પબજી ગેમના ક્રેઝમાં અનેક યુવાનો પોતાની કેરિયર બરબાદ કરી રહ્યાં છે. આ ગેમથી ઘણા પરિવારોની ખુશી પણ છીનવાઇ છે. હરિયાણાના રોહતકમાં રહેતા પરિવારનો આશાસ્પદ પુત્ર કે જે ધો-10માં મેરિટમાં આવ્યો હતો તે આજે બી.ટેકમાં સતત નાપાસ થઇ રહ્યો છે. રોહતકનાં ઝજ્જર વિસ્તારમાં રહેતો 19 વર્ષીય યુવકનો કિસ્સો આંખ ઉઘાડે તેવો છે. તેને તેના માતા-પિતાએ મોબાઇલ અપાવ્યો ત્યારથી મુશ્કેલીની શરુઆત થઇ.
મજૂરી કરનાર માતા-પિતાનો એકમાત્ર પુત્ર અને બે બહેનોનો એક ભાઈ પબજીની લતના કારણે બી.ટેકનાં અંતિમ વર્ષમાં તમામ સાત વિષયમાં નાપાસ થયો છે. તેની માતાએ કહ્યું પબજી માટે તેને ટોકવામાં આવે તો તે ગુસ્સે થઇ જાય છે, ઘરમાં રાખેલી વસ્તુઓ ફેંકી દે છે. પુત્રની ચિંતાથી માતા હતાશામાં ધકેલાઇ ગઇ છે. તેમના પર થોડાં દિવસો પહેલાં
ઓપરેશન થયું છે.
આ યુવાન ઉશ્કેરાઇને કોઇ ખોટુ પગલું ન ભરી લે તેવા ડરથી પરિવારના સભ્યો હવે કંઈ બોલતા નથી થોડા દિવસો પહેલાં ધાબા પરથી એક મોટો અવાજ આવ્યો ત્યારે લાગ્યું કે ચોર ઘૂસી ગયા છે. માતા ચુપચાપ ધાબા પર પહોંચી ત્યારે ખબર પડી કે તેમનો પુત્ર પબજી રમતો હતો અને મોટે મોટેથી બોલી રહ્યો હતો. તેને ટોકતા હુમલો કરીને માતાનું ગળુ પકડી લીધુ હતું અને ધાબા પરથી પડતું મુકવાની ધમકી પણ આપી હતી.
માતા આ જોઈને ખૂબ જ દુખી થઇ ગઇ હતી. માતાએ કહ્યું કે પુત્રને મોબાઈલ ફોન અપાવ્યો તે મોટી ભુલ સાબિત થઇ. યુવાને ડિપ્લોમા એન્ટ્રન્સ ટેસ્ટમાં સારા માર્કસ મેળવીને શહેરની એક પ્રતિષ્ઠિત એન્જિનિયરિંગ કોલેજમાં પ્રવેશ મેળવ્યો હતો. કોલેજનાં બીજા વર્ષમાં યુવકે એન્જિનિયરિંગનાં અભ્યાસ માટે મોબાઇલ જરુરી હોવાનું કહેતા શ્રમજીવી માતાપિતાએ પુત્રને આઠ હજાર રૂપિયાનો સ્માર્ટફોન અપાવ્યો હતો.
મોબાઇલ આવ્યા બાદ યુવક પબજીના રવાડે ચડી ગયો હતો. હવે પરિવારના સભ્યો પણ તેમની કારકિર્દીને લઇને ટેન્શનમાં છે. ઉલ્લેખનીય છે કે પબજીનાં કારણે યુવાનો પોતાની કેરિયર ઉપરાંત ઘરની સુખશાંતિને પણ દાવમાં લગાવી રહ્યાં છે. પબજીની લતમાં આપઘાતના અને હત્યાના બનાવો પણ બન્યાં છે.