સંક્રમણ / ગાંધીનગરમાં GMERSના ડૉક્ટરો અને નર્સિંગ સ્ટાફનું આંદોલન તોડી પાડવા પોલીસના કાફલા ઉતર્યા

• GMERSના ડૉક્ટરો અને નર્સિંગ સ્ટાફના આંદોલનનો મામલો
• આંદોલન તોડી પાડવા માટે પોલીસ મેદાને
• ગાંધીનગર સિવિલ હોસ્પિટલમાં ઉચ્ચ પોલીસ અધિકારીઓ પહોચ્યા

કોરોના સંક્રમણમાં તબીબો અને નર્સિંગ સ્ટાફ દ્વારા સરકાર પાસે પોતાની કેટલીક માગણીઓને લઈ રજૂઆત કરવામાં આવી રહી છે. જેને લઈ સરકાર દ્વારા ગઈકાલની કેબિનેટની બેઠકમાં ચર્ચાઓ પણ થઈ હતી. પરંતું કોઈ યોગ્ય જવાબ ન આવ્યા બાદ ગાંધીનગરમાં GMERSના ડૉક્ટરો અને નર્સિંગ સ્ટાફ દ્વારા આંદોલન ચાલુ છે. વિવિધ પડતર માગણીઓને લઈને આંદોલન કરવામાં આવી રહ્યું છે. ત્યારે આ આંદોલનને તોડી પાડવા માટે પોલીસ વિભાગ સક્રિય થયું છે. હાલ ગાંધીનગર સિવિલ હોસ્પિટલમાં ઉચ્ચ પોલીસ અધિકારીઓ પોલીસ કાફલો સાથે પહોંચ્યા છે.

ડૉક્ટર હિરેન પ્રજાપતિનું નિવેદન

GMERS ફેકલ્ટી એસોસિએશનના પ્રમુખ ડૉક્ટર હિરેન પ્રજાપતિ દ્વારા જણાવાયું કે, અમે શાંતિ પૂર્વક આંદોલન કરી રહ્યા હતા. પરંતુ અમારા આંદોલનને સરકાર દ્વારા દબાવવાની કોશિશ થઈ રહી છે. અમારા કેમ્પસમાં 150 જેટલા પોલીસને ઉતારી દેવાઈ છે. અમારા તરફ અમાનુષી વર્તન થઈ રહ્યું છે. અમને ડર છે કે, અમારા ડૉક્ટર અને નર્સિંગ સ્ટાફને નુકસાનથી બચાવવા વિનંતી છે.

 કેબિનેટમાં તબીબી ટિચર્સ એસો.ની માગને લઈ ચર્ચા

તો ગઈકાલે કેબિનેટ બેઠકમાં સૌથી મહત્વનો મુદ્દો ડૉક્ટર હડતાળનો ઉઠ્યો હતો. રાજ્યભરમાં તબીબી અધ્યાપકો દ્વારા વિરોધ કરાયો હતો. મેડિકલ ટીચર એસો. દ્વારા રજૂઆત કરવામાં આવી હતી. પડતર માંગણીઓને લઇ અનેક રજૂઆત સરકાર સમક્ષ કરવામાં આવી હતી. જેના કારમએ મુખ્યમંત્રીએ અગ્રસચિવની અધ્યક્ષતામાં કમિટી બનાવી હતી. અને તબીબી અધ્યાપકોના પ્રશ્નો સાંભળવામાં આવ્યા હતા. પ્રદીપસિંહે કહ્યું કે, મુખ્યમંત્રીને પ્રશ્નો વિશે માહિતગાર કરવામાં આવ્યા છે. 

ગઈકાલે ગૃહ રાજ્ય મંત્રીએ કહ્યું, તબીબો આંદોલન ન કરે

ગઈકાલની કેબિનેટ બેઠક બાદ ગૃહ રાજ્યમંત્રી પ્રદીપસિંહ જાડેજાએ કહ્યું કે, તબીબો કોરોના વોરિયસ કામગીરી કરી રહ્યા છે. અને એસો.ના પ્રશ્નોના સંબંધિત વિભાગે હકારાત્મક અભિગમ આપ્યો છે. તમામ ડોકટરને વિનંતી કે સરકાર હકારાત્મક છે. જેથી તબીબોએ આંદોલનના હથિયારનો ઉપયોગ કરવો જોઈએ નહીં. અને કોવિડમાં પોતાની સેવા ચાલુ રાખે.  સોમવારે નિર્ણય કરવા અંગે વાત થઇ હતી. પરંતુ જરૂરી વિગતો એકત્ર કરવામાં વિલંબ થયો છે. ઝડપથી આ પ્રશ્નનું નિરાકરણ લાવવા માટે પ્રતિબદ્ધ છીએ. તો સાથે પ્રદીપસિંહે કહ્યું કે, નર્સિંગ સ્ટાફની માગણીઓ પર વિચારણા ચાલી રહી છે. નર્સિંગ સ્ટાફની રજૂઆત મુદ્દે રિપોર્ટ સબમિટ કરાશે.