હિંમતનગર / આગીયોલમાં ડ્રોન ઉડાડી પ્રોપર્ટી કાર્ડ બનાવાયા, આ ગામોમાં પણ શરૂ થશે પાયલોટ પ્રોજેક્ટ

• ડ્રોનથી થશે જમીનની માપણી 
• પાયલોટ પ્રોજેક્ટમાં વિવિધ ગામોની પસંદગી 
• ડ્રોન કેમેરા થકી મિનિટોમાં થશે કામ પુરું

રાજ્યના 3 જિલ્લાના એક- એક ગામમાં પાયલોટ પ્રોજક્ટ હાથ ધરાવામાં આવ્યો છે. આગીયોલમાં માત્ર 50 મિનિટમાં જ આખા ગામના લોકોના પ્રોપર્ટી કાર્ડ બનાવી દેવાયા હતા.જિલ્લામાં એક માત્ર ગામમાં હાથ ધરાયેલા આ પ્રોજેક્ટથી 50 મિનિટમાં જ તમામના પ્રોપર્ટી કાર્ડ બની ગયા હતા. પ્રોપર્ટી કાર્ડ બનાવવામાં સમય અને શક્તિનો બચાવ થયો હતો. 

પાયલોટ પ્રોજેક્ટમાં વિવિધ ગામોની પસંદગી 

ડ્રોન દ્વારા લેવાયેલી જે તે વિસ્તારની તસવીરને પગલે તેનું ઝીણવટપૂર્વક અભ્યાસ થાય છે. જેને પગલે કોઈપણ પ્રકારની ક્ષતિ વગરનું પ્રોપર્ટી કાર્ડ બની શકે છે. ડ્રોનથી પ્રોપર્ટી કાર્ડ બનાવવા માટે ગુજરાતમાં ભાવનગર, અમદાવાદ અને સાબરકાંઠાના એક એક ગામડાને પાયલોટ પ્રોજેક્ટમાં પસંદગી કરવામાં આવી છે. જેમાં સાબરકાંઠાના હિંમતનગર તાલુકાના આગીયોલ ગામને પસંદ કરવામાં આવ્યું છે.

ડ્રોન કેમેરા થકી મિનિટોમાં થશે કામ પુરું

ડિજિટલ યુગથી કોઈ પણ જટિલ કામ કેટલું સરળ બની શકે તેનું ઉદાહરણ આજે સાબરકાંઠાના હિંમતનગરના આગિયોલ ગામે જોવા મળ્યું. એક તરફ પ્રોપર્ટી કાર્ડનું કામ મહિનાઓ સુધી ચાલે છે. જે કામ આજે ડ્રોન કેમેરા થકી મિનિટોમાં કઈ રીતે પૂરું થાય છે તે પ્રત્યક્ષદર્શી બની રહ્યું. આગીયોલ ગામમાં પાયલોટ પ્રોજેક્ટ હાથ ધરાતા લોકો અને વિદ્યાર્થીઓ ડ્રોન દ્વારા થતી પ્રોપર્ટી કાર્ડની કામગીરી જોવા ઉમટી પડ્યા હતા. 

સરળતાથી બનશે પ્રોપર્ટી કાર્ડ 

તો રાજ્યમાં સાબરકાંઠામાં માત્ર આગીયોલ ગામની પાયલોટ પ્રોજેક્ટમાં પસંદગી થયા બાદ ડિજિટલ ક્રાંતિ થકી આગામી સમયમાં કેટલી સરળતાથી પ્રોપર્ટી કાર્ડ બનાવી શકાશે તેનો તાગ મેળવી શકાયો હતો. આજે આ પાયલોટ પ્રોજેક્ટના શુભારંભ સાથે ગાંધીનગરથી લઈ સાબરકાંઠા જિલ્લાના તમામ અધિકારીઓ પાયલોટ પ્રોજેક્ટની પધ્ધતિને બિરદાવી હતી. તેમજ આગામી સમયની ડિજિટલ ક્રાંતિને પણ બિરદાવી હતી. સાથેસાથે રાજ્ય સરકારના પ્રયાસને મદદરૂપ થવાની આશા વ્યક્ત કરી હતી.