ઇમરાનના શપથ સમારોહ પર રાજકીય સંગ્રામ સુબ્રમણ્યમ સ્વામીનું વિવાદિત નિવેદન

ક્રિકેટના મેદાન બાદ ઇમરાન ખાન પાકિસ્તાનના રાજકારણના કેપ્ટન બનવા જઇ રહ્યા છે. ઇમરાન ખાન 11મી ઓગસ્ટે શપથ લેશે. એટલે શપથ સમારોહનું આમંત્રણ મળ્યા બાદ કોંગ્રેસના નેતા સિદ્ધુ પાકિસ્તાન જવા માટે તલપાપડ જોવા મળ્યા. તો સુબ્રમણ્યમ સ્વામીએ શપથ સમારોહની મહેમાનગતિને રાષ્ટ્રવાદ સાથે જોડીને વિવાદને આમંત્રણ આપી દીધુ છે. 

પાકિસ્તાનમાં જનાદેશ મળ્યા બાદ ઇમરાન ખાન નવા નાથ તરીકે ઉભરી આવ્યા છે. હજુ તો ઇમરાન ખાને શપથ પણ નથી લીધી. તેમ છતાં સંજોગ એવા ઉભા કર્યા છે કે ચારેકોર તેમની જ  ચર્ચા થઇ રહી છે.

ચૂંટણીના પરિણામ આવતાની સાથે જ મીડિયા સમક્ષ આવેલા ઇમરાન ખાને શાંતિનો સંદેશ તો આપ્યો. પીએમ હાઉસમાં રહેવાનો ઇન્કાર કર્યો અને સરકારી ઇમારતોને ભાડે આપવાની પણ જાહેરાત કરી નાખી. 

આ તમામ વાયદા પર ઇમરાન ખાન ખરા ઉતરશે કે કેમ તે ભારત માટે તો ગૌણ પ્રશ્ન છે. ઇમરાન ખાનના શપથ સમારોહે ભારતમાં ભારે ચર્ચા જગાવી છે. પહેલા વાત સામે આવી હતી કે પ્રધાનમંત્રી મોદીની જેમ ઇમરાન પણ સાર્ક સમુહના દેશોને આમંત્રણ આપશે.

જોકે ઇમરાન ખાનના શપથ સમારોહ સાદાઇથી ઉજવાય તેના સંકેત મળી રહ્યા છે. ભારતમાંથી નવજોત સિંહ સિદ્ધુ સુનિલ ગાવસ્કર કપિલ દેવને આમંત્રણ આપવામાં આવ્યું. જેમાંથી સિદ્ધુએ પાકિસ્તાન જવાનું મન બનાવી લીધું છે. 

શપથ સમારોહ ભલે પાકિસ્તાનમાં યોજાવવાનો હોય પરંતુ ભારતમાં આ શપથ સમારોહ વિવાદનો વિષય બન્યો છે. ભાજપના ફાયરબ્રાન્ડ નેતા સુબ્રમણ્યમ સ્વામીએ કહ્યું કે નવજોત સિંહ સિદ્ધુ માત્ર ક્રિકેટર નથી તેઓ દેશના સાંસદ રહી ચુક્યા છે. 

જો તેઓ શપથ સમારોહમાં જશે તો તેમને ગદ્દાર માનવામાં આવશે. મહારાણા પ્રતાપે મોહમ્મદ ગૌરીને તક આપી હતી. પછી શું થયું તે બધા જાણે છે. શપથ સમારોહમાં જનારા લોકો પરત ફરે તો તેમના પર નજર રાખવામાં આવે અને રાષ્ટ્રદ્રોહનો કેસ કરવો જોઇએ. 

સુબ્રમણ્યમ સ્વામીના નિવેદનનુ ભાજપના અન્ય નેતાઓએ તો સમર્થન નથી કર્યું પરંતુ રાષ્ટ્રીય રાજકારણમાં ઇમરાન ખાનને વધુ એક વખત ચર્ચાનો મુદ્દો બનાવાનો મોકો મળી ગયો.  

ઇમરાન ખાન સાથે પ્રધાનમંત્રી મોદીએ પણ ફોન પર વાત કરી હતી પરંતુ તેમને આમંત્રણ આપવામાં આવ્યું હોય તેવી સૂચના હજુ સુધી મળી નથી.

તો આમીર ખાને પણ નિમંત્રણ મળ્યું હોવાની વાતથી ઇન્કાર કર્યો છે. ત્યારે 11મી ઓગસ્ટે ઇમરાન ખાન ભલે સાદગીથી શપથ લઇને પાકિસ્તાનની કમાન સંભાળી લે પરંતુ તેમના નામે ભારતનું રાજકારણ અત્યારથી જ ચરમસીમાએ છે.