ગુજરાત પ્રવાસ / ઈતિહાસમાં પહેલીવાર દેશના રાષ્ટ્રપતિ આજે ગુજરાત વિધાનસભાને સંબોધશે, જાણો સમગ્ર કાર્યક્રમ

• ગાંધીનગરમાં રાષ્ટ્રપતિ કોવિંદ વિધાનસભા સંબોધશે
• આજે સવારે 11 કલાકે રાષ્ટ્રપતિ કરશે સંબોધન
• ગૃહમાં પોલીસ દ્વારા રાષ્ટ્રગીત

ગુજરાત હંમેશા વિકાસના મોડેલ સમાન રહ્યુ છે અને રાષ્ટ્રપતિ તેમજ વડાપ્રધાનનું પસંદગીનું રાજ્ય પણ કહી શકાય. ગુજરાતને વિકાસના મોડલ તરીકે પ્રસ્તુત કરવામાં આવે છે. ત્યારે ગુજરાતની મુલાકાતે રાષ્ટ્રપતિ આજે આવી રહ્યા છે. 25 માર્ચના INS વાલસુરા નેવી મથકના કાર્યક્રમમાં પણ ભાગ લેશે.

તમામ સભ્યોએ 10:30 કલાકે પોતાની જગ્યા લેવાની આપી સૂચના
રાષ્ટ્રપતિ રામનાથ કોવિંદ વિધાનસભામાં સંબોધનને લઈને તમામ સભ્યોએ 10:30 કલાકે પોતાની જગ્યા લેવાની સુચના પણ આપી દેવામાં આવી છે.રાષ્ટ્રપતિને સંબોધન ન થાય ત્યાં સુધી કોઈને ગૃહ ન છોડવા આદેશ પણ કરી દેવામાં આવ્યો છે.વિધાનસભા ગૃહમાં પોલીસ રાષ્ટ્રગીત વગાડશે..અને રાષ્ટ્રપતિના સંબોધન પૂર્ણ થયા બાદ સભ્યો પોતાની બેઠક પર ઊભા થશે.સંબોધન પૂર્ણ થયા બાદ બપોરે એક વાગ્યે વિધાનસભાગૃહ ફરી મળશે

ગુજરાત વિધાનસભામાં પ્રથમ વાર રાષ્ટ્રપતિ સંબોધન કરશે
રાષ્ટ્રપતિ રામનાથ કોવિંદ આજ 24 માર્ચેથી 2 દિવસના ગુજરાત પ્રવાસે છે ત્યારે ગુજરાતના ઈતિહાસમાં પ્રથમ વાર તેઓ વિધાનસભામાં  રાષ્ટ્રપતિ રામનાથ કોવિન્દ સંબોધન કરશે. સવારે 11 કલાકે રાષ્ટ્રપતિનું સંબોધન રાખવામાં આવ્યું છે. જે એક કલાક સુધી ચાલશે. વિધાનસભાની કામકાજ સલાહકાર સમિતિમાં આ નિર્ણય લેવાયો છે. રાષ્ટ્રપતિના કાર્યક્રમને લઈને ગૃહનો એક કલાક સમય વધારી દેવામાં આવ્યો છે. 

રાષ્ટ્રપતિ રામનાથ કોવિંદનો ગુજરાત પ્રવાસ

• સમય                            કાર્યક્રમ
• સવારે 10.55 વાગે         વિધાનસભા સંકુલમાં રાષ્ટ્રપતિ રામનાથ કોવિંદનું આગમન 
• સવારે 11.05 વાગે         રાજ્યપાલ આચાર્ય દેવવ્રત રાષ્ટ્રપતિ આગમનને લઇને સ્પીચ 
• સવારે 11.15 વાગે         રાષ્ટ્રપતિ રામનાથ કોવિંદ ગૃહને 30 મિનિટ સંબોધશે 
• સવારે 11.45 વાગે          મંત્રી રાજેન્દ્ર ત્રિવેદી દ્વારા આભાર વિધી કરાશે 
• સવારે 11.50 વાગે          રાષ્ટ્રગીત સાથે સમગ્ર કાર્યક્રમનું સમાપન 

25 માર્ચે જામનગરની મુલાકાતે રાષ્ટ્રપતિ 
રાષ્ટ્રપતિ રામનાથ કોવિંદ આગામી 25 માર્ચે જામનગરની મુલાકાત લેશે. જ્યાં ઇન્ડિયન નવલ શિપ વાસસુરાને ‘પ્રેસિડેન્ટ્સ કલર’ એવોર્ડથી સન્માનિત કરવામાં આવશે. આ સન્માનના કાર્યક્રમ દરમિયાન 150 જવાનો દ્વારા ‘ગાર્ડ ઓફ ઓનર’ સાથે રાષ્ટ્રપતિને માન આપવા માટે ઔપચારિક પરેડ રજૂ કરવામાં આવશે. જ્યાં ગુજરાતના રાજ્યપાલ  આચાર્ય દેવવ્રત, નૌસેના સ્ટાફના વડા એડમિરલ આર. હરી કુમાર, સધર્ન નેવલ કમાન્ડના ફ્લેગ ઓફિસર કમાન્ડિંગ-ઇન-ચીફ વાઇસ એડમિરલ એમ.એમ. હમ્પિહોલી સહિતના લોકો ઉપસ્થિત રહેનાર છે.

INS વાલસુરાનુ મહત્વ ?

• વાલસુરાને વર્ષ 1942માં રોયલ ઈંડિયન નેવીના ટોરપીડો ટ્રેનિંગ સ્કુલના રૂપમાં કરાયુ હતુ કમિશન 
• વાલસુરાનો અર્થ સ્વોર્ડફીશ થાય છે જે ટોરપીડોને લઈ જનાર વિમાનનુ પણ નામ હતુ
• સ્વતંત્રતા બાદ તેનુ નામ બદલીને ઈન્ડિયન નેવલ શીપ વાલસુરા કરાયુ 
• INS વાલસુરા જામનગરના રોજી દ્વીપના બીચ પર આવેલુ છે
• INS વાલસુરામાં ભારતીય નૌસેના, તટરક્ષક દળના અધિકારીઓને અપાય છે ટ્રેનિંગ
• ઈલેક્ટ્રિકલ,ઈલેક્ટ્રોનિક્સ,શસ્ત્ર પ્રણાલીઓ અને ઈન્ફોર્મેશન ટેક્નોલોજી અંગે તાલીમ અપાય છે
• INS વાલસુરામાં મિત્ર વિદેશી દેશોના અધિકારીઓને પણ અપાય છે ટ્રેનિંગ
• લગભગ 80 વર્ષથી કાર્યરત હોવાથી તેની પોતાની આગવી ઓળખ ઉભી થઈ છે

રાષ્ટ્રપતિનો દ્વારકાનો 24 માર્ચનો કાર્યક્રમ કર્યો હતો રદ
મહત્વનું છે કે રાષ્ટ્રપતિના કાર્યક્રમમાં થોડો ફેરફાર કરવામાં આવ્યો હતો. અને દ્વારકા પ્રવાસ છેલ્લી ઘડીએ રદ કરાયો હતો.  દ્વારકા પ્રવાસને લઈને જિલ્લા કલેકટર દ્વારા માહિતી આપવામાં આવી છે. આ નિર્ણય અગાઉના આયોજન મુજબ રાષ્ટ્રપતિ 24 માર્ચના રોજ દ્વારકાધીશના દર્શન કરવા આવવાના હતા જેને લઈને તૈયારીઑ પણ કરી લેવામાં આવી હતી પણ છેલ્લી ઘડીએ કાર્યક્રમમાં ફેરફાર કરી દેવામાં આવ્યો હતો.