ટકરાવ / આણંદ: ચૂંટણી અધિકારીઓએ ઉમેદવાર પાસેથી નાણા લીધાની આશંકાએ કણભા ગ્રામજનોનો હોબાળો, અસલમાં એ ભથ્થું હતું

• બોરસદના કણભા ગામે મતદાન બાદ હોબાળો
• શાંતિપૂર્ણ રીતે મતદાન પૂર્ણ થયા પછી હોબાળો થયો
• પ્રિસાઈડીંગ અધિકારી સહિતના કર્મીઓને ગ્રામજનોએ લીધા બાનમાં

રાજ્યમાં ગ્રામ પંચાયતની ચૂંટણીને લઈને શાંતિપૂર્ણ રીત મતદાન પૂર્ણ થઈ ગયું છે. જેનું પરિણામ 21 ડિસેમ્બરના દિવસે જાહેર કરવામાં આવશે. રાજ્યમાં 8684 ગ્રામ પંચાયતની ચૂંટણી યોજાઈ હતી.પણ આણંદ બોરસદના કણભા ગામે મતદાન બાદ હોબાળો થયો છે. ઉમેદવાર પાસેથી નાણા લીધાની આશંકાએ ગ્રામજનોએ અધિકારીઑને બાનમાં લીધા હતા. 

આણંદ બોરસદના કણભા ગામે શાંતિપૂર્ણ રીતે મતદાન પૂર્ણ થયા પછી અચાનક શકના આધારે મામલો બીચક્યો હતો. પ્રિસાઈડીંગ અધિકારી સહિતના કર્મીઓને ગ્રામજનો ફરતે ફરી વળ્યા હતા. ચૂંટણી કામગીરી બાદ અધિકારી કર્મીઓને ભથ્થું આપી રહ્યા હતા તે સમયે ગ્રામજનોએ વિરોધ કર્યો હતો. ગામલોકોને આશંકા હતી કે ઉમેદવાર પાસેથી નાણા લઈ વહેચણી કરવામાં આવી રહી છે. જેથી ગામલોકો એકઠા થઈ અધિકારીને ચો તરફ ઘેરી લીધા હતા અને હોબાળો કર્યો હતો જે બાદ ફરજના પ્રિસાઈડીંગ અધિકારીએ પોલીસને જાણ કરતાં મોટી સંખ્યામાં પોલીસ કાફલો તેમજ મામલતદાર પણ ઘટના સ્થળે દોડી આવ્યા હતા અને ગ્રામજનોને સમજાવ્યા હતા કે તે કોઈ ઉમેદવાર પાસેથી રૂપિયા લઈ વહેચી રહ્યા ન હતા તેમણે સરકાર તરફથી જે ચૂંટણી ભથ્થું મળે છે તેની વહેચણી કરી રહ્યા હતા. લાંબી રામાયણ બાદ ગ્રામજનો સાથે સમજાવટ કરી મામલો થાળે પાડવામાં આવ્યો હતો.

રિણાવાડા ગામે ચૂંટણી અધિકારીએ કરી મોટી ભૂલ
પોરબંદર ગ્રામ પંચાયત ચૂંટણીમાં ગોટાળો થયો હોવાનું બહાર આવ્યું છે.પોરબંદરનાં રિણાવાડા ગામે ચૂંટણી પ્રક્રિયામાં પ્રિસાઈડિંગ અધીકારીની ભૂલ થઇ હોવાના કારણે એક વોર્ડના બેલેટ પેપર અન્ય વોર્ડમાં ઇસ્યુ કર્યાનું ખુલ્યુ છે. આ ભૂલ ત્યારે સામે આવી જ્યારે સાંજે  ચૂંટણી પ્રક્રિયા પૂર્ણ થઇ ચુકી હતી. એક જગ્યાના બદલે અન્ય જગ્યાનાં બેલેટ પેપર અપાયાની ભૂલ ધ્યાને આવતા આવતા ચૂંટણી અધિકારીઓ દોડતા થયા હતા.આ પરિણામે, ગ્રામજનોએ તમામ વોર્ડની ચૂંટણી ફરી યોજવાની કરી માંગ કરી છે.

છોટાઉદેપુરના બોડેલીની ગ્રામ પંચાયતની ચૂંટણીમાં બબાલ થઈ
બોડેલી ગ્રામ પંચાયતના મતદાન દરમિયાન બબાલ થઈ હતી. નર્મદાના ઔદ્યોગિક વસાહતના મતદાન પથકમાં 2 જૂથ આમને સામને આવી ગયા હતા. લાકડીઓ સાથે બંને જૂથોના શખ્સોએ મારામારી કરતા માહોલ ગરમાયો હતો.મારામારી દરમિયાન ફરજ પરના શિક્ષિકાને ઈજાઓ પહોંચી હતી.બંને જૂથના કેટલાક શખ્સો ઈજાગ્રસ્ત થતાં સારવાર માટે  હોસ્પિટલ ખસેડવામાં આવ્યાં હતા.બોડેલી પોલીસે સમગ્ર મામલે ફરિયાદ નોધીને આગળની કાર્યવાહી હાથ ધરી હતી.