VIDEO / ધોરાજીમાં બે વર્ષમાં 45 કરોડ ધોવાયા, તંત્રના પાપે હાડકાં ભાંગી નાંખે તેવો 'વિકાસ'

• ધોરાજીમાં ધોવાયા રસ્તા, 2 વર્ષમાં 45 કરોડ પાણીમાં
• શહેરના 45 ટકા રસ્તાઓની હાલત બિસ્માર 
• ભાજપ-કોંગ્રેસ માત્ર આક્ષેપોમાં જ મસ્ત 

જ્યારે ચોમાસું આવે છે એટલે મુશ્કેલી શરૂ થઈ જાય છે, લોકો પરેશાન થાય છે અને ચોમાસું ગયા બાદ તે મુશ્કેલીનું પણ આવી જાય છે. પરંતુ કરોડોનાં આંધણ સાથે પરંતુ માત્ર તે પણ આવતા ચોમાસા સુધી. રાજકોટના ધોરાજીમાં પહેલા વરસાદ સાથે ડામરના રસ્તા માટીના રસ્તા બની ગયા છે. જેના કારણે શહેરીજનો મુશ્કેલીમાં મુકાયા છે. 

ખાડાદાર વિકાસ 
વિકાસ કેવો હોય તો એવું કહી શકાય કે, જ્યાં ખાડાઓનું સામ્રાજ્ય હોય અને દર વર્ષે લોકોના ટેક્સના કરોડો રૂપિયા ધોવાઈ જતા હોય. લોકોની કમર ભાંગતી હોય, લોકોના જીવ જતા હોય તેને આપણે વિકાસ કહીશું. કહેવાની પણ અહીં જરૂર નથી તમે ખુદ વિકસીત અને વિકાશીલ ગુજરાતના આ વિકાસને જોઈ શકો છે. જ્યાં કહેવાય છે ડામરવાળો રસ્તો પરંતુ દેખાય છે માટીદાર અને ખાડાદાર રસ્તો. 

ચંદ્ર પર જવાની જરૂર નહીં, રાજકોટમાં જ કરો અનુભવ 
ધોરાજી શહેરમાં પ્રવેશો એટલે તમારે તમારી સુરક્ષા જોઈને ચાલવું પડે છે. કારણ કે, ધોરાજીના પ્રવેશ દ્વારા અને શહેરના તમામ મુખ્ય માર્ગોની હાલત ખુબજ ખરાબ છે. તમામ રોડ ઉપર મોટા અને ઊંડા ખાડા પડી ચુક્યા છે, અને આ રોડ ઉપરથી જયારે કોઈ વાહન કે કાર પસાર થાય તો કાર જાણે કે નાચતી હોય તેવો આભાસ થશે. એવું કહી શકાય કે, કોઈ વ્યક્તિને ઈમરજન્સીમાં હોસ્પિટલ લઈ જવાની જરૂર પડી તો હોસ્પિટલ પહોંચતા પહેલા જ તેનો જીવ જઈ શકે છે. આવું કહેવું ન જોઈએ પરંતુ તેનું કારણ તમારી આંખો સામે છે. 

શું આક્ષેપોથી પરે જનતાનું વિચારશે નેતાઓ?
જોકે અહીં આ ખાડાદાર વિકાસમાં કોંગ્રેસની ભૂમિકા સામે સવાલો ઉઠી રહ્યા છે, આક્ષેપો એવા છે કે, ધોરાજીમાં કોંગ્રેસનું સામ્રાજ્ય છે. ધારાસભ્ય પણ કોંગ્રેસના છે અને નગરપાલિકા પણ કોંગ્રેસના હાથમાં છે. જોકે ભાજપના આક્ષેપ સામે કોંગ્રેસ ધારાસભ્ય પોતાનો બચાવ કરતા આ રોડ-રસ્તા ભાજપની દૈન હોવાનું જણાવી રહ્યા છે. 

સવાલ અહીં એ છે કે, 45 કરોડના ખર્ચે બનેલ રસ્તા 2 વર્ષમાં કેવી રીતે ધોવાઈ ગયા? કોની મીલિભગતથી રસ્તાઓની આવી હાલત છે? શું આ જીવલેણ અને ધોવાયેલા રસ્તાઓને વિકાસ કહેશો? ક્યા કોન્ટ્રાક્ટરે આવા મજબૂત રસ્તા બનાવ્યા જે 2 વર્ષમાં ધોવાઈ ગયા? ધોરાજીના રસ્તાઓ પર ડામરની જગ્યાએ માટી જ કેમ દેખાય છે? શું આવી રીતે જનતાના ટેક્સના કરોડો રૂપિયા ખાડામાં જાય છે? ધોરાજીની જનતાને આ તમામ સવાલોના જવાબ જોઈએ છે. સાથે-સાથે વિકાસશીલ સરકાર શું આને વિકાસ કહે છે તેનો પણ જવાબ જોઈએ છીએ. આશા રાખીએ તે, વિકાસના આ ખાડા જોઈને સરકાર કોઈ એક્સનમાં આવશે.