વિશ્વ / રાષ્ટ્રપતિ ટ્રમ્પ અને PM મોદીની થશે 8મી મુલાકાત, જાણો આ પહેલા ક્યારે અને ક્યાં મળ્યા હતા બંને વૈશ્વિક નેતા

પ્રધાનમંત્રી નરેન્દ્ર મોદી 12-13 ફેબ્રુઆરીએ અમેરિકાના પ્રવાસે જશે. જ્યાં તેઓ અમેરિકાના નવા ચૂંટાયેલા રાષ્ટ્રપતિ ડોનાલ્ડ ટ્રમ્પને મળશે. બંને નેતાઓ વચ્ચેની આ મુલાકાતને અનેક રીતે મહત્વપૂર્ણ માનવામાં આવી રહી છે. 20 જાન્યુઆરીએ રાષ્ટ્રપતિ તરીકે શપથ લીધા બાદ ટ્રમ્પે નેતન્યાહૂ પછી પીએમ મોદીને અમેરિકા આવવાનું આમંત્રણ આપ્યું છે. ટ્રમ્પના વિવિધ નિર્ણયોને કારણે વૈશ્વિક ઉથલપાથલ વચ્ચે થઈ રહેલી આ બેઠકમાં અનેક મુદ્દાઓ પર ચર્ચા થઈ શકે છે.  મહત્વપૂર્ણ એ પણ છે કે ટ્રમ્પ અને મોદી અત્યાર સુધીમાં કેટલી વાર મળ્યા છે. બંને નેતાઓની આ મુલાકાત બાદ શું બદલાયું છે.

• ટ્રમ્પ અને મોદી 8મી વખત મળશે

ટ્રમ્પ અને મોદી અત્યાર સુધીમાં 7 વાર મળી ચૂક્યા છે. ટ્રમ્પ બીજી વખત અમેરિકાના રાષ્ટ્રપતિ બન્યા છે જ્યારે પીએમ મોદી 2014 થી ભારતના પ્રધાનમંત્રી છે. બંને નેતાઓ વચ્ચે આ 8મી મુલાકાત છે. પરંતુ ટ્રમ્પના બીજા કાર્યકાળમાં આ પહેલી વાર છે જ્યારે બંને નેતાઓ એકબીજાને મળશે.  રાષ્ટ્રપતિ તરીકે શપથ લીધા બાદ મોદી અને ટ્રમ્પ વચ્ચે ફોન પર વાતચીત થઈ હતી. આવો જાણીએ તેમની અગાઉની મુલાકાત વિશે.

• પ્રથમ મુલાકાત 2017માં

ડોનાલ્ડ ટ્રમ્પ 20 જાન્યુઆરી 2017 ના રોજ પ્રથમ વખત રાષ્ટ્રપતિ બન્યા હતા. લગભગ 5 મહિના બાદ 26 જૂન 2017 ના રોજ પ્રધાનમંત્રી મોદી સાથે તેમની પહેલી મુલાકાત થઈ હતી. જ્યાં પીએમ મોદી વોશિંગ્ટનની મુલાકાતે ગયા હતા. આ દરમિયાન વાટાઘાટો સંરક્ષણ સહયોગ, વેપાર અને આતંકવાદ સામેની લડાઈ પર કેન્દ્રિત હતી. બંને નેતાઓએ એકબીજાને ગળે પણ મળ્યા હતા.

• આર્જેન્ટિનામાં બીજી મુલાકાત

મોદી અને ટ્રમ્પ વચ્ચે બીજી મુલાકાત 30 નવેમ્બર 2018ના રોજ આર્જેન્ટિનાના બ્યુનસ આયર્સમાં આયોજિત G-20 સમિટમાં થઈ હતી. આ દરમિયાન બંને નેતાઓએ વેપાર તેમજ ઇન્ડો-પેસિફિક સુરક્ષા અને આતંકવાદ સામેની લડાઈ અંગે ચર્ચા કરી હતી.

• ત્રીજી બેઠક જાપાનમાં

બંને નેતાઓની ત્રીજી મુલાકાત 28 જૂન 2019ના રોજ જાપાનના ઓસાકામાં આયોજિત G-20 સમિટમાં થઈ હતી. આ દરમિયાન પીએમ મોદી, શિન્ઝો આબે અને ટ્રમ્પ વચ્ચે ત્રિપક્ષીય વાતચીત થઈ હતી. આ દરમિયાન મોદી અને ટ્રમ્પે બંને દેશો વચ્ચેના વેપાર અને 5G ટેકનોલોજી અંગે ચર્ચા કરી હતી.

• ફ્રાન્સમાં ચોથી બેઠક

મોદી અને ટ્રમ્પ 26 ઓગસ્ટ 2019ના રોજ ફ્રાન્સમાં ચોથી વખત મળ્યા હતા. આ દરમિયાન તેઓ G-7 દેશોના પરિષદમાં મળ્યા હતા. અહીંયા પીએમ મોદી અને રાષ્ટ્રપતિ ટ્રમ્પે જમ્મુ-કાશ્મીરમાંથી કલમ 370 નાબૂદ કર્યા બાદ ઉભી થયેલી પરિસ્થિતિ પર ચર્ચા કરી હતી. વેપાર અને દ્વિપક્ષીય સંબંધો પર પણ ચર્ચા થઈ હતી.

• 'હાઉડી મોદી' કાર્યક્રમ અને 5મી મુલાકાત

પ્રધાનમંત્રી મોદી અને ટ્રમ્પ વચ્ચે પાંચમી મુલાકાત 22 સપ્ટેમ્બર 2019 ના રોજ અમેરિકાના હ્યુસ્ટનમાં આયોજિત 'હાઉડી મોદી' નામના કાર્યક્રમમાં થઈ હતી. આ કાર્યક્રમ દરમિયાન પીએમ મોદીએ 'અબકી બાર ટ્રમ્પ સરકાર' સૂત્ર આપ્યું અને ટ્રમ્પને ભારતના સાચા મિત્ર ગણાવ્યા હતા. પરંતુ ટ્રમ્પ ચૂંટણી હારી ગયા હતા.

• છઠ્ઠી મુલાકાત ન્યૂયોર્કમાં

પીએમ મોદી અને રાષ્ટ્રપતિ ટ્રમ્પ વચ્ચે આગામી મુલાકાત 24 સપ્ટેમ્બર 2019 ના રોજ ન્યૂયોર્કમાં સંયુક્ત રાષ્ટ્ર સમિટમાં થઈ હતી. આ સમય બંને નેતાઓ વચ્ચેની વાતચીત વેપાર, સુરક્ષા અને સંરક્ષણ સંબંધો પર કેન્દ્રિત હતી.

• છેલ્લી મુલાકાત નમસ્તે ટ્રમ્પ વખતે

ટ્રમ્પ 24-25 ફેબ્રુઆરી 2020 ના રોજ ભારતની મુલાકાતે આવ્યા હતા. આ દરમિયાન 24 ફેબ્રુઆરીએ અમદાવાદના મોટેરા સ્ટેડિયમ ખાતે 'નમસ્તે ટ્રમ્પ' કાર્યક્રમનું આયોજન કરવામાં આવ્યું હતું. જ્યાં રાષ્ટ્રપતિ ટ્રમ્પ અને તેમના પત્ની મિલેનિયા ટ્રમ્પે ભાગ લીધો હતો. આ કાર્યક્રમમાં એક લાખથી વધુ લોકો હાજર રહ્યા હતા. આ દરમિયાન ટ્રમ્પે ભારતની સંસ્કૃતિ, અર્થતંત્ર અને સેનાની પ્રશંસા કરી હતી.

• જ્યારે મોદી અને ટ્રમ્પ 9 મહિનામાં 5 વખત મળ્યા

ટ્રમ્પના પહેલા કાર્યકાળના છેલ્લા તબક્કા દરમિયાન મોદી અને ટ્રમ્પ વચ્ચેની નજીકપણાની ખૂબ ચર્ચા થઈ હતી. વર્ષ 2019 માં બંને નેતાઓ લગભગ 9 મહિનામાં પાંચ વખત મળ્યા હતા. જેમાં અમેરિકામાં હાઉડી મોદી અને ભારતમાં નમસ્તે ટ્રમ્પનું કાર્યક્રમ પણ શામેલ છે. વર્ષ 2019 માં 28 જૂન બાદ બંને નેતાઓ 26 ઓગસ્ટ, 22 સપ્ટેમ્બર, 24 સપ્ટેમ્બર અને બાદમાં ફેબ્રુઆરી 2020 માં મળ્યા હતા.

• 8મી મુલાકાત કેમ છે ખાસ?

પીએમ મોદીની અમેરિકા મુલાકાત અંગે માહિતી આપતાં વિદેશ સચિવ વિક્રમ મિશ્રીએ જણાવ્યું હતું કે, 'અમેરિકન રાષ્ટ્રપતિ ડોનાલ્ડ ટ્રમ્પના આમંત્રણ પર પીએમ મોદી 12 અને 13 ફેબ્રુઆરીએ અમેરિકાની સત્તાવાર મુલાકાતે જવાના છે' નવા વહીવટીતંત્રના કાર્યભાર સંભાળ્યાના ત્રણ અઠવાડિયાની અંદર વડા પ્રધાનને અમેરિકાની મુલાકાત લેવાનું આમંત્રણ મળ્યું છે. જે ભારત-અમેરિકા પાર્ટનરશિપનું મહત્વ દર્શાવે છે.

વધુ વાંચો : 'અમેરિકામાં સ્ટીલ એલ્યુમિનિયની આયાત પર 25 ટકા લાગશે ટેક્સ', રાષ્ટ્રપતિ ટ્રમ્પનું એલાન, શું થશે અસર?

ઉલ્લેખનીય છે કે, ટ્રમ્પે આવતાની સાથે જ અનેક દેશો પર ટેરિફ લગાવવાનો નિર્ણય લીધો છે. તેનાથી અનિશ્ચિતતાનું વાતાવરણ ઊભું થયું છે. ગેરકાયદેસર ઇમિગ્રન્ટ્સને પણ અમેરિકાથી દેશનિકાલ કરવામાં આવી રહ્યા છે. તેમના અનેક નિર્ણયોને કારણે વાતાવરણ ગરમાયેલું જોવા મળી રહ્યું છે. આ સ્થિતિમાં બંને નેતાઓ વચ્ચેની આ મુલાકાતમાં અનેક મુદ્દાઓ પર ચર્ચા થઈ શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ