Women's empowerment / મહિલા સશક્તિકરણની વાતો માત્ર કાગળ પર, રાજકીય સ્તરે હજી નિરાશા

 


વાત કરીએ તો રાજકારણમાં મહિલાઓની સંખ્યા પુરૂષોની તુલનામાં ઘણી ઓછી છે. વિશ્વનાં નેતાઓમાં તેની ટકાવારી માત્ર 7 છે અને સાંસદોમાં ફ્ક્ત ૨૪ ટકા મહિલાઓ છે. છેલ્લાં કેટલાંક વર્ષોમાં વિશ્વભરમાં રાજકીય ક્ષેત્રે મહિલાઓની સંખ્યામાં ભારે અછત જોવાં મળી છે. યુનાઈટેડ નેશન્સનાં ચોંકાવનારા આંકડા મુજબ મહિલાઓની રાષ્ટ્રીય અધ્યક્ષ તરીકે પસંદગી થવાની ટકાવારી 2017માં ૭.૨ ટકા હતી. તે ઘટીને વર્ષ 2018માં 6.6 ટકા સુધી પહોંચી ગઈ છે. તો મહિલા પ્રમુખોનું પ્રમાણ પણ 5.7 ટકાથી ઘટીને 5.2 ટકા થઈ ગયું છે. સંસ્થાનું માનવું એમ છે કે અમુક હકારાત્મક આંદોલનો છતાં નેતાગીરીમાં આજે પણ બહુમતી પુરૂષોની છે. કોંગ્રેસ હોય કે બીજેપી બંને પક્ષોમાં મહિલાઓનું પ્રમાણ ખૂબ ઓછું છે. પરંતુ રાજકીય ક્ષેત્રે સંકળાયેલી મહિલાઓ વિશે જાણીએ તો મહિલાઓને હજુ રાજકારણમાં પ્રોત્સાહિત કરવાની જરૂર છે.
 

ભારતની વાત કરીએ તો આગામી લોકસભા ચૂંટણીઓમાં મમતા બેનરજીનાં તૃણમૂલ કોંગ્રેસ સિવાય એક પણ પક્ષને મહિલાઓને વધુ પ્રતિનિધિત્વ આપવાનું વ્યાજબી લાગતું નથી. લોકસભા 2019ની ચૂંટણી માટે તેમણે જાહેર કરેલી 42 ઉમેદવારોની યાદીમાં 17 મહિલાઓને તક આપી છે. જ્યારે ગુજરાતની 26 બેઠકોની વાત કરીએ તો બીજેપીએ આ વખતે 6 મહિલાઓને જ ઉમેદવાર તરીકે જાહેર કર્યા છે. જયારે કોંગ્રેસે તો 1 મહિલા ઉમેદવારને જ તક આપી છે.

બીજેપીનાં આગેવાનો મુજબ તેમનો પક્ષ મહિલાઓને સમાન તક આપે છે. સ્થાનિક સ્વરાજ્યની ચૂંટણીમાં મહિલાઓને 50 ટકા અનામત છે. પરંતુ લોકસભા કે વિધાનસભામાં મહિલાઓને રાજકીય સ્તરે નિરાશા પ્રાપ્ત થઈ રહી છે. મહિલા અનામત બીલ પાસ કરવાનાં મુદ્દે ભાજપ કે કોગ્રેસની સરકાર હંમેશાં નિષ્ફળ રહી છે. મહિલાઓની સુરક્ષા અને વિકાસની વાતો થઈ રહી છે. પરંતુ હાલની સ્થિતી અને આંકડાને જોતાં મહિલા સશક્તિકરણ ફકત કાગળ પર જ છે.