વડાપ્રધાન નરેન્દ્ર મોદીએ આજે (મંગળવારે) વીડિયો કોન્ફરન્સિંગ દ્વારા ભાજપના મેયરોની કોન્ફરન્સને સંબોધિત કરી. જેમાં તેમણે ભાજપના મેયરોની સામે વિકાસનો પ્લાન મૂક્યો.
ગાંધીનગરમાં બે દિવસીય મેયર કોન્ફરન્સનું આયોજન
PM મોદીએ ભાજપના મેયરોની કોન્ફરન્સને સંબોધિત કરી
દેશના નાગરિકોએ ભાજપ પર મૂક્યો વિશ્વાસ, તેને જાળવવાની જવાબદારી આપણીઃ PM
ગાંધીનગરમાં પ્રથમવાર બે દિવસીય મેયર કોન્ફરન્સનું આયોજન કરાયું છે. ફાઈવ સ્ટાર હોટલ લીલામાં ભારતીય જનતા પાર્ટીના રાષ્ટ્રીય અધ્યક્ષ જે.પી નડ્ડાના હસ્તે મેયર કોન્ફરન્સની શરૂઆત કરવામાં આવી. જે બાદ દેશના વડાપ્રધાન નરેન્દ્ર મોદીએ વીડિયો કોન્ફરન્સિંગના માધ્યમથી મેયરોની કોન્ફરન્સને સંબોધિત કરી.
શહેરી વિકાસનો એક રોડ મેપ બનાવવામાં આ કોન્ફરન્સની મોટી ભૂમિકા
આ દરમિયાન પીએમ મોદીએ વિકાસનો પ્લાન ભાજપના મેયરોની સામે મૂક્યો. વડાપ્રધાન મોદીએ કહ્યું કે, આઝાદીના અમૃતકાળમાં આગામી 25 વર્ષ માટે ભારતના શહેરી વિકાસનો એક રોડ મેપ બનાવવામાં આ કોન્ફરન્સની મોટી ભૂમિકા છે. આપણે રાજકારણમાં આવ્યા છીએ તો માત્ર ગાદી પર બેસવા નથી આવ્યા, સત્તામાં બેસવા નથી આવ્યા. સત્તા આપણા માટે માધ્યમ છે, લક્ષ્ય સેવા છે. સુશાસન દ્વારા આપણે કેવી રીતે જનતાની સેવા કરી શકીએ, તેના માટે આપણે કામ કરીએ છીએ.
મેયર કોન્ફરન્સમાં પીએમ મોદીએ કહ્યું કે, સરદાર વલ્લભભાઈ પટેલે મેયર તરીકે તેમની સફર શરૂ કરી હતી. આપણે એક શ્રેષ્ઠ ભારત માટે તેમના દ્વારા જણાવવામાં આવેલા રસ્તા પર ચાલીશું અને વિકાસ માટે કામ કરીશું. તમામ મેયરોએ 'સૌનો સાથ, સૌનો વિકાસ અને સૌનો પ્રયાસ' મંત્રનું પાલન કરવું જોઈએ. નગરપાલિકામાં સરદાર સાહેબે કરેલા કાર્યોને આજે પણ આદરપૂર્વક યાદ કરવામાં આવે છે. તમારે પણ તમારા શહેરોને તે સ્તર પર લઈ જવાના છે, જેથી આવનારી પેઢીઓ તમને યાદ કરે.
દેશના નાગરિકોએ ભાજપ પર મૂક્યો વિશ્વાસઃ PM
વડાપ્રધાન નરેન્દ્ર મોદીએ કહ્યું કે, આપણા દેશના નાગરિકોએ ઘણા સમયથી શહેરોના વિકાસ માટે પર વિશ્વાસ મૂક્યો છે. તેમના વિશ્વાસને સતત જાળવી રાખવાની, તેને વધારવાની જવાબદારી આપણા સૌની છે. ગ્રાઉન્ડ લેવલથી કામ કરવું એ તમામ મેયરોની જવાબદારી છે.
2014 પછી મેટ્રો નેટવર્ક ઝડપથી વધ્યું
પીએમ મોદીએ કહ્યું કે, 2014 પહેલા દેશમાં મેટ્રો નેટવર્ક 250 કિમીથી ઓછું હતું જે આજે વધીને 775 કિમીથી વધુ થઈ ગયું છે અને 1000 કિમીના નવા રૂટ પર કામ ચાલી રહ્યું છે. અમારો પ્રયાસ છે કે આપણા શહેરો સમગ્ર જીવનશૈલીનો એક ભાગ બને. આજે 100થી વધુ શહેરોમાં સ્માર્ટ સુવિધાઓનું નિર્માણ કરવામાં આવી રહ્યું છે. આ અભિયાનો હેઠળ અત્યાર સુધીમાં દેશભરમાં 75,000 હજાર કરોડ રૂપિયાથી વધુના પ્રોજેક્ટ તૈયાર કરવામાં આવ્યા છે.