અમેરિકામાં રંગભેદને લઇને ધમાચકડી મચી છે. જ્યોર્જ ફ્લૉયડના મોત બાદ ફરી એકવાર અશ્વેત નાગરિક પોલીસના હાથે માર્યો ગયો. આ ઘટનાને પગલે જ્યાં રંગભેદ વિરૂદ્ધ વિરોધ પ્રદર્શન ચાલી રહ્યા છે તેમાં બળતામાં ઘી હોમાયું હતું.
અમેરિકામાં વધુ એક અશ્વેતની હત્યા
એટલાન્ટામાં ઘટનાને પગલે સ્થિતિ બેકાબૂ
વિરોધીઓએ શનિવારે એટલાન્ટાનો એક મુખ્ય હાઇવે બંધ કરી દીધો હતો અને વેન્ડીઝમાં એક રેસ્ટોરન્ટમાં આગ લગાવી દીધી હતી, જ્યાં પોલીસે એક અશ્વેત માણસને ગોળી મારી દીધી હતી. લોકોના મતે, તે ફક્ત ધરપકડ ટાળવાનો પ્રયાસ કરી રહ્યો હતો.
અશ્વેત નાગરિકની હત્યા બાદ એટલાન્ટામાં સ્થિતિ ડામાડોળ
આ ઘટનાનો વીડિયો સામે આવ્યા બાદ અશ્વેત સામેના ભેદભાવ સામેનો દેશવ્યાપી વિરોધ વધુ પ્રબળ બન્યો છે. આપને જણાવી દઈએ કે અશ્વેત નાગરિકની હત્યા પછી એટલાન્ટામાં અશાંતિ ફેલાઈ ગઈ હતી.
પોલીસ અધિકારીનું રાજીનામું લેવાયું
ત્યાંના મેયર કેશા લાન્સ બોટમ્સે જણાવ્યું હતું કે શુક્રવારે રાત્રે વેન્ડીના 27 વર્ષીય રાશાર્ડ બ્રૂક્સના મોત અંગે તેમણે પોલીસ વડા એરિકા શિલ્ડ્સનું રાજીનામું સ્વીકાર્યું હતું.
વિરોધીઓએ રેસ્ટોરન્ટને આગ ચંપી કરી
સ્થાનિક ન્યુઝ ચેનલો પર ચાલતા વીડિયોમાં એવું જોવા મળે છે કે પોલીસ અધિકારીઓની ટીમ આગને કાબૂમાં લેવા રેસ્ટોરન્ટમાં પહોંચી ત્યાં સુધીમાં વિરોધીઓએ તેને સળગાવી દીધા હતા. આ સાથે જ, અન્ય વિરોધીઓએ હાઇવે નંબર 75 પર કૂચ કરી હતી અને ત્યાં ટ્રાફિકને સંપૂર્ણપણે બંધ કરી દીધો હતો.
પ્રેસ કોન્ફરન્સમાં મેયરનું નિવેદન
એક પ્રેસ કોન્ફરન્સમાં મેયર બોટમ્સે કહ્યું હતું કે, મને વિશ્વાસ નથી થતો કે તે વ્યક્તિ પર ઘાતક બળનો ઉપયોગ ન્યયોચિત હતું. જો કે, એટલાન્ટાના અધિકારીએ હજી સુધી અશ્વેતને ગોળી મારનાર 2 પોલીસ અધિકારીઓના નામ જાહેર કર્યા નથી. બંન્ને શ્વેત સમુદાય સાથે જોડાયેલા હતા.
શનિવારે જ પોતાનો જ જન્મદિવસ ઉજવ્યો
પોલીસની ગોળીથી માર્યા ગયેલા અશ્વેત નાગરિક બ્રૂક્સ એક યુવાન દીકરીનો પિતા છે. તેણે શનિવારે પોતાનો જન્મદિવસ ઉજવ્યો હતો.
થોડા દિવસ પહેલા એક અશ્વેતના મોતની બની છે ઘટના
અમેરિકામાં ગૃહયુદ્ધ જેવી પરિસ્થિતિ
અમેરિકામાં વર્તમાનમાં અશ્વેત આંદોલન ચાલી રહ્યું છે. પોલીસ કસ્ટડીમાં એક અશ્વેતના મોત બાદ આ આંદોલન શરુ કરવામાં આવ્યું છે જેમાં બ્લેક લાઈવ્સ મેટરના નેજા હેઠળ લાખોની સંખ્યામાં પ્રદર્શનકારીઓ રસ્તા પર ઉતરી આવ્યા છે. રસ્તા પર આવેલા આ પ્રદર્શનકારીઓ દિવસેને દિવસે વધુને વધુ હિંસક બનતા જઈ રહ્યા છે. ભારે તોફાનોના કારણે અમેરિકાના કેટલાય શહેરોમાં કર્ફ્યું લાદી દેવામાં આવ્યું છે છતાં હજારોની સંખ્યામાં પ્રદર્શનકારીઓ પથ્થરબાજી અને નારાબાજી કરી રહ્યા છે. જ્યોર્જ ફ્લોઈડ નામના વ્યક્તિને ન્યાય અપાવવા માટે પોલીસ પર હુમલાઓ કરવામાં આવી રહ્યા છે. દુકાનોમાં લૂંટફાટ મચાવી દેવામાં આવી છે. હજારોનું ટોળું જયારે વ્હાઈટ હાઉસ તરફ ધસી આવ્યું છે ત્યારે રાષ્ટ્રપતિ ટ્રમ્પે પણ બંકરમાં છુપાઈ જવું પડ્યું.