દેશમાં કોરોના વાયરસની દહેશત વધતી જઈ રહી છે. આ દરમ્યાન કોરોના વાયરસનો ડર રાષ્ટ્રપતિ ભવન સુધી પહોંચી ચૂક્યો છે. સૂત્રો અનુસાર રાષ્ટ્રપતિ રામનાથ કોવિંદ પોતાનું મેડિકલ ચૅકઅપ કરાવશે.
રાષ્ટ્રપતિએ તમામ કામો સ્થગિત કર્યા
કોરોના પોઝિટિવ કનિકા કપૂરની પાર્ટીમાં હતા શામેલ
સાંસદ દુષ્યંત સિંહ સાથેની મુલાકાત બાદ હવે રાષ્ટ્રપતિ ભવનના સૂત્રોનું કહેવું છે કે રાષ્ટ્રપતિ રામનાથ કોવિંદ પોતાનું મેડિકલ ચૅકઅપ કરાવશે. આ સાથે જ રાષ્ટ્રપતિએ પોતાના તમામ નિયમિત કાર્યક્રમો સ્થગિત કરવાનો નિર્ણય કર્યો છે.
ભારતીય જનતા પાર્ટી (ભાજપ) ના સાંસદ દુષ્યંત સિંહ બૉલીવુડની જાણીતી સિંગર કનિકા કપૂર જે કોરોના પોઝિટિવ થઈ છે તેની પાર્ટીમાં શામેલ હતાં. ત્યાર બાદ દુષ્યંત સિંહે પોતાને આઈસોલેટ કરી દીધાં છે.
સિંગર કનિકા કપૂરની પાર્ટીમાં શામેલ થયાના ત્રણ દિવસ બાદ સાંસદ દુષ્યંત સિંહ 18 માર્ચે રાષ્ટ્રપતિ ભવનમાં આયોજિત એક સમારોહમાં પણ શામેલ થયા હતાં. બુધવારે સવારે રાષ્ટ્રપતિ રામનાથ કોવિંદે યુપી અને રાજસ્થાનના સાંસદો માટે રાષ્ટ્રપતિ ભવનમાં બ્રેકફાસ્ટનું આયોજન કર્યુ હતું.
આ કાર્યક્રમની એક તસ્વીર પણ સામે આવી છે. જેમાં દુષ્યંત સિંહ રાષ્ટ્રપતિ કોવિંદની પાછળ ઊભેલાં દેખાય છે.
કનિકા કપૂરથી ટૅન્શન વધ્યું
બોલિવુડની ગાયિકા કનિકા કપૂરને કોરોના વાયરસ થયા બાદથી ઘણા રાજનેતાઓ ટેન્શનમાં છે. કારણ કે કનિકા કપૂર એક પાર્ટીમાં સામેલ થઇ હતી જેમાં દેશનાં ઘણા નેતાઓ સામેલ થયા હતા. કનિકા કપૂર કોરોના વાયરસથી ગ્રસિત છે તે વાતની જાણ થયા બાદ ઘણા નેતાઓ આઈસોલેશનમાં જતા રહ્યા છે.
એવા સમાચાર આવી રહ્યાં છે કે, કનિકા કપૂર કોરોના પોઝિટિવ આવ્યા બાદ દુષ્યંત સિંહ અને વસુંધરા રાજે આઈસોલેશનમાં જતાં રહ્યાં છે. કનિકા કપૂરે પણ ઈન્સ્ટાગ્રામ પર તેને કોરોનાનો ચેપ લાગ્યો હોવાની જાણકારી આપી છે.
આ નેતાઓ પણ આઈસોલેશનમાં
આ સાથે બુધવારે કનીમોઝીનાં ઘરે એક કાર્યક્રમમાં અનુપ્રિયા પટેલ, દુષ્યંત સિંહ, નિશીકાંત દુબે અને અનુરાગ ઠાકુર પણ ગયા હતા. આ સિવાય ડેરેક ઓ બ્રાયન પણ હાલ સેલ્ફ આઈસોલેશનમાં છે. તે એક બેઠકમાં દુષ્યંત સિંહની બાજુમાં જ બેઠા હતા. દુષ્યંત સિંહની સાથે લંચ કરનાર ભાજપ સાંસદ વરુણ ગાંધી અને કોંગ્રેસ સાંસદ દીપેન્દ્ર હુડ્ડાએ પણ પોતાને આઈસોલેટ કરી લીધા છે. આ સાથે અનુપ્રિયા પટેલે પણ આઈસોલેશનમાં છે જેની જાણકારી તેમણે ટ્વિટ કરીને આપી છે.