સ્પોર્ટ્સ / IND vs AUS: ચાલુ મેચમાં અદાણીનો વિરોધ, મેદાનમાં ઘુસી આવ્યા પ્રદર્શનકારીઓ

• ભારત અને ઓસ્ટ્રેલિયા વચ્ચે વનડે સિરીઝ 
• મેદાન પર ધસી આવ્યા પ્રદર્શનકારીઓ 
• ખેલાડીઓની સુરક્ષાને લઈને ઉઠયા સવાલ 

કોરોનાકાળમાં હવે ક્રિકેટની દુનિયામાં ધીમે ધીમે પહેલા જેવી પરિસ્થિતિ થઇ રહી છે જ્યાં ભારત અને ઓસ્ટ્રેલિયા વચ્ચે રમાઈ રહેલ મેચમાં દર્શકો પણ જોવા મળી રહ્યા છે.  જોકે આ મેચમાં અદાણીના વિરોધમાં ઘણા લોકો ઉતરી આવ્યા હતા. 

ઓસ્ટ્રેલિયામાં અદાણીના પ્રોજેક્ટનો ખૂબ મોટો વિરોધ થઇ રહ્યો છે અને લાંબા સમયથી આંદોલન ચલાવવામાં આવી રહ્યા છે.  આવો જ કંઈક વિરોધ મેચમાં પણ જોવા મળ્યો હતો.  

શુક્રવારે સિરીઝની પહેલી મેચ રમાઈ રહી હતી અને આ દરમિયાન અચાનક જ દર્શકો મેદાનમાં ઉતરી આવ્યા. આ પ્રદર્શનકકારીઓના હાથમાં અદાણીના વિરોધમાં પોસ્ટર હતા અને તેઓ સીધા જ મેદાનમાં ધસી આવ્યા હતા. 

મેદાનમાં કેટલાક સુરક્ષા ગાર્ડ હતા અને તે આ બધાને બહાર લઇ ગયા. આ વિરોધ કરનાર લોકોના હાથમાં ‘State Bank of India No $1B Adani Loan’ લખેલ મોટા મોટા પોસ્ટર હતા જેની ખૂબ ચર્ચા થઇ રહી છે. 

આ વન ડે મેચ બાદ હવે સુરક્ષાને લઈને ઘણા બધા સવાલ ઉઠી રહ્યા છે. કોરોના વાયરસના કારણે ખેલાડીઓ 'બાયોબબલ'માં રહી રહ્યા છે અને આ દરમિયાન દર્શકો મેદાનમાં ઉતરી આવે એ ખેલાડીઓની સુરક્ષામાં ખૂબ મોટી ચૂક કહી શકાય. પ્રદર્શનકારીઓની ટી શર્ટ પર #StopAdani લખેલ હતું.  

નોંધનીય છે કે અદાણીનો ત્યાં ખૂબ વિરોધ થઇ રહ્યો છે અને પર્યાવરણ પ્રેમીઓ તેમાં આગળ વધીને નેતૃત્વ કરી રહ્યા છે. આ મુદ્દો અદાલતમાં પણ પહોંચ્યો હતો અને અદાલતમાં અદાણીએ જીત મેળવી છે. અદાણીનું કહેવું છે કે ક્વીન્સલેન્ડમાં 1500 લોકોને રોજગાર આપવામાં આવશે.