તમિલનાડુમાં મંદિરનાં ખોદકામ દરમિયાન મજુરો ત્યારે આશ્ચર્યચકિત થઇ ગયા જયારે ત્યાંથી તાંબાનો એક ઘડો મળી આવ્યો. જયારે તે ઘડો કાઢીને જોયું તો બધાની આંખો ફાટી ગઈ. આખો ઘડો સોનાના સિક્કાઓથી ભરેલો હતો. સદીઓ જુના મંદિરમાં મળેલા સિક્કાઓ હાલ પોલીસને સોંપી દેવામાં આવ્યા છે.
તમિલનાડુનાં થીરુવનાઈકલમાં જંબુકેશ્વર મંદિર પાસે ખોદકામ દરમિયાન તાંબાનાં ઘડામાં 1.716 કિલોગ્રામ વજનનાં 505 સોનાનાં સિક્કા મળી આવ્યા. બુધવારે ખોદકામ દરમિયાન સિક્કા મળી આવતા આસપાસના વિસ્તારમાં ચકચાર મચી ગઈ હતી.
મંદિરના અધિકારીઓએ જણાવ્યું કે જમીનની અંદરથી 504 નાના અને 1 મોટો સિક્કો મળી આવ્યો. સિક્કા પર અરબી લીપીમાં લખવામાં આવ્યું છે. જણાવવામાં આવ્યું છે કે સિક્કા 1000થી 1200 વર્ષ જુના હોઈ શકે છે. મંદિરના અધિકારીએ જણાવ્યું કે મંદિરમાં જયારે ખોદકામ કરવામાં આવી રહ્યું હતું ત્યારે 7 ફૂટની ઊંડાઈ પર એક ઘડો દેખાયો.
ઘડો કાઢીને જોવામાં આવ્યું તો એમાં સોનાનાં સિક્કા મળી આવ્યા. મંદિરના અધિકારીઓ દ્વારા સિક્કાઓ પોલીસને સોંપી દેવામાં આવ્યા છે. હજુ સુધી સિક્કાઓની કિંમત જાણી શકાઈ નથી.
સોનાના સિક્કાઓને વધુ તપાસ માટે સાચવીને મુકવામાં આવ્યા છે સાથે જ સિક્કાઓનો પ્રચલન કાળ જાણવા માટે આર્કલોજીકલ ડીપાર્ટમેન્ટને પણ ખજાનાની જાણ કરવામાં આવી છે.