પોરબંદર સિવિલ હોસ્પિટલમાં કેદીને સુવિધા આપવા મામલે જિલ્લા પોલીસ વડા એક્શનમાં આવ્યા છે. VTVના અહેવાલ બાદ જિલ્લા પોલીસ વડા એક્શનમાં આવ્યા છે. LCB અને SOG ટીમ દ્વારા રાત્રે ચેકિંગ કરવામાં આવ્યું હતું. કમલાબાગ પોલીસે હોસ્પિટલના કેદી વોર્ડનું ચેકિંગ હાથ કર્યું હતું. હોસ્પિટલના કેદી વોર્ડના બારી-દરવાજા લોક કરવામાં આવ્યા છે. જવાબદાર પોલીસકર્મી વિરુદ્ધ તપાસ હાથ ધરીને કાર્યવાહી કરાશે.
કેદીઓને આરામથી મળતી સુવિધાઓ
પોરબંદર સિવિલ હોસ્પિટલમાં કેદી વોર્ડના વિડીયો વાયરલ થતા પોલીસ તંત્રએ તપાસનો ધમધમાટ શરૂ કર્યો છે. જુદીજુદી ટિમો બનાવી દોષિતો સામે આકરા પગલાં લેવા તપાસ શરૂ કરી છે. પોરબંદરની ખાસ જેલમાં અલગ ગુન્હામાં સજા ભોગવતા કેદીઓએ બીમારી સબબ જેલમાંથી સિવિલ હોસ્પિટલમાં સારવારમાં ખસેડવામાં આવ્યા હતા. ત્યાંથી કોઈએ કેદીઓને તમાકુ, દારૂ, મોબાઈલ અને સગા સબંધીઓને મળવા દેવામાં આવતા હોવાનો વિડીયો VTVના અહેવાલમાં પ્રસારીત થઇ હતી. આ વિડિઓ પ્રસારિત થતાની સાથે જ જિલ્લા પોલીસ અધિકારીએ સમગ્ર મામલે તપાસ તેજ કરી છે. LCB અને SOGની ટિમ દ્વારા પોરબંદરની ખાસ જેલની જડતી લેવામાં આવી હતી, તો કમલાબાગ પોલીસ દ્વારા હોસ્પિટલના કેદી વોર્ડનું ચેકીંગ હાથ ધર્યું હતું. ઘણા સમયથી હોસ્પિટલમાં જેલના કેદીઓ સ્વર્ગ બનાવી હોસ્પિટલમાં રહેતા હતા અને ગુન્હા કરવા મળતીયાઓનો સહારો લઈ મોટા ગુન્હા આચરતા હોવાના આક્ષેપ થયા હતા પરંતુ હવે જેલ વોર્ડનો વીડિયો વાયરલ થતા પોલીસના પગ તળેથી જમીન સરકી ગઈ છે. અને તપાસનો ધમધમાટ શરૂ થયો છે.
જોવાનું હવે એ છે કે જે કેદીઓ હોસ્પિટલમાં હતા તે ખરેખર બીમાર હતા કે બીમારીના બહાને જલસા કરવા હોસ્પિટલમાં રહી મોટા ગુન્હા કરવાની ફિરાકમાં હતા તે દિશામાં પોલીસ તપાસ કરી રહી છે.
જુઓ આ વિડીયો
પોરબંદર જેલ વિભાગ અને સિવિલમાં ભ્રષ્ટાચારની મિલીભગત હોવાનો કથિત વીડિયો સામે આવ્યો છે. વીટીવી ન્યુઝ પાસે જે વીડિયો આવ્યો છે એ વીડિયો કેદી દર્દીએ ઉતાર્યો છે. કેદી દર્દી દ્વારા આ વીડિયોમાં અનેક દાવાઓ કરવામાં આવી રહ્યા છે. દાવા પ્રમાણે જોઇએ તો કેદીઓને દર્દી તરીકે લાંબો સમય સુધી સિવિલ હોસ્પિટલના દર્દી વોર્ડમાં રાખવામાં આવે છે. ઉપરાંત દર્દીઓ પોતાના પરિજનોને બેરોકટોક મળી શકે છે. આ ઉપરાંત જેલના દર્દીઓ બેડ ઉપર દેખાતા નથી. આ દર્દીઓ ક્યાં ગુમ થઇ જાય છે એ સૌથી મોટો પ્રશ્ન અહીં ઉપસ્થિત થાય છે. કેદીઓને હોસ્પિટલમાં દાખલ કરવા માટે કેટલાક લોકો ચોક્કસ ભૂમિકા ભજવતા હોવાનો દાવો પણ કરવામાં આવ્યો છે. અધિકારીઓને પણ આ પોલમપોલની જાણકારી હોવા છતાં કોઇપણ કાર્યવાહી કરવામાં નથી આવતી. સિવિલ વોર્ડમાં કેદીઓને વ્યસનની સવલતો પુરી પાડવામાં આવતી હોવાની વાત પણ વીડિયોમાં કરવામાં આવી છે. સિવિલ હોસ્પિટલમાં દિવાળી સમયે કેદી વોર્ડમાં બબાલ થઇ હતી તેની તપાસ પણ પૂર્ણ ન કરી હોવાનો વીડિયોમાં ઉલ્લેખ કરાયો છે.