ફ્રોડ / બૅંકના કર્મચારીઓનાં ઈનામના 9.32 લાખ અધિકારીએ ઘર ભેગા કર્યાં

સેટેલાઇટ વિસ્તારમાં આવેલ રાહુલ ટાવરમાં રહેતા અને બારેજામાં આવેલ એસબીઆઈની શાખામાં ચીફ મેનેજર તરીકે ફરજ બજાવતા અભિષેક મેહરોત્રાએ અસલાલી પોલીસ સ્ટેશનમાં વિશાલ ડો‌ડિયા વિરુદ્ધમાં ઉચાપતની ફરિયાદ કરી છે.

ફરિયાદ પ્રમાણે બારેજામાં આવેલ એસબીઆઈ શાખામાં સિનિયર એસોસિએટ તરીકે ફરજ બજાવતા વિશાલ ડો‌ડિયાએ કર્મચારીઓ અને અધિકારીઓના કમ્પ્યૂટરના આઇપી એડ્રેસનો ઉપયોગ કરીને  પ્રોત્સાહક ઇનામના બારોબાર રૂપિયા અલગ અલગ ખાતામાં ટ્રાન્સફર કરી દીધા હતા.

૨૨ ફેબ્રુઆરીના રોજ જીઆઇટીસી કોર્પોરેટ ઓફિસ, મુંબઈથી રિજનલ ઓફિસ-૪ના એજીએમને કોઈ કર્મચારી બેન્કમાં ફ્રોડ થયાનો મેઇલ મોકલ્યો હતો, જેથી  રિજનલ ઓફિસ-૪ના એજીએમ અને ચીફ મેનેજર એસબીઆઇની બારેજા શાખામાં ફ્રોડ થવા બાબતે તપાસ કરવા ગયા હતા.

બેન્કમાં તપાસ કરતાં બેન્કના સિનિયર એસોસીએટ દ્વારા બેન્કની વીએનસી (વર્ચ્યુઅલ નેટવર્ક કંટ્રોલ) સિસ્ટમનો દૂરુપયોગ કરીને ફ્રોડ કર્યુ હોવાનું જાણવા મળ્યું હતું. ત્યારબાદ સિનિયર એસોસિએટને આંબાવાડી ખાતે બોલાવીને પૂછપરછ કરાતાં તેમણે ફ્રોડ કર્યાનું કબૂલ કર્યું હતું. 

વિશાલે તાત્કાલિક ૯.૩૨ લાખ રૂપિયા પરત કર્યા હતા.હાલ સિનિયર એસોસીએટ સામે ગુનો સાબિત થતાં તેને સસ્પેન્ડ કરવામાં આવ્યો છે. બેન્કના  ઉચ્ચ અધિકારીઓની સૂચનાથી ગઇ કાલે અસલાલી પોલીસ સ્ટેશનમાં વિશાલ સામે ઉચાપતની ફરિયાદ કરાઇ છે. પોલીસે આ મામલે ગુનો દાખલ કરીને તપાસ શરૂ કરી છે.