મોંઘવારી / ગૃહિણીઓને વધુ એક ફટકો! લીંબુ બાદ ટામેટા- કોથમીરના ભાવ આસમાને, જાણો કેટલો થયો ભાવ વધારો

• લીંબુ બાદ હવે ટામેટા અને કોથમીરમાં ભાવ વધારો
• અમદાવાદમાં ટામેટા અને કોથમીરના ભાવ આસમાને
• ટામેટાનો ભાવ કિલોએ 70થી 80 સુધી પહોંચ્યો

એક તો ગૃહિણીઓ મોંઘવારીથી પરેશાન તો છે જ. શાકભાજી, દૂધ, કઠોળ સહિત તમામ ભાવોમાં વધારો થવાથી બજેટ તો ખોરવાયુ છે જ. તેમાં પણ લીંબુના ભાવ સાતમાં આસમાને પહોંચતા ટેસ્ટફુલ લાગતી વાનગીઓ ફિક્કી પડી છે. ત્યારે હવે લીંબુની હરોળમાં ટામેટા પણ આવી જ રહ્યા છે. જી, હા જેવી રીતે લીંબુના ભાવે લોકોના રડાવ્યા ત્યારે હવે ટામેટાના ભાવ જોઇને પણ આંખો પહોળી થાય તો નવાઇ નહી. કારણ કે છેલ્લા 3 દિવસમાં ટામેટાના ભાવમાં 80 ટકાનો વધારો જોવા મળ્યો છે. 

કોથમીર-ટામેટાંના ભાવ આસમાને

લીંબુ બાદ હવે ટામેટા અને કોથમીરમાં ભાવ વધારો થયો છે...અમદાવાદમાં ટામેટા અને કોથમીરના ભાવ આસમાને પહોંચતા સામાન્ય જનતા ત્રાહિમામ પોકારી ઉઠી છે. અમદાવાદમાં ટામેટાનો ભાવ કિલોએ 70થી 80 સુધી પહોંચી ગયો છે. અગાઉ ટામેટા પ્રતિકિલો 30ના ભાવે મળતા હતા. પરંતુ પાકની આવકમાં ઘટાડો નોંધાતા ટામેટા અને કોથમીરના ભાવમાં વધારો થયો હોવાનુ જાણવા મળી રહ્યું છે.  તો ટામેટાના ભાવ હજી પણ વધી શકે છે તેમ વેપારીએ જણાવ્યું હતું.  ગૃહિણીઓએ મોંઘવારીનો માર સહન કરવાનો વારો આવ્યો છે, લીંબુ બાદ ટામેટાના ભાવમાં ઉછાળો આવતા ગૃહિણીઓનું બજેટ ખોરવાયું છે. 

સીંગતેલ-પામતેલના ભાવમાં વધારો

સિંગતેલના ભાવમાં ફરીથી વધારો ઝીંકાયો છે.  હાલ 15 કિલોના ડબ્બાનો ભાવ 2800ને પાર પહોંચ્યો છે. જ્યારે પામતેલના ભાવ પહેલીવાર 2600ને પાર પહોંચ્યા છે. સરકારી તંત્રની સુસ્તી વચ્ચે સંગ્રહખોર અને નફાખોર બે લગામ બન્યા છે. પામતેલમાં છેલ્લા 3 દિવસમાં રૂપિયા 120નો ભાવ વધારો નોંધાયો. ખાદ્યતેલમાં ભાવ વધારાથી મધ્યમવર્ગીય પરિવારનું બજેટ ખોરવાયું છે. 

લીંબુ 200 રુપિયે કિલો

મોંઘવારીને પગલે દરેક ચીજ-વસ્તુઓના ભાવ ભડકે બળી રહ્યા છે.જેમાં છેલ્લા કેટલાય સમયથી લીંબુએ ચોરે અને ચોકે ચર્ચાતી વસ્તુઓમાં મોખરે છે.લીંબુના ભાવે ઐતિહાસીક સપાટી વટાવી દીધી હતી.અગાઉ 400 રુપિયે કિલો ભાવ હતો જે ઘટીને 200 રૂપિયા થયો થયો છે.  જો કે હજી પણ આ ભાવે લીંબુ પોસાય તેમ નથી.  લીંબુના હાલ 200 રુપિયે કિલો વેચાઇ રહ્યા છે. આવી ગરમીમાં લીંબુ શરબત પીવાનું મોંઘુ બન્યુ છે. કાળઝાળ ગરમીમાં રાહત આપતા લીંબુના ભાવ ઓછા થવાનું નામ નથી લઇ રહ્યા.