ગુજરાતમાં સત્તા માટે નગરપાલિકાઓમાં થતા ખેલનો ઉત્તમ નમૂનો સામે આવ્યો છે. અમરેલીના રાજુલાના કોંગ્રેસના નેતાઓની સત્તાભૂખ ચરમસિમાએ પહોંચી છે. રાજુલા નગરપાલિકામાં અઢી વર્ષમાં 5 પ્રમુખ બદલાયા છે.
ગુજરાતમાં સત્તા માટે નગરપાલિકાઓમાં થતા ખેલનો ઉત્તમ નમૂનો
2018થી 2020 સુધીમાં કોંગ્રેસમાં આંતરકલહના કારણે 5 પ્રમુખ બદલાયા છે. 2018માં રાજુલાના નગરજનોએ 28માંથી 27 બેઠકો કોંગ્રેસને આપી હતી. કોંગ્રેસમાં આંતરકલહ પછી 27માંથી 18 સભ્યોએ બળવો કર્યો હતો. ટર્મના પહેલા મહિલા પ્રમુખને સત્તાભૂખ્યા કોંગ્રેસી સભ્યોએ બદલી નાખ્યા હતા.
18 બળવાખોરોમાંથી 14 સભ્યો સસ્પેન્ડ થયા હતા. 18 બળવાખોર સભ્યોએ પોતાના પ્રમુખ પણ નગરપાલિકામાં બનાવ્યા હતા. બળવાખોરોના નેતાને શહેરી વિકાસ સચિવે સસ્પેન્ડ કરતા 5માં પ્રમુખના પદનો પણ અંત આવ્યો છે. નગરપાલિકાના રહેવાસીઓ પોતાની સુખાકારી માટે નેતાઓને ચૂંટે છે. ચૂંટાયા પછી માત્ર પોતાના ઘર ભરતા નેતાઓનું સૌથી મોટું ઉદાહરણ સામે આવ્યું છે.
મહત્વનું છે કે, ૩૦ નવેમ્બરના રોજ પ્રમુખ કાન્તાબેન ધાંખડા સહિત 4 સભ્યો સસ્પેન્ડ થતા તેમજ અગાઉના 14 સભ્યો સસ્પેન્ડ થયેલ હતા. જેથી કુલ 18 સભ્યો સસ્પેન્ડ થતા ઉપપ્રમુખ તરીકે સેવા બજાવતા કનુભાઇ ધાંખડા પાસે પ્રમુખનો ચાર્જ સોંપવામાં આવ્યો હતો. કનુભાઇ ધાંખડા રાજુલા નગરપાલિકામાં છેલ્લા ઘણા ટર્મ ચૂંટાતા રહ્યા છે અને તેઓ અગાઉ વિરોધ પક્ષના નગર પાલિકાના નેતા તરીકે સેવા બજાવેલ છે.