પાવર કાપ / ગીર સોમનાથના તમામ ગામો અંધારપટમાં, અમરેલીના પણ 700 ગામોમાં વીજળી ગુલ, જાણો કારણ

• સૌરાષ્ટ્રના કેટલાક જિલ્લાઓના ગામડાઓમાં વીજળી ગુલ
• ગીર સોમનાથ,કુતિયાણાના ઘેડ વિસ્તારમાં વીજળી વિહોણો
• અમરેલી જિલ્લાના 700 જેટલા ગામોમાં વીજળી ગુલ

હવામાન વિભાગ દ્વારા રાજ્યમાં ભારે વરસાદની આગાહી કરવામાં આવી છે તેવામાં આજે વરસાદની આગાહીને લઇને ગીર સોમનાથ જિલ્લાના કોડિનાર, સૂત્રાપાડા પંથકમાં અનરાધાર મેઘમહેર થઇ હતી. કોડીનાર અને સુત્રાપાડા પંથકમાં આભ ફાંટયું હોય તેમ આશરે 7 ઈંચ જેટલો વરસાદ ખબક્યો હતો. જેને લઇને વરસાદી પાણી ક્યાંય સમાયાના હોય તેવી સ્થિતિ સર્જાઇ હતી. ખેતરો તળાવમાં ફેરવાયા હતા અને માર્ગો તથા બજારો જાણે નદીઓ બન્યા હોય તેવા દ્રશ્યો જોવા મળ્યા હતા. બીજી તરફ ગીર સોમનાથમાં જિલ્લામાં ભારે વરસાદ બાદ હવે વીજળી ગુલ થઈ જતા હેરનગતિમાં વધારો થયો છે. જિલ્લાના તમામ ગામોમાં વીજળી કાપનો જેટકોએ આદેશ આપ્યો છે.જેટકોના આદેશ બાદ સમસ્ત ગ્રામ્ય વિસ્તારમાં અંધારપટ છવાયું છે. હજારો લોકો વીજળી વગર પરેશાન થઈ ગયા છે.

અમરેલી જિલ્લાના 700 જેટલા ગામો વીજળી વિહોણા
તો આ તરફ અમરેલીના 11 તાલુકા મથકોના ગામડાઓમાં વીજળી ગુલ થઈ છે. લાઠી,લિલિયા,બાબરા,સાવરકુંડલા,બગસરા,ધારી, રાજુલા,જાફરાબાદ,વડિયાના ગ્રામ્ય પંથકમાં વીજ કાપ કરવામાં આવ્યો છે. PGVCLએ લોર્ડ શેડિંગનું કારણ જણાવી વીજ કાપ લગાવ્યો છે.

આજે રાજ્યના 136 તાલુકાઓમાં વરસાદ
રાજ્યમાં આજે 136 તાલુકાઓમાં વરસાદે પધરામણી કરી છે. 30 તાલુકાઓમાં 1 ઇંચ કરતા વધુ વરસાદ ખાબક્યો છે. કોડિનાર 7 ઇંચ, સુત્રાપાડા 6 ઇંચ, વેરાવળમાં 5 ઇંચ વરસાદ, માંગરોળમાં 5 ઇંચ, ભુજમાં 2 ઇંચ, હાંસોટ 2 ઇંચ વરસાદ, માળીયામાં 2 ઇંચ, ધરમપુરમાં 2 ઇંચ, પારડીમાં 2 ઈંચ વરસાદ પડ્યો છે.

સૌરાષ્ટ્રમાં ઓરેન્જ એલર્ટ જાહેર, NDRF-SDRFની ટીમ સ્ટેન્ડબાય
બીજી બાજુ રાજ્યમાં સૌરાષ્ટ્રમાં પણ ભારે વરસાદની આગાહીના પગલે તંત્ર એલર્ટ થઇ ગયું છે. શનિવાર સુધી સૌરાષ્ટ્રમાં ઓરેન્જ એલર્ટ અપાયું છે. સૌરાષ્ટ્રમાં ગીર-સોમનાથ, દીવ અને દ્વારકામાં ભારે વરસાદની આગાહી કરવામાં આવી છે. તો પોરબંદર અને રાજકોટમાં પણ અતિભારે વરસાદ વરસે તેવી શક્યતા છે. જેના લીધે NDRF અને SDRFની ટીમ સ્ટેન્ડબાય કરી દેવામાં આવી છે.

હવામાન વિભાગની ભારે આગાહી
ગુજરાતમાં હજુ 4 દિવસ વરસાદની આગાહી હવામાન વિભાગે કરી છે..આવતીકાલે દક્ષિણ ગુજરાત, સૌરાષ્ટ્રમાં વરસાદની આગાહી કરાઇ છે.જ્યારે 8, 9 અને 10 જુલાઈએ પણ દક્ષિણ ગુજરાત, સૌરાષ્ટ્રમાં વરસાદની આગાહી કરવામાં આવી છે.7 જુલાઈએ ભાવનગર,સુરત,ભરૂચ,જૂનાગઢ,અમરેલી,સોમનાથ,તાપી,નવસારી, ડાંગ, વલસાડ,દ્વારકા,પોરબંદરમાં હવામાન વિભાગે વરસાદની આગાહી કરી છે...હાલ તો ભારે વરસાદે સૌરાષ્ટ્રને ઘમરોળી નાખ્યું છે.અને આગામી ચાર દિવસ હજુ પણ ભારે વરસાદની આગાહી કરવામાં આવી છે...જેને લઇને તંત્ર દ્વારા પણ કોઇ પણ વિષમ પરિસ્થિતિને પહોંચી વળવા માટે આગોતરૂ આયોજન કરવામાં આવી રહ્યું છે.

12 જુલાઇએ સૌરાષ્ટ્ર અને કચ્છમાં ચક્રવાત સાથે વરસાદ પડશે
રાજ્ય (Gujarat) માં સાબરકાંઠામાં અરવલ્લીમાં ભારે વરસાદની સંભાવના સેવવામાં આવી રહી છે. તારીખ 10 જુલાઇએ મધ્ય ગુજરાતમાં બારેમેઘ ખાંગા થવાની પૂરી સંભાવના છે. તો બીજી બાજુ મધ્ય ગુજરાતના પણ અનેક ભાગમાં ભારે વરસાદ પડશે. 11 જુલાઇએ આખા ગુજરાતમાં ભારેથી અતિ ભારે વરસાદની સંભાવના છે. જ્યારે 12 જુલાઇએ સૌરાષ્ટ્ર અને કચ્છમાં ચક્રવાત સાથે વરસાદ પડશે. તો 11 અને 12 જુલાઇએ ગુજરાતમાં ભારેથી અતિભારે વરસાદ વરસશે.