રાજકારણ / ગુજરાત વિધાનસભાની ચૂંટણી પહેલા ભાજપ કરશે આ કામ, કમલમ ખાતે તૈયારીઓનો ધમધમાટ 

• વાયબ્રન્ટ સમિટ બાદ રાજ્યામાં શરૂ થશે ચૂંટણીનો ધમધમાટ
• વિધાનસભાની ચૂંટણીને લઈને ભાજપે શરૂ કરી તૈયારીઓ
• ગુજરાત ભાજપના પ્રચારની કમાન સંભાળશે વડાપ્રધાન મોદી

એક તરફ રાજ્યમાં વાયબ્રન્ટ સમિટની તડામાર તૈયારીઓ ચાલી રહી છે ત્યારે બીજી તરફ રાજ્યમાં આગામી વર્ષે યોજાનાર વિધાનસભા ચૂંટણી તૈયારીઓ શરૂ કરી દેવામાં આવી છે. આગામી વર્ષે રાજ્યમાં યોજાર વિધાનસભાની ચૂંટણીની તૈયારીઓના ભાગ રૂપે વડાપ્રધાન મોદીના ગુજરાત પ્રવાસનું આયોજન કરાઈ રહ્યું છે.  મહત્વનું છે કે આગામી વિધાનસભાની ચૂંટણીમાં વડાપ્રધાન મોદના ચહેરાને જ આગળ કરવામાં આવી શકે છે. ત્યારે આગામી વાયબ્રન્ટ સમિટ બાદ વડાપ્રધાન મોદી ગુજરાત પ્રવાસ આવી શકે છે. 

વાયબ્રન્ટ સમિટ બાદ રાજ્યામાં શરૂ થશે ચૂંટણીનો ધમધમાટ

વડાપ્રધાન મોદીના પ્રવાસ માટેની કમલમમાં ચર્ચાઓ શરુ થઈ ગઈ છે. ગુજરાતમાં યોજાનાર વિધાનસભાની ચૂંટણી એ ભાજપ માટે કરો યા મરો સમાન બની રહેવાની છે કેમ કે આ વખતે નવા પક્ષ તરીકે આપ પાર્ટી પણ મેદાને છે, જ્યારે કોંગ્રેસમાં પણ ધરખમ ફેરફારો કરવામાં આવ્યા છે. કોંગ્રેસમાં પ્રદેશ અધ્યક્ષથી લઈને વિપક્ષ નેતાની કમાન સિનિયર નેતાઓને સોંપવામાં આવી છે. તો બીજી તરફ અન્ય યુવા નેતાઓ પણ કોંગ્રેસ પક્ષમાં જોડાતા પક્ષ પહેલા કરતા વધુ મજબૂત જોવા મળી રહો છે. 

વિધાનસભાની ચૂંટણીને લઈને ભાજપે શરૂ કરી તૈયારીઓ

આ તરફ ભાજપ પણ કાંચુ કાપવા માંગતું નથી. વિધાનસભાની ચૂંટણી પહેલા સ્ટાર પ્રચારકોની યાદી તૈયાર કરવામાં આવી છે. એટલું જ નહીં માર્ચથી ચૂંટણીની તૈયારીઓના ભાગ રૂપે વડાપ્રધાન મોદીના ગુજરાત પ્રવાસોનું આયોજન કરવામાં આવી રહ્યું છે. આગામી માર્ચ મહિનાથી ચૂંટણી સુધી વડાપ્રધાન ગુજરાતમાં 12 જેટલા પ્રવાસ કરી શકે એવું માનવામાં આવી રહ્યું છે. કમલમ ખાતે વડાપ્રધાન મોદીના પ્રવાસ માટે તખ્તો તૈયાર કરવામાં આવી રહ્યો છે જેમાં વડાપ્રધાન મોદી આગમી સમયમાં વિવિધ જિલ્લાઓમાં ચૂંટણી માટે પ્રચાર કરતા જોવા મળી શકે છે. આ પ્રવાસ દરમિયાન વડાપ્રધાન મોદી વિકાસના કાર્યોનું લોકાર્પણ અને ખાતમુહૂર્તન કરી શકે છે. ભાજપ દ્વારા ગ્રામ્ય વિસ્તારમાં ચૂંટણીલક્ષી સભાઓનું આયોજન કરવામાં આવી શકે છે. જ્યારે મહિલાઓ માટે મહાસંમેલન યોજવાનું પણ આયોજન કરવામાં આવી રહ્યું છે. 

ગુજરાત ભાજપના પ્રચારની કમાન સંભાળશે વડાપ્રધાન મોદી

જ્યારે ચૂંટણી હશે ત્યારે ક્લસ્ટર મુજબ ચૂંટણી પ્રચાર કરવામાં આવશે અવું પણ મનાઈ રહ્યું છે. જાણકારો મુજર પ્રદેશ ભાજપ અત્યારે આંતરીક સર્વે કરાવી રહી છે.જેમાં જે વિસ્તાર ભાજપ માટે નબળો હશે તેવા વિસ્તારમાં વડાપ્રધાન મોદીના પ્રવાસ વધારે ગોઠવવામાં આવશે સાથે જ અર્બન એરિયામાં ખાત મુહૂર્ત અને લોકાર્પણ કામ વધારે કરાશે તો રૂરલ વિસ્તારમાં ચૂંટણીલક્ષી સભાઓ વધારે ગોઠવવામાં આવશે એવું સૂત્રો જણાવી રહ્યા છે.તો બીજી તરફ મહિલા મોરચો અને યુવા મોરચાના મહા સંમેલનનું પણ આયોજન ભાજપ દ્વારા કરવામાં આવી રહ્યું છે. આમ ચૂંટણી સુધીના મુખ્ય કાર્યક્રમ અંગે તૈયારીઓ બીજેપી એ આરંભી દીધી છે.