રાજ્યમાં કાળઝાળ ગરમીની વચ્ચે અચાનક વાતાવરણમાં પલટો જોવા મળ્યો છે. હવામાન વિભાગની આગાહી મુજબ પ્રિ-મોન્સુન એક્ટિવિટીની અસર જોવા મળી છે.
પ્રિમોન્સૂન એક્ટિવિટીની અસર
જાફરાબાદનો દરિયો બન્યો તોફાની
નાની બોટોને પરિવહનમાં હાલાકી
પ્રિ-મોન્સુન ગતિવિધિઓને કારણે અમરેલીના પીપાવાવ જાફરાબાદનો દરિયો તોફાની બન્યો છે. દરિયામાં ભારે પવન ફૂંકાતા દરિયા કિનારે 2 મીટર ઉંચા મોજા ઉછળ્યા હતા. તો તોફાની દરિયાને કારણે નાની બોટોને પરિવહનમાં હાલાકી પડી હતી. શિયાળ બેટ જતા લોકો જોખમી મુસાફરી કરવા મજબૂર બન્યા છે. તો બીજી તરફ દક્ષિણ ગુજરાતમાં પણ વાતાવરણ પલટાયું છે. વાદળછાયા વાતાવરણ વચ્ચે ભારે પવન ફૂંકાયો છે. જો કે 15 કિમીની ઝડપે પવન ફૂંકાતા ગરમીથી રાહત મળી હતી.
અમદાવાદ, સુરત સહિત સમગ્ર રાજ્યમાં છેલ્લા એક સપ્તાહથી પ્રિ-મોન્સુન એક્ટિવિટીનો પ્રારંભ થયો છે. સુરત સહિત દક્ષિણ ગુજરાતમાં વાતાવરણ પલટાયુ હતું. વાદળછાયા વાતાવરણ વચ્ચે પુરજોશ પવન ફુંકાયો હતો. 15 કીમીની ઝડપે પવન ફુંકાતા ગરમીથી રાહત મળી રહી છે.
રાજ્યમાં વરસાદી માહોલ રહેશે
રાજ્યના હવામાન વિભાગે આગામી 2 દિવસ દરમિયાન રાજ્યના કેટલાક વિસ્તારોમાં હળવા વરસાદની આગાહી વ્યક્ત કરી છે. આ સાથે માછીમારો દરિયો ન ખેડવા માછીમારોને સૂચના આપવામાં આવી છે. હવામાન વિભાગની આગાહી પ્રમાણે તારીખ 29 અને 30ના રોજ રાજ્યમાં પવનગતિમાં વધારો થશે. હવામાન વિભાગ દ્વારા પ્રિ મોનશુન એક્ટિવિટી શરૂ થવાની આગાહી કરવામાં આવી છે. આ સાથે દક્ષિણ ગુજરાત, સૌરાષ્ટ્રમાં વરસાદી ઝાપટાની આગાહી કરવામાં આવી છે. જ્યારે ઉત્તર ગુજરાત, મધ્ય ગુજરાતમાં સામાન્ય વરસાદની આગાહી હવામાન વિભાગ દ્વારા કરવામાં આવી છે.
15 જૂનથી નિયમિત ચોમાસુ શરૂ થશે: અંબાલાલ
હવામાન નિષ્ણાંત અંબાલાલ પટેલે વરસાદની આગાહી કરી છે. અંબાલાલની આગાહી અનુસાર, 10 જૂન સુધીમાં ઉત્તર ગુજરાતમાં વરસાદની આગાહી છે. સાથે 15 જૂનથી નિયમિત ચોમાસુ શરૂ થવાની સંભાવના છે. 3 જુલાઈના રોજ ગુજરાતમાં સારા વરસાદની આગાહી છે. સાથે મધ્ય ગુજરાતમાં પણ ભારે વરસાદ થવાની સંભાવના છે. ઉપરાંત ઉત્તર ગુજરાતના અરવલ્લી, દક્ષિણ ગુજરાત અને ઉત્તર સૌરાષ્ટ્રમાં પણ સારો વરસાદ રહેવાની શક્યતા છે. સૌરાષ્ટ્રના દરિયા કિનારા વિસ્તારમાં 40 ઈંચ જેટલો વરસાદ થવાની શક્યતા છે. સાથે જૂન મહિનામાં ગુજરાતના કેટલાભ ભાગોમાં 6 ઈંચ વરસાદ થવાની સંભાવના સેવાઈ રહી છે. ઉપરાંત જુલાઈ મહિનામાં 12 ઈંચ વરસાદ થવાની શક્યતા છે. સાથે જ દક્ષિણ ગુજરાતમાં ઓગષ્ટ મહિના દરમિયાન 8 ઈંચ વરસાદ થવાની સંભાવના છે.