એમડીએચ (MDH) મસાલાના માલિક મહાશય ધર્મપાલ ગુલાટીને રાષ્ટ્રપતિ રામનાથ કોવિંદે શનિવારે પદ્મ ભૂષણથી સન્માનિત કર્યા. MDH મસાલાનું આખું નામ મહાશિયાં દી હટ્ટી (Mahashian Di Hatti) છે અને તેને ભારતીય ખાદ્ય ઉદ્યોગમાં સફળતાનું મોટું ઉદાહરણ માનવામાં આવે છે. ધર્મપાલ ગુલાટી હાલ દેશના સૌથી વડીલ (95 વર્ષ) અને FMCG સેક્ટરમાં સૌથી વધુ સેલેરી લેનારા CEO છે. 2000 કરોડ રૂપિયાની મસાલા કંપનીના માલિક ધર્મપાલ ગુલાટીએ વર્ષ 2018માં 25 કરોડ રૂપિયા સેલરી તરીકે કમાવ્યા હતા. ધર્મપાલ ગુલાટીએ 5માં ધોરણમાં જ સ્કૂલ છોડી દીધી હતી.
1500 રૂપિયાથી બિઝનેસની શરૂઆત કરી હતી-
ધર્મપાલ ગુલાટીનો જન્મ 27 માર્ચ, 1923માં સિયાલકોટ (હાલમાં પાકિસ્તાન)માં થયો હતો. વિભાજન બાદ ગુલાટી પરિવાર સાથે ભારત આવી ગયા. ત્યારે તેમણે માત્ર 1500ની મૂડીથી દિલ્હીના કરોલ બાગમાં અઝમલ ખાન રોડ પર મસાલાની એક દુકાન ખોલી હતી. ધીમે-ધીમે તેનું બિઝનેસ વધ્યું અને આજે લગભગ 2000 કરોડ રૂપિયાની મસાલાની કંપનીના માલિક છે. આજે ધર્મપાલ ગુલાટીની કંપની MDH દેશની સાથે વિદેશમાં પણ મસાલાનો બિઝનેસ કરે છે.
આવી રીતે બન્યા પોતાની કંપનીના બ્રાન્ડ એમ્બેસેડર-
ધર્મપાલ ગુલાટી તેમની કંપનીના પોતે જ બ્રાન્ડ એમ્બેસેડર છે. એક વખત તેમણે ઇન્ટરવ્યુમાં આની પાછળની કહાણી જણાવી હતી. ગુલાટી અનુસાર, તેમની કંપનીની ટીવી જાહેરાતનું શૂટિંગ ચાલી રહ્યું હતું. એક દિવસે જાહેરાતમાં દુલ્હનના પિતાનો રોલ કરનાર કલાકાર આવ્યો નહીં. ત્યારે નિર્દેશકે ગુલાટીને આ રોલ કરવા માટે કહ્યું. તેમણે નાણાં બચાવવાની વાત વિચારી આ રોલ કરી દીધો. ત્યારથી જ તેઓ પોતાની કંપની માટે જાહેરાત કરી રહ્યાં છે. આજે તેઓ પોતાની કંપનીના બ્રાન્ડ એમ્બેસેર તરીકે પણ ઓળખાય છે.
25 કરોડની વાર્ષિક સેલરી-
પોતાની કંપનીના સીઇઓ ધર્મપાલ ગુલાટી પોતે જ છે. તેમનું વાર્ષિક પેકેજ 25 કરોડ રૂપિયા છે. કન્ઝ્યુમર પ્રોડેક્ટ જેવી કંપનીઓમાં ગુલાટીની સેલરી સૌથી વધુ છે. કંપનીની 80 % ભાગીદારી પણ તેમની પાસે છે. તેમનું કહેવું છે કે તેઓ તેમની સેલરીના 90 % ચેરિટીમાં આપે છે.