દેશમાં કાળઝાળ ગરમી વચ્ચે વીજળીની વધતી જતી માંગને પહોંચી વળવા પૂરતા પ્રમાણમાં કોલસાનું ઉત્પાદન થઈ રહ્યું નથી. ચોમાસાના કારણે કોલસાના ઉત્પાદનને પણ અસર થઈ છે.
ગરમીના કારણે વધી વીજળીની માંગ
ચોમાસાના કારણે કોલસાના ઉત્પાદનને અસર
લાગી શકે છે મોંઘવારીનો ઝટકો
દેશમાં ખૂબ વધી રહેલી મોંઘવારી વચ્ચે હવે સામાન્ય માણસોને વીજળીનો 'ઝટકો' લાગી શકે છે. કાળઝાળ ગરમીમાં વીજળીની માંગને પહોંચી વળવા સરકાર 76 મિલિયન ટન કોલસાની આયાત કરવાની તૈયારી કરી રહી છે.
કોલસાની અછત
હકીકતમાં દેશના પાવર પ્લાન્ટની નજીકની સ્થાનિક ખાણોમાંથી કોલસાની અછત સર્જાઈ છે અને માંગ પ્રમાણે વીજળીનું ઉત્પાદન થઈ રહ્યું નથી. એવું માનવામાં આવે છે કે ચોમાસાના વરસાદને કારણે ઓગસ્ટ અને સપ્ટેમ્બરમાં કોલસાના ઉત્પાદનને વધુ અસર થશે. આવી સ્થિતિમાં માંગને પહોંચી વળવા સરકારી કંપની કોલ ઈન્ડિયા લિમિટેડ (CIL) લગભગ 15 મિલિયન ટન કોલસાની આયાત કરશે.
આ બે કંપનીઓ પણ કરશે આયાત
આ સિવાય દેશની સૌથી મોટી પાવર જનરેશન કંપની NTPC અને દામોદર વેલી કોર્પોરેશન (DVC) પણ લગભગ 23 મિલિયન ટન કોલસાની આયાત કરવાની યોજના બનાવી રહી છે. આ સાથે અન્ય સરકારી અને ખાનગી વીજ ઉત્પાદન કંપનીઓ પણ તેમના વપરાશને પહોંચી વળવા 38 મિલિયન ટન કોલસાની આયાત કરી શકે છે. આ રીતે વર્ષ 2022માં જ દેશમાં લગભગ 76 મિલિયન ટન કોલસાની આયાત કરવામાં આવશે, જે ગ્લોબલ માર્કેટના રેટ પર કરવામાં આવશે.
પ્રતિ યુનિટ બિલમાં થશે 80 પૈસાનો વધારો
કોલસાની આયાતનો સીધો અર્થ એ છે કે હવે વીજળીનું ઉત્પાદન મોંઘું થશે. દેખીતી રીતે પાવર જનરેટ કરતી કંપનીઓ આ વધેલી કિંમત ગ્રાહકો પાસેથી વસૂલ કરશે અને તેમના બિલ પર બોજ વધશે. આગામી દિવસોમાં વીજળીની પ્રતિ યુનિટ કિંમતમાં 50-80 પૈસાનો વધારો થવાનો અંદાજ છે.
આ મામલા સાથે સંકળાયેલા બે સરકારી અધિકારીઓનું કહેવું છે કે પ્રતિ યુનિટ ખર્ચમાં વધારો એ વાત પર નિર્ભર રહેશે કે પાવર સ્ટેશન દરિયાઈ બંદરથી કેટલા દૂર છે. મતલબ કે બંદરોથી સ્ટેશન સુધી કોલસાના પરિવહનનો ખર્ચ પણ કંપનીઓના ખર્ચમાં વધારો કરશે.