બનાસકાંઠા / બટાકાનાં પાકમાં કમોસમી વરસાદનાં કારણે ફુગ લાગી, પાક નિષ્ફળ

• બનાસકાંઠામાં કમોસમી વરસાદથી પાકને ભારે નુકસાન
• વાવેતર કરેલાં બટાકાને કમોસમી વરસાદને કારણે ફૂગ લાગતા પાકને નુકસાન
• બટાકાના વાવેતરમાં ખેડૂતોએ 1 વિઘા પાછળ 35 હજારનો ખર્ચ થાય છે

 
બટાકાનો પાક નિષ્ફળ

બનાસકાંઠા બટાકા નગરી તરીકે ઓળખાય છે. દિવાળી પછી તરત જ બટાકાનાં વાવેતરને શ્રી ગણેશ કરવામાં આવે છે. આ વખતે પણ દિવાળી પછી તરત જ ખેડૂતોએ પોતાનાં ખેતરમાં બટાટાનું વાવેતર કર્યું હતું. ખેડૂતો ને ક્યાં ખબર હતી કે જે વાવેતર બટાકાનું કર્યું છે તે નિષ્ફળ જવાનું છે.

આ કારણોસર પાક નિષ્ફળ ગયો

ખેડૂતો બટાટાનું વાવેતર કરીને ઊભા થયાં ત્યારે જ અચાનક બનાસકાંઠા સહિત આસપાસનાં વિસ્તારોમાં પડેલાં ભારે કમોસમી વરસાદનાં કારણે સમગ્ર બનાસકાંઠામાં બટાટાનું વાવેતર નિષ્ફળ ગયું છે. ખેતરોમાં પાણી ભરાવાનાં કારણે બટાટાનાં વાવેતરનાં બિયારણને ફૂગ લાગવાનાં કારણે બિયારણ બગડી જતાં ખેડૂતોને પડતાં પર પાટુ માર્યાં જેવી પરિસ્થિતિ ઉભી થઈ છે.

50 હજારનો ખર્ચ કરી વાવેતર કરાવામાં આવ્યું હતું

એક વિઘા પાછળ 50 હજાર જેટલો ખર્ચ કરીને વાવેતર કરવામાં આવ્યું હતું. વરસાદ આફત બનીને આવતા હાલ ખેડૂતોએ વાવેતરને ખેતરોમાં ટ્રેક્ટર ફેરવવી ફરીથી વાવેતર કરવાનો વારો આવ્યો છે.

બીજ પાકની જેમ સર્વે કરી સહાયની માંગ

ત્યારે ખેડૂતોનું કહેવું છે કે એક વીઘા પાછળ ખાતર બિયારણ અને ખેડની મજૂરી કરીએ તો કુલ ૫૦ હજાર જેટલો ખર્ચ થયો છે અને હાલ આફતનાં કારણે બટાટાનાં વાવેતર પર ટ્રેકટર ફેરવી ફરીથી વાવેતર કરવાનાં કારણે ફરી 50 હજાર જેટલો ખર્ચ એટલે કે 1 વિઘામાં લાખ રૂપિયાનો ખેડૂતોને નુકસાન સહન કરવાનો વારો આવ્યો છે. પાંચ વર્ષથી મંદી અને ફરીથી કમોસમી વરસાદનાં કારણે ખેડૂતો સાવ પાયમાલ થઈ જવાની પરિસ્થિતિ આવી છે. ખેડૂતોની માંગ છે કે બીજા પાકની જેમ બટાટાનાં પણ વાવેતરને જાજા નુકસાન થયું છે. ત્યાં સર્વે કરી અને તાત્કાલિક યોગ્ય સહાય કરે જેથી ખેડૂતોને થોડોક સહારો મળી રહે.