ભાવ વધારો / ઘર માટે શોપિંગ કરવાની હોય તો જલ્દી કરજો, મે મહિનાના અંતમાં વધી જશે બે ઈલેક્ટ્રોનિક આઈટમના ભાવ

• કન્ઝ્યુમર ઇલેક્ટ્રોનિક્સ વસ્તુઓ ઉપર મે મહિનાના અંત સુધીમાં થશે ભાવ વધારો 
• યુક્રેન યુધ્ધ અને શાંઘાઈમાં લોકડાઉનથી આયાતી વસ્તુઓમાં અછત 
• ગગડતી જતી રૂપિયાની વેલ્યુ પણ ભાવ વધારા માટે જવાબદાર 

ટીવી એસીના ભાવમાં વધારો
જો તમે તમારા ઘર માટે નવું ટીવી, વોશિંગ મશીન અને રેફ્રિજરેટર જેવી ઘરગથ્થુ ઉપકરણો અને કન્ઝ્યુમર ઇલેક્ટ્રોનિક્સ વસ્તુઓ ખરીદવાનું વિચારી રહ્યા છો, તો ઉતાવળ કરજો. લગભગ તમામ મોટી ઇલેક્ટ્રોનિક કંપનીઓ મેના અંતથી અથવા જૂનના પહેલા અઠવાડિયાથી કિંમતોમાં ત્રણથી પાંચ ટકાનો વધારો કરી શકે છે. આ કંપનીઓએ ઉત્પાદન ખર્ચ વધવાનો ભાર ખરીદદારો પર નાખવાની તૈયારી શરૂ કરી દીધી છે.

યુક્રેન યુધ્ધ નાં કારણે મેટલની અછત જોવા મળી 
ઉદ્યોગના સૂત્રોના જણાવ્યા અનુસાર, અમેરિકન ડોલર સામે ભારતીય રૂપિયો તૂટતાં ઉત્પાદકોની મુશ્કેલીમાં પણ વધારો થયો છે કારણ કે આયાત થતા મેન્યુફેક્ચરિંગ પાર્ટ મોંઘા થઈ ગયા છે અને ઉદ્યોગ મહત્વપૂર્ણ પાર્ટસ માટે આયાત પર મોટા પ્રમાણમાં આધાર રાખે છે. જણાવી દઈએ કે યૂક્રેન યુદ્ધને કારણે યૂરોપીય દેશોમાંથી મેટલ અને જરૂરી ઈલેક્ટ્રોનિક પાર્ટ્સની અછત જોવા મળી રહી છે. જેના કારણે ભાવમાં વધારો કરવો પડી શકે છે.

શાંઘાઈના લોકડાઉનથી આયાતમાં મુશ્કેલીઓ વધી 
ચીનમાં કોવિડ -19 ના વધતા જતા કેસોથી લાદવામાં આવેલા કડક લોકડાઉનને કારણે, ઘણા જહાજો શાંઘાઈ બંદર પર ઉભા રહી ગયા છે. આવી સ્થિતિમાં પાર્ટ્સની અછતની સમસ્યા વધી છે અને ઉત્પાદકોના મેન્યુફેકચરીંગ પર દબાણ વધ્યું છે. ઘણા ઉત્પાદનો કે જે મોટા ભાગે આયાત પર આધારિત છે તે બજારમાંથી ગાયબ થઇ ચુક્યા છે.

ડૉલરની મજબૂતીથી આયાત મોંઘી થઈ ગઈ છે.
કન્ઝ્યુમર ઇલેક્ટ્રોનિક્સ એન્ડ ઇક્વિપમેન્ટ મેન્યુફેક્ચરર્સ એસોસિએશનએ જણાવ્યું હતું કે અમેરિકન ડોલર સામે રૂપિયામાં ઘટાડાથી ઉદ્યોગ માટે મુશ્કેલીઓ વધી છે. સીઇએએમએના પ્રેસિડન્ટ એરિક બ્રેઝાએ જણાવ્યું હતું કે, "કાચા માલના ભાવ પહેલાથી જ વધી રહ્યા છે અને હવે જ્યારે અમેરિકન ડોલર મજબૂત થઇ રહ્યો છે, રૂપિયો નબળો છે, આવી સ્થિતિમાં તમામ ઉત્પાદકોને ઓછામાં ઓછો નફો થવાનો અંદાજ છે." જૂન મહિનાથી ભાવમાં ૩ થી ૫ ટકાનો વધારો થશે. ''

તમામ પ્રકારની કન્ઝ્યુમર ડ્યુરેબલ્સ પર ફટકો
વોશિંગ મશીનથી લઈને એર કંડિશનર, રેફ્રિજરેટર અને અન્ય ઘરગથ્થુ ઉપકરણોનાં ભાવ વધારો થશે. કેટલાક એસી ઉત્પાદકો મે મહિનામાં જ ભાવમાં વધારો કરી ચૂક્યા છે, જ્યારે બાકીના આ મહિનાના અંતમાં અથવા જૂનમાં કિંમતોમાં વધારો કરશે. બ્રેઝાએ જણાવ્યું હતું કે ડોલર સામે રૂપિયો 77.40ના સ્તરે રહેશે તો ઉત્પાદકોએ પ્રાઇસ બેલેન્સ કરવું પડશે. જો કે આગામી બે સપ્તાહમાં તે પહેલાના 75 રૂપિયાના સ્તર પર પહોંચી જાય છે તો આવું કરવાની જરૂર નહીં પડે.

પેનાસોનિકથી લઈને હાયર સુધી હાથ ઊંચા કર્યા
પેનાસોનિક ઇન્ડિયા અને સાઉથ એશિયાના ચીફ એક્ઝિક્યુટિવ ઓફિસર (CEO) મનીષ શર્માએ જણાવ્યું હતું કે મેન્યુફેક્ચરિંગ પ્રાઈઝનું દબાણ સતત વધી રહ્યું છે. જો કે, કંપની ગ્રાહકો પર તેની ન્યૂનતમ અસર પડે તે માટે પ્રયત્નો કરી રહી છે. "છેલ્લે જાન્યુઆરી, 2022 માં ભાવ વધારો કરવામાં આવ્યો હતો. જોકે કોમોડિટીના ભાવ વધવાના કારણે વિવિધ પ્રોડક્ટના ભાવમાં ચારથી પાંચ ટકાનો વધારો થઇ શકે છે.

હાયર એપ્લાયન્સીસ ઇન્ડિયાના પ્રેસિડેન્ટ સતીશ એન એસએ જણાવ્યું હતું કે, શાંઘાઈમાં લોકડાઉનને કારણે પાર્ટ્સની સપ્લાય ખોરવાઈ ગઈ છે, જેની અસર જૂન મહિનાથી દેખાવા લાગશે. એસી અને ફ્લેટ પેનલવાળા ટીવીની ઘણી અસર પડશે, જ્યારે રેફ્રિજરેટર પર તેની ઓછી અસર પડશે.