પૂર પછીની વેદના / પરસેવો પાડીને લાવેલ અનાજ પણ પાણીમાં જતું રહ્યું: કંડારીમાં કુદરતે ગરીબો સાથે અન્યાય કર્યો હોય તેવી સ્થિતિ

• VTV પહોંચ્યુ કંડારીની ગૌચર વસાહતમાં
• પાણી ઓછા થતા લોકો પોતાના ઘર તરફ વળ્યા
• હજુ પણ ઘરમાં ઘૂંટણસમા પાણી
• ઘરવખરી પાણીમાં પલળી ગઇ

વડોદરામાં મેઘરાજા આવ્યા આફત બનીને. ઉપર આકાશ નીચે ધરતી પર પાણી જ પાણી. જવુ તો જવુ ક્યાં ? ઘરવખરી પાણીમાં પલળી ગઇ, ગાદલા, કપડા,  અનાજ, પૈસા, તિજોરી બધુ જ પાણીથી તરબોળ થઇ ગયુ. હવે ઘરમાં રહેવુ ક્યાં. માંડ માથે છત છે પણ ઘરમાં તો ફૂટી કોડી પણ નથી. મજબૂર અને લાચાર થઇને જીવી રહ્યા છે કંડારીના ગ્રામજનો. 

ભગવાને જીવ બચાવ્યો પણ બધુ તણાઇ ગયું- સ્થાનિક

ત્યારે હાલાકીનો ચિતાર સરકાર સમક્ષ આવે તે માટે  વીટીવી ન્યૂઝની ટીમ પહોંચી છે વડોદરાના કંડારી ગામે. જ્યાં ગઇકાલે માથા સુધી પાણી હતા તે ધીમે ધીમે ઓસરતા હવે ગ્રામજનો પોતાના આવાસમાં પરત ફરી રહ્યા છે. પરંતુ ઘરમાં ઘૂંટણસમા તો પાણી ખરા જ. ઘરનો સામાન પલળી જવા પામી છે.

જો કે જે પણ બચેલો સામાન છે તેને સાચવવા માટે ગ્રામજનો મહેનત કરી રહ્યા છે. રસોડાનો તમામ સામાન પાણીમાં તરી રહ્યો છે. અહીના રહીશો સાથે વાત કરતા જણાવ્યુ કે ભગવાને જીવ બચાવ્યો પરંતુ બધુ જ તણાઇ ગયું.

બધુ ફેંકવાનો વારો આવ્યો છે, હવે અમારે જવુ ક્યાં- સ્થાનિક

મહામહેનતે, મજૂરી કરી કરીને વસાવેલી ઘરની દરેક વસ્તુ જ્યારે નજર સામે જ પાણીમાં તરતી દેખાય તો તે માણસની મનો સ્થિતિ કેવી હોય તેની કલ્પના કરવી મુશ્કેલ છે. ત્યારે કંડારીના રહીશોએ પણ પોતાના ઘરની આવી સ્થિતિ જોઇને આંખમાંથી આંસુ રોકી ન શક્યા. રડતા રડતા જણાવ્યુ કે અમારે ખાવાનું હતુ એ બધુ પલળી ગયુ છે. ગાદલાને બધુ પલળી ગયુ છે હવે આમા બેસવુ કે  ઉંઘવું ક્યાં  આ બધુ અમારે ફેંકવાનો વારો આવ્યો છે, પણ આ બધુ મૂકીને અમારે જવુ ક્યાં ?

સરકાર જે આપશે તે લઇશુંનહી આપે તો કંઇ નહી. મહત્વનુ છે કે કંડારીના ગૌચર વસાહતમાં નાના બાળકોથી માંડીને વૃદ્ધો પણ પાણીમાં રહેવા મજબૂર બન્યા છે.ટીવી, ફ્રિજ, તિજોરી સહિતનો તમામ સામાન પાણીમાં ગરકાવ થતા અહીના રહીશો માત્ર પહેરે કપડે જ ઘરની બહાર નીકળી ગયા છે.

'હવે તો સરકાર જ અમને બચાવી શકે'

ગઇકાલ સુધી માથા સુધી પાણી હતુ પરંતુ હવે જેમ પાણી ઓછુ થતુ ગયુ તો રહીશો પોતાના ઘરને જોવા આવ્યા. ઘરમાં સામાન સલામત રહ્યો છે કે નહીં.પરંતુ ઘરમાં તો ઢીંચણસમા પાણી હજુ ભરાયેલા છે. તો બીજી તરફ હજી વરસાદ પણ વરસી રહ્યો છે. ઘરમાં અનાજ, તેલ, કપડાલત્તા સહિતનો તમામ સામાન આંખ સામે જપાણીમાં તરતો જોઇને ગ્રામજનો દુઃખી દુઃખી થઇ ગયા છે. ભારે વરસાદને લીધે અહીં દરવખતે પુરની સ્થિતિ સર્જાય છે અને મહેનત પર પાણી ફરી જાય છે તેમ ગ્રામજનો જણાવી રહ્યા છે.

સરકાર દ્વારા હાલ પુરતી ભોજન અને આશ્રય સ્થાનની વ્યવસ્થા કરવામાં આવશે પરંતુ મહેનત કરીને ભેગી કરેલી મૂડીનું શું.. ? રહીશોની બસ એક આશા છે કે હવે સરકાર અમને મદદ કરે. દરેકના ઘરે ઘરે જઇને સરવે કરવામાં આવે અને સહાય આપવામાં આવે.  ત્યારે હવે જોવુ રહ્યું કે કરજણના આસપાસના ગામ જેવા કે કંડારી, સંભોઇમાં સહાયની ચૂકવણી કરશે કે કેમ તે જોવુ રહ્યું.

એક દિવસના પૂરમાં બધુ તબાહ થઇ ગયુ 

મહત્વનું છે કે કરજણ તાલુકામાં ધોધમાર વરસાદ વરસતા આસપાસના ગામો અને વસાહતો પાણીમાં ગરકાવ થઇ હતી.   કંડારી ગામમાં માલધારીઓની વસાહત આવેલી છે. અહીં 10-12ઘર આવેલા છે જ્યાં માથા સુધી પાણી ભરાયા હોવાનું સામે આવ્યુ હતું.જે ઓરડીમાં તમામ લોકો હતા તે પણ ધરાશાયી થતા 2 લોકો ઇજાગ્રસ્ત થયા હોવાનું સામે આવ્યું હતું.

તમામને સારવાર અર્થે હોસ્પિટલ ખસેડાયા હતા.  લગભગ 400થી 500 લોકોને સલામત સ્થળે ખસેડવામાં આવ્યા હતા.. લોકોના ઘરો પાણીમાં ગરકાવ થઇ ગયા છે.  લોકોના ઘરમાં કિમતી સામાન સહિત તમામ ઘરવખરી પાણીમાં ગરકાવ થતા ભારે નુકસાની થઇ હતી. એક જ દિવસમાં તો બધુ જ વેરવિખેર થઇ ગયું..