામાં કામ લાગી જતી હોય છે તેવી એક ઘટના મહારાષ્ટ્રના પુણેમાં સામે આવી છે.
મહારાષ્ટ્રના પુણેના 17 વર્ષીય છોકરાનો દાવો
એપલની કાંડા ઘડિયાળે તેનો જીવ બચાવ્યો
ખીણમાં લપસી પડ્યો હતો છોકરો
એપલની ઘડિયાળમાંથી ફોન કરીને મિત્રોની સહાય માગી
મિત્રોએ આવીને બચાવી લીધો
જીવનમાં ક્યારેક ન માની શકાય તેવી ઘટનાઓ બનતી હોય છે અને તેને ચમત્કાર કહેવો પડતો હોય છે. કોઈ વ્યક્તિએ કાંડા પર પહેરેલી ઘડિયાળ પણ કોઈ દિવસે કોઈનો જીવ બચાવી શકતી હોય છે તેવી એક ઘટના મહારાષ્ટ્રના પુણેમાં બની છે. પુણેના 17 વર્ષીય યુવાને ખીણમાં રહીને પોતાની એપલની ઘડિયાળમાંથી કોલ કરીને મિત્રોને બોલાવીને પોતાની જાતની બચાવી લીધી હતી.
શું બન્યું હતું
પુણેનો 17 વર્ષનો સ્મિત મેહતા નામનો યુવાન તેના ત્રણ દોસ્તો સાથે લોનાવાલા ફરવા ગયો હતો. ટ્રેકિંગ બાદ પાછા આવતી વખતે સ્મિત 130 ફૂટ નીચે ખીણમાં ગબડી પડ્યો હતો અને ઝાડ પર લટકી જતા બચી ગયો હતો અને આ દરમિયાન સ્મિતને પગે વાગ્યું હતું. સ્મિતનો જીવ તો બચી ગયો હતો પરંતુ હવે ખીણમાંથી બહાર કેવી રીતે આવવું તે ખરો સવાલ હતો કારણ કે કોઈની પણ મદદ વગર ઉપર આવવું શક્ય નહોતું. આવી સ્થિતિમાં સ્મિત ખૂબ મૂંઝાણો પરંતુ અચાનક તેને યાદ આવ્યું કે તે ક્યારેક તેની એપલ વોચ દ્વારા માતાપિતા કે મિત્રોને ફોન કરતો હતો બસ પછી તે આનંદમાં આવી ગયો અને ખીણમાંથી એપલની વોચ દ્વારા તેના મિત્રોને કોલ કર્યો હતો. મિત્રોએ આવીને તેને ઉપર ઉઠાવી લીધો હતો અને આ રીતે તેનો જીવ બચી ગયો હતો. બાદમાં છોકરાને લોનાવાલાની એક હોસ્પિટલમાં દાખલ કરવામાં આવ્યો હતો અને તેના ઘાને ચેપ લાગ્યા બાદ 16 જુલાઈએ પુણેમાં તેની સર્જરી કરવામાં આવી હતી. કેટલીક જટિલતાઓને કારણે તેને મુંબઇની હોસ્પિટલમાં ખસેડવો પડ્યો હતો અને આખરે 7 ઓગસ્ટે તેને રજા આપવામાં આવી હતી.
એપલની કાંડા ઘડિયાળથી કોલ પણ કરી શકાય તેવી વ્યવસ્થા
ઉલ્લેખનીય છે કે એપલની કાંડા ઘડિયાળમાંથી કોલ પણ કરી શકાય તેવી એક વ્યવસ્થા હોય છે અને માતાપિતા અને મિત્રોને અગાઉ એપલની ઘડિયાળમાંથી કોલ કર્યો હોવાનું યાદ આવતા તેણે મિત્રોને કોલ કરીને બોલાવી લીધા હતા અને પોતાનો બચાવ કર્યો હતો.
યુવાને એપલના સીઈઓ ટીમ કૂકને જાણ કરી
સ્મિતે તેના આ અનુભવ વિશે એપલ કંપનીના સીઈઓ ટીમ કૂકને ઈમેઈલ કરીને જાણ કરી હતી. સ્મિત ટીમ કૂક પરના ઈમેઈલમાં લખ્યું કે તેમની કંપનીની એક ઘડિયાળ મુસીબત ટાણે કેવી રીતે તેનો જીવ બચાવવા કામ લાગી હતી. ટીમ કૂક પણ તેનો અનુભવ વાંચીને પ્રસન્ન થયા હતા અને વળતો જવાબ લખતાં તેના ઝડપી સાજા થવાની કામના કરી હતી અને પોતાનો અનુભવ શેર કરવા બદલ સ્મિતનો આભાર માન્યો હતો. ટીમ કૂકે લખ્યું હતું કે આ એક ભયંકર અકસ્માત જેવું લાગે છે.