ઉત્તરપ્રદેશમાં આગામી ચૂંટણીને લઈને કોંગ્રેસ દ્વારા તૈયારીઓ શરૂ કરી દેવામાં આવી છે. પ્રિયંકા ગાધી હવે ઉત્તરપ્રદેશમાં વરિષ્ઠ નેતા શિલા કૌલના ઘરે રોકાઈને ચૂંટણીની રણનિતી ઘડશે
ઉત્તરપ્રદેશમાં 2022ની ચૂંટણીનો ધમધમાટ
પ્રિયંકા ગાંધી જુલાઈમાં ઉત્તરપ્રદેશ પહોચશે
વરિષ્ઠ નેતા શિલા કૌલના ઘરે રોકાશે પ્રિયંકા ગાંધી
ઉત્તરપ્રદેશમાં ચૂંટણીને લઈને બધીજ પાર્ટીઓ દ્વારા તૈયારીઓ શરૂ કરી દેવામાં આવી છે. ત્યારે કોંગ્રેસ દ્વારા પણ ચૂંટણીની તડામાર તૈયારીઓ શરૂ કરી દેવામાં આવી છે. જુલાઈ મહિનામાં પ્રિયંકા ગાંધી લખનઉમાં પહોચશે અને ત્યાથી તેઓ આગામી ચૂંટણીની રણનિતી ઘડવાના છે. બીજી તરફ ભાજપ અને સપામાં પણ ચૂંટણીની તૈયારીઓ જોવા મળી રહી છે.
શિલા કૌલના ઘરે રોકાશે પ્રિયંકા ગાંધી
પ્રિયંકા ગાંધી કોંગ્રેસના વરિષ્ઠ નેતા શિલા કૌલના ત્યા રોકાવાના છે તેવી માહિતી સામે આવી છે. હાલ તેમના ઘરે રિનોવેશનનું કામ ચાલી રહ્યો છે. જેમા પ્રિયંકા ગાંધીની જરૂરીયાત મુજબ તૈયારીઓ કરવામાં આવી રહી છે.
કોંગ્રેસના કાર્યકરોમાં ખુશીનો માહોલ
શિલા કૌલના ઘરનું 6 મહિનાથી રિનોવેશન કામ ચાલી રહ્યું છે. આ રિનોવેશન પણ પ્રિયંકા ગાંધીના ઉપયોગ અનુસાર કરવામાં આવ્યું છે. તેમજ ઘરનું રિનોવેશન સંપૂર્ણ રીતે હવે તૈયાર પણ થવા આવ્યું છે. પ્રિયંકા ગાંધી લખનઉમાં રહેવા આવશે એવા સમાચાર સામે આવ્યા બાદ કોંગ્રેસના કાર્યકર્તાઓમાં જુસ્સો આવી ગયો છે.
ઉત્તરપ્રદેશમાં વિકાસની ગંગા વહેશે: કોંગ્રેસ
ઉત્તરપ્રદેશ કોંગ્રેસના પ્રદેશ અધ્યક્ષ અજય કુમાર લલ્લૂએ તો એવો દાવો કર્યો છે કે તેમની પાર્ટી આ વખતે જરૂરથી જીતવાની છે. સાથેજ તેમણે એવું પણ કહ્યું છે કે પ્રિયંકા ગાંધીના નેતૃત્વમાં ઉત્તરપ્રદેશની અંદર વિકાસની ગંગા વહેશે. તેમના આવા નિવેદનને લઈને હાલ તેઓ ઘણો ચર્ચાનો વિષય બન્યા છે.
પ્રિયંકા ગાંધી યુપીના મુખ્યમંત્રી બને તેવી શક્યતા
એવુ કહેવામાં આવી રહ્યું છે કે જો ઉત્તરપ્રદેશમાં કોંગ્રેસની જીત થશે તો મુખ્યમંત્રીની કમાન પણ પ્રિયંકા ગાંધી સંભાળી શકે છે. જોકે આ મામલે હજુ સુધી કોઈ ચોક્કસ માહિતી સામે નથી આવી. પરંતુ કોંગ્રેસને પૂરો વિશ્વાસ છે કે પ્રિયંકા ગાંધીના નેતૃત્વમાં તેઓ ઉત્તરપ્રદેશની ચૂંટણી જરૂરથી જીતશે.
કોંગ્રેસ જરૂરથી જીતશે તેવો રાહુલ ગાંધીનો દાવો
ઉલ્લેખનીય છે 2019માં લોકસભા ચૂંટણી વખતે પ્રિયંકા ગાંધીને ઉત્તરપ્રદેશ માટે મોટી જવાબદારી આપવામાં આવી હતી. તે સમયે રાહુલ ગાંધીએ પણ કહ્યું હતું કે તેમને લાંબા ગાળા માટે જવાબદારી આપવામાં આવી છે. સાથેજ તે સમયે રાહુલ ગાંધીએ એવું પણ કહ્યું હતું કે પ્રિયંકા ગાંધીને માત્ર 4 મહિના માટે જવાબદારી આપવામાં નથી આવી. ઉપરાંત રાહુલ ગાંધી એવો પણ દાવો પણ કરી ચૂક્યા છે કે 2022માં કોંગ્રેસ ઉત્તરપ્રદેશમાં જીતશે. જેથી તેમનો દાવો કેટલો સાચો પડે છે તે તો આવનારા સમયમાંજ ખબર પડશે.