આવક / મે મહિનામાં PUBGની કમાણીનો આંકડો જાણીને તમારી આંખો પહોળી થઈ જશે

રિપોર્ટ અનુસાર આમાંની મોટાભાગની આવક ચીનથી થઇ છે. આ આવક એપ સ્ટોર અને ગુગલ પ્લે સ્ટોરથી 1 મેથી 31 મેની વચ્ચે વૈશ્વિક સ્તરે ગણવામાં આવી છે. આ આશ્ચર્યજનક નથી, કારણ કે વિશ્વવ્યાપી લોકડાઉનને લીધે લોકો ઘરની અંદર જ રહેવા મજબૂર બન્યા હતા અને તેમનો સમય મોબાઇલ ગેમ્સ જેવી પ્રવૃત્તિઓ રમવામાં ખર્ચી રહ્યા હતા. ભારતમાં પણ લુડો કિંગ જેવી ગેમ્સમાં મોટો ઉછાળો જોવા મળ્યો છે અને તેથી જ ગેમ્સની આવકમાં પણ વધારો થઈ રહ્યો છે.

મે 2019 ની સરખામણીએ આ 41 ટકાનો ઉછાળો

મોબાઈલ એપ સ્ટોર માર્કેટિંગ ઇન્ટેલિજન્સ 'સેન્સર ટાવર'ના અહેવાલ મુજબ, PUBG મોબાઈલે મે માં 226 મિલિયન ડોલરની કમાણી કરી છે. મે 2019 ની સરખામણીએ આ 41 ટકાનો ઉછાળો છે. રિપોર્ટમાં એમ પણ કહેવામાં આવ્યું છે કે 226 મિલિયન ડોલરમાંથી 53 ટકા ચીન, 10.2 ટકા USA અને 5.5 ટકા સાઉદી અરેબિયાથી આવ્યા છે. તે નોંધવું જરૂરી છે કે આ ગેમ ડાઉનલોડ અને રમવા માટે એકદમ મફત છે, પરંતુ તેની અંદર ખરીદવા માટે ઘણા બધા વિકલ્પો ઉપલબ્ધ છે, જેમ કે પ્રીમિયમ સ્કિન, આઉટફિટ, રોયલ પાસ વગેરે.

આ છે PUBG પછીની સૌથી વધુ કમાણી કરતી ગેમ

Honor of Kingsએ PUBG મોબાઇલ પછીની બીજી ગેમ છે. આ ગેમ પણ ટેન્સેન્ટ દ્વારા પ્રકાશિત કરવામાં આવી છે. Honor of Kingsએ મે 2020 માં 204.5 મિલિયન ડોલર (લગભગ 1.5 હજાર કરોડ રૂપિયા) ની કમાણી કરી છે, જે ગયા વર્ષે મે થી 42 ટકા વધી છે. આ આવકનો લગભગ 95 ટકા હિસ્સો ચીનનો છે, કારણ કે આ ગેમ મુખ્યત્વે ચીની બજાર માટે બનાવવામાં આવી છે, જોકે, 2017 માં ગેમનું ગ્લોબલ વર્ઝન Arena of Valor નામથી બહાર પાડવામાં આવ્યું છે.

લોકડાઉનને કારણે મોબાઈલ ગેમ્સની લોકપ્રિયતા વધી

2018માં આરંભ થયા બાદ PUBG મોબાઇલ તેના બેટલ રોયાલ મોડ માટે લોકપ્રિય ગેમ છે. આ વર્ષે ચાલી રહેલી કોરોના વાયરસ મહામારીને લીધે ઘણા દેશોમાં લોકડાઉન જેવી સ્થિતિ સર્જાઇ છે અને લોકોને તેમના ઘરોમાં રહેવાની ફરજ પડી છે. આ એકમાત્ર કારણથી ઘણી ગેમ્સના એક્ટિવ યુઝર્સ બેઝમાં વધારો થયો છે. લોકો ગેમમાં પોતાનો ઘણો સમય પસાર કરી રહ્યા છે અને ખેલાડીઓને ગેમ સાથે જોડવા માટે સમયાંતરે અપડેટ્સ દ્વારા PUBG મોબાઇલ પણ ગેમમાં નવા ફીચર્સ લાવી રહ્યા છે.