સુરતમાં વરાછાના માનગઢ પાસે મહીલા પોલીસ કર્મી સુનીતા યાદવ અને ભાજપના ધારાસભ્ય અને રાજ્ય આરોગ્ય મંત્રી કુમાર કાનાણીના પુત્ર પ્રકાશ કાનાણી વચ્ચે બોલાચાલી થઇ હતી. જ્યાર બાદ પ્રકાશ કાનાણીના મિત્રો અને મહિલા કોન્સ્ટેબલની બબાલનો ઓડિયો અને વીડિયો પણ સામે આવ્યો હતો. ત્યારે રવિવારે મહિલા કોન્સ્ટેબલ સુનિતા યાદવને નિવેદન માટે પોલીસ કમિશનર કચેરી બોલાવાયા હતા. કમિશનર કચેરીથી નિકળ્યા બાદ તેઓ મીડિયા સાથે સોશિયલ ડિસ્ટન્સિંગને લઇને વાત કરવા લાગ્યા હતા.
કુમાર કાનાણીના પુત્ર પ્રકાશ કાનાણી સાથે કોન્સ્ટેબલની બોલાચાલી થઇ હતી
સુનિતા યાદવને નિવેદન માટે પોલીસ કમિશનર કચેરી બોલાવાયા હતા
પોલીસ કમિશનર કચેરીમાં પોલીસ અધિકારીઓ અને સુનિતા યાદવ વચ્ચે રકઝક થઇ હતી
સુરતમાં રાત્રી કફર્યૂ લાગુ પડ્યા બાદ ધારાસભ્યના દિકરાના મિત્રો બહાર નિકળ્યા હતા. ત્યારે મહિલા કોન્સ્ટેબલે કાર રોકતા બબાલ થઈ હતી. મિત્રોને અટકાવતા પ્રકાશ કાનાણી પણ ઘટના સ્થળે પહોંચ્યા હતા. જ્યાં મહિલા કોન્સ્ટેબલ અને પ્રકાશ કાનાણી વચ્ચે રકઝક થઇ હતી. આ મામલે ફરિયાદ પણ નોંધાઇ હતી. આ મામલે રવિવારે સુનિતા યાદવને પોલીસ કમિશનર કચેરી ખાતે નિવેદન માટે બોલાવાયા હતા. નિવેદન માટે જતા પહેલા સુનિતા યાદવ મીડિયા સાથે વાતચીત કરવા માંગતી હતી. પરંતુ સાથી કર્મી દ્વારા તેમને અટકાવવામાં આવ્યા હતા. સિનિયર પોલીસકર્મીઓએ સુનિતાને સમજાવવાનો પ્રયાસ કર્યો હતો. ત્યારબાદ તે પોલીસ કમિશનર કચેરીમાં નિવેદન આપવા પહોંચી હતી. આ દરમિયાન સુનિતાને બળજબરીપૂર્વક અંદર લઇ જવાયા હતા. સુનિતા યાદવને પોલીસ ધક્કો મારીને અંદર લઇ ગઇ હતી. સુનીતા યાદવ સાથે પોલીસકર્મીઓએ ગેરવર્તન કર્યું હતું. પોલીસ હેડક્વાર્ટ ખાતે પોલીસ સમજાવટનો પ્રયાસ કરી રહી છે. વિવાદ વચ્ચે સનિયર પોલીસકર્મીઓ અને સુનિતા વચ્ચે જીભાજોડી થઇ હતી. આ દરમિયાન પોલીસ હેડક્વાર્ટર ખાતે ચૂસ્ત પોલીસ બંદોબસ્ત ગોઠવી દેવામાં આવ્યો છે. જોકે પોલીસ કમિશનર કચેરીથી નિકળ્યા બાદ તેઓ મુદ્દાની વાતના બદલે મીડિયા સાથે સોશિયલ ડિસ્ટન્સિંગની વાતો કરવા લાગ્યા હતા.
સુનિતા યાદવ પોલીસ કમિશનર કચેરી ખાતે નિવેદન આપ્યા બાદ મીડિયા સાથે વાતચીત કરવા માટે સામે આવી હતી. પરંતુ આ દરમિયાન તેઓ મુદ્દાની વાત ભટકાવતા હોય તેવું સામે આવી રહ્યું છે. સુનિતા યાદવ બધા મુદ્દાઓને સાઇડમાં મુકીને સોશિયલ ડિસ્ટન્સિંગ અંગે વાત કરી રહ્યા છે. એક તરફ એવું લાગી રહ્યું છે કે તેઓ મુદ્દાને ભટકાવી રહ્યા છે તો બીજી તરફ તેઓ વિવાદ અંગે બોલવા ન માંગતા હોય તેવું પણ લાગી રહ્યું છે.
કોણ છે લેડી સિંઘમ સુનિતા યાદવ?
સુનિતા યાદવ રાજસ્થાનના વતની છે. નાનપણથી સુનિતા યાદવને પોલીસ ફોર્સમાં જોડાવાનો શોખ હતો. સુનિતા વીર નર્મદ ગુજરાત યુનિવર્સિટીમાં અભ્યાસ કરી ચૂક્યા છે. સુનિતા યાદવ ભણવામાં અવ્વલ રહેતા હતા. યુનિવર્સિટીમાં તેઓ ચેસના પ્લેયર પણ રહી ચૂક્યા છે. NCCમાં પણ અનેક મેડલો જીતીને પરિવારનું નામ રોશન કરી ચૂક્યા છે. 25 ઓગસ્ટ 2017ના રોજ સુનિતા ગુજરાત પોલીસના ભાગ બન્યા હતા. સુનિતા યાદવ છેલ્લા 3 વર્ષથી હેડ ક્વાર્ટરમાં ફરજ બજાવતા હતા. અનલૉક થયા બાદ તેમને વરાછામાં બંદોબસ્તમાં રખાયા હતા. અનલૉક-1માં તેમને હીરાના કારખાના પાસે ડ્યૂટી અપાઈ હતી.