ભારતના ફાસ્ટ બોલર ભુવનેશ્વરકુમારે પોતાની ડેબ્યૂ ટી-૨૦ મેચ પાકિસ્તાન સામે ૨૫ ડિસેમ્બર-૨૦૧૨ના રોજ રમી હતી. ત્યારથી લઈને અત્યાર સુધીમાં લગભગ ૧૦ વર્ષ થઈ ગયાં છે અને ભુવી હજુ પણ ટીમ ઇન્ડિયાના બોલિંગ આક્રમણનો મહત્ત્વનો હિસ્સો છે.
ઓસ્ટ્રેલિયા સામે ભુવીએ ૧૯મી ઓવરમાં રન લૂંટાવી દીધા
ડેથ ઓવર્સમાં ભુવી વધારે પડતા રન લૂંટાવી દે છે
ભુવી માટે ૧૯મી ઓવર જાણે એક ડરામણું સપનું બની ગઈ
ડેથ ઓવર્સમાં ભુવનેશ્વરકુમારે વધુ રન આપ્યાં
નવા બોલ સાથે ભુવી આજે પણ એ જ જાદુ કરી રહ્યો છે, પરંતુ હવે ક્રિકેટના સૌથી નાના ફોર્મેટમાં ડેથ ઓવર્સ (૧૭ અને ૧૯મી ઓવર)માં મેરઠનો આ બોલર પર ભરોસો કરી શકાય તેમ નથી, કારણ કે એશિયા કપમાં પહેલાં પાકિસ્તાન અને પછી શ્રીલંકા અને હવે ગઈ કાલે ઓસ્ટ્રેલિયા સામેની મેચમાં ભુવીએ ૧૯મી ઓવરમાં વધુ રન લૂંટાવી દેતા ટીમ ઇન્ડિયાના હાથમાંથી જીતેલી મેચ સરકી ગઈ. પાવર પ્લેમાં દમદાર બોલિંગ કરનારા ભુવી માટે ૧૯મી ઓવર જાણે એક ડરામણું સપનું બની ગઈ છે.
ટી-૨૦ વર્લ્ડકપ માટે ભુવી ભારતીય ટીમનો મહત્ત્વનો હિસ્સો
ભુવનેશ્વર પાસે ૨૧ ટેસ્ટ, ૧૨૧ વન ડે અને ૭૭ ટી-૨૦ ઇન્ટરનેશનલનો લાંબો અનુભવ છે. ભુવી અંગે ટીમ મેનેજમેન્ટ એકદમ સ્પષ્ટ છે. તેને ટેસ્ટ મેચ નહીં, બલકે ટી-૨૦ ફોર્મેટમાં પણ રમાડવામાં આવે છે. ટી-૨૦ વર્લ્ડકપ માટે ભુવી ભારતીય ટીમનો મહત્ત્વનો હિસ્સો છે. જસપ્રીત બૂમરાહ સાથે ભુવી નવા બોલથી શરૂઆત કરવાનો છે. ટી-૨૦ ઇન્ટરનેશનલના પાવર પ્લેમાં ભુવનેશ્વર ૫.૬૬ની શાનદાર ઈકોનોમીથી બોલિંગ કરે છે, પરંતુ જેમ જેમ બોલ જૂનો થાય છે તેમ તેમ ભુવીની બોલિંગની ધાર બુઠ્ઠી થવા લાગે છે અને ૫.૬૬ની શાનદાર ઈકોનોમી ડેથ ઓવર્સમાં ૯.૨૬ થઈ જાય છે. મતલબ કે ડેથ ઓવર્સમાં ભુવી વધારે પડતા રન લૂંટાવી દે છે.
ટી-૨૦ ક્રિકેટમાં ૧૯મી ઓવર ૨૦મી ઓવર કરતાં વધારે મહત્ત્વની
ભુવી ડેથ ઓવર્સમાં ઓફ સાઇડ વાઇડ લાઇન યોર્કર પર ભરોસો કરે છે, પરંતુ એશિયા કપમાં તેની આ ચાલ બેટ્સમેનોને જરાય પરેશાન કરી શકી નહીં. ટી-૨૦ ક્રિકેટમાં ૧૯મી ઓવર ૨૦મી ઓવર કરતાં વધારે મહત્ત્વની હોય છે. ભુવીએ ભારત તરફથી આ કામ ઘણી વાર શાનદાર રીતે કર્યું. ૧૯મી ઓવરમાં ભુવનેશ્વરે કુલ ૧૨૯ બોલ ફેંક્યા છે. બીજા નંબર પર બૂમરાહ છે, જેણે ૭.૮૭ના ઈકોનોમી રેટથી ૪૮ બોલ ફેંક્યા છે અને ત્યારબાદ હર્ષલ પટેલે ૩૬ બોલ ૮.૫ના ઈકોનોમી રેટથી ફેંક્યા છે.
ભારતીય ટીમ ઓસ્ટ્રેલિયા સામે મેચ હારી ગઇ
ભુવનેશ્વરકુમાર માટે ૧૯મી ઓવર ડરામણું સપનું બનતી જઈ રહી છે, જેની શરૂઆત એશિયા કપ-૨૦૨૨થી થઈ અને ગઈ કાલે રમાયેલી ઓસ્ટ્રેલિયા સામેની મેચ સુધી ચાલુ રહી છે. પહેલાં પાકિસ્તાન અને પછી શ્રીલંકા સામેની હાર બાદ ટીમ ઇન્ડિયા ગઈ કાલે કાંગારુંઓ સામે જીતેલી મેચ હારી ગઈ. આ ત્રણેય મેચમાં ભારત માટે ભુવનેશ્વરની ૧૯મી ઓવર બહુ ભારે પડી, જેમાં ભુવીને ઘણા બધા રન લૂ્ંટાવી દીધા.