81 નગરપાલિકા અને 31 જિલ્લા પંચાયત સાથે 231 તાલુકા પંચાયતની ચૂંટણીનું મતદાન આવતીકાલે થવાનું છે.
ગુજરાતમાં 6 મહાનગરપાલિકાની ચૂંટણી પૂર્ણ થઈ ચૂકી છે. ત્યારે 81 નગરપાલિકા અને 31 જિલ્લા પંચાયત સાથે 231 તાલુકા પંચાયતની ચૂંટણીનું મતદાન આવતીકાલે થવાનું છે. 28 ફેબ્રુઆરીએ મતદાન યોજાશે. તો મતગણતરી 2 માર્ચે યોજાવવાની છે. મતદાન માટે જિલ્લા પંચાયતમાં તૈયારીઓ થઈ ચૂકી છે.
જૂનાગઢમાં ચૂસ્ત પોલીસ બંદોબસ્ત
જૂનાગઢમાં આવતીકાલે સ્થાનિક સ્વરાજ્યની ચૂંટણી માટે મતદાન થશે. ચૂંટણી પંચે તમામ તૈયારીઓ પૂર્ણ કરી લીધી છે. જૂનાગઢ બહાઉદ્દીન કોલેજ ખાતે EVM મશીનોની ચકાસણી કરવામાં આવી છે. 6703 જેટલા અધિકારી અને કર્મચારીઓ ફરજ બજાવી રહ્યા છે. ચુસ્ત પોલીસ બંદોબસ્ત વચ્ચે EVM મશીનો બુથ પર પહોંચાડાઇ રહ્યાં છે. કુલ 2,248 EVM મશીનનો ઉપયોગ કરશે.
જૂનાગઢમાં તાલુકા પંચાયત અને જિલ્લા પંચાયતનું મતદાન થવાનું છે. ત્યારે વહીવટી તંત્ર અને પોલીસ દ્વારા ચુસ્ત બંદોબસ્ત ગોઠવી દેવામાં આવ્યો છે. જેમાં 5 DySP, 10 જેટલા PI, 40 જેટલા PSI અને 1162 પોલીસ કર્મી, 600 હોમગાર્ડ અને 1000 જેટલા GRDના જવાનો તહેનાત કરવામાં આવ્યા છે. ત્યારે સંવેદન અને અતિ સંવેદનબૂથ પર વધારે ચુસ્ત બંદોબસ્ત ગોઠવવામાં આવ્યો છે. ત્યારે સતત મોબાઈલ વોચ અને પેટ્રોલિંગ દ્વારા અઘટિત ઘટનાના ઘટે તેની વોચ રાખી રહ્યા છે.
અમદાવાદ તાલુકા પંચાયત
સ્થાનિક સ્વરાજ્યની ચૂંટણીને લઇ ચૂંટણી અધિકારીએ નિવેદન કર્યું છે કે, વિરમગામ, બારેજા, સાણંદ, ધોળકા નગરપાલિકાની ચૂંટણી યોજાશે. 9 તાલુકા પંચાયત માટે ચૂંટણી યોજાશે. તંત્ર દ્વારા તમામ તૈયારીઓ પૂર્ણ કરાઈ છે. તમામ EVM મતદાન બુથ સુધી પહોંચાડાયા છે. પોલીસ બંદોબસ્ત સાથે EVM પહોંચાડાયા છે.
ભરૂચમાં ચૂંટણીની તૈયારીઓ પૂર્ણ
ભરૂચમાં સ્થાનિક સ્વરાજની ચૂંટણીને લઇ તૈયારી પૂર્ણ થઈ ચૂકી છે. સાથે EVMની ફાળવણીની પણ શરૂઆત કરી દીધી છે. 34 જિલ્લા પંચાયત, 9 તાલુકા પંચાયત અને 4 નપાની બેઠકો પર મતદાન યોજાશે. કુલ 348 બેઠકો પર મતદાન થશે.
પંચમહાલમાં ચૂંટણીની કામગીરીને લઈ તંત્ર સજ્જ
સ્થાનિક સ્વરાજ્યની ચૂંટણીઓને લઈને તંત્ર દ્વારા તમામ તૈયારીઓને આખરી ઓપ અપાઈ ગયો છે. કર્મચારીઓને EVM સહિતની ચૂંટણી સામ્રગીની ફાળવણી પણ કરી દેવામાં આવી છે. આ ચૂંટણીમાં 1,243 મતદાન કેન્દ્રો પર મતદાન કરવામાં આવશે તથા આ કામગીરીમાં 9,320 જેટલા કર્મચારીઓ ભાગ લેશે. મહત્વપૂર્ણ છે કે ચૂંટણીમાં કોવિડ ગાઈડલાઈનનું વિશેષ પાલન કરવામા આવશે તથા તમામ કામગીરી પર જિલ્લા કલેકટર દ્વારા નિરીક્ષણ કરવામાં આવશે.
વડોદરામાં કલેક્ટર દ્વારા કામગીરીનું નિરીક્ષણ
વડોદરામાં સ્થાનિક સ્વરાજની ચૂંટણીમાં મતદાનને લઇને તંત્રની તૈયારીઓ થઈ ગઈ છે. EVM મશિન સહિતની ચૂંટણી સામગ્રીઓની ડિસ્પેચની કામગીરી પણ કરી દેવાઈ છે. જ્યાં દશરથ ગામમાં આવેલી શાળામાં કામગીરી શરૂ કરાઈ હતી. કલેક્ટર શાલિની અગ્રવાલ કામગીરીનું નિરીક્ષણ કરશે.