ચૂંટણીનો ધમધમાટઃ ભાવનગર બેઠક પર 30 ઉમેદવારોએ ફોર્મ ઉપાડ્યા પરંતુ કોઇએ હજુ ફોર્મ નથી ભર્યું

ભાવનગર લોકસભા બેઠક માટે કુલ 30 જેટલા ઉમેદવારે ફોર્મ ઉપાડ્યા છે. જો કે, હજુ સુધી એકપણ ઉમેદવારે ફોર્મ ભર્યું નથી. તો બીજી તરફ ભાવનગર ચૂંટણી શાખા ચૂંટણીની તૈયારીઓને આખરી ઓપ આપી રહી છે. 



ચૂંટણી માટે સ્ટેટેટિક સર્વેલન્સ ટીમ, વીડિયો સર્વેલન્સ ટીમ, આચારસંહિતા ટીમ વગેરે જેવી ટીમ તૈયાર કરવામાં આવી છે. જિલ્લામાં કુલ 1828 મતદાન મથકો ઉભા કરવામાં આવનારા છે. જે માટે કુલ 11 હજાર 700 કર્મચારીઓ કામે લાગ્યા છે. જિલ્લામાં કુલ 205 ઝોનલ રૂટ તેમજ 206 ટ્રક રૂટ તૈયાર કરવામાં આવ્યા છે. સાથે જ ફોર્મ ભરવા આવનાર ઉમેદવારો માટે કડક નિયમો બનાવાયા છે. તેનો અમલ થાય તેના માટે પોલીસ બંદોબસ્ત સહિતની કામગીરી પૂર્ણ કરી દેવાઈ છે.



મહત્વનું છે કે, ભાવનગરની કલેકટર કચેરીમાં આવેલ ચૂંટણી શાખામાં હાલ ચૂંટણીની કામગીરીને લઈને ભારે ધમધમતા જોવા મળ્યો છે. 

ઉલ્લેખનીય છે કે, ભાવનગર લોકસભા બેઠકમાં કુલ 7 વિધાનસભા વિસ્તારનો સમાવેશ થાય છે. મતદાન માટે કુલ 1 હજાર 828 જેટલા મતદાન મથકો ઉભા કરાશે.