કપરાડા વિધાનસભાની પેટા ચૂંટણીની તારીખ હજુ નક્કી થઇ નથી, પરંતુ રાજકીય માહોલમાં અત્યારથી ગરમાવો જોવા મળી રહ્યો છે. કારણ કે વલસાડમાં કપરાડા બેઠકની પેટાચૂંટણી પહેલા ભાજપને મોટો ઝટકો લાગ્યો છે. કપરાડાના દિગ્ગજ નેતા બાબુ વરઠા 100 સમર્થકો સાથે ભાજપ છોડી કોંગ્રેસમાં જોડાયા છે. જોકે આ અગાઉ કેટલાક કોંગ્રેસના કાર્યકરો ભાજપમાં જોડાયા હતા.
બાબુભાઇ વરઠા ભાજપ છોડી કોંગ્રેસમાં જોડાયા
બાબુ વરઠા 100 સમર્થકો સાથે કોંગ્રેસમાં જોડાયા
કોંગ્રેસમાં ભંગાણ બાદ ભાજપમાં પણ ભંગાણ સર્જાયું
વલસાડ જિલ્લાના કપરાડા વિધાનસભા બેઠકના પૂર્વ કોંગ્રેસી ધારાસભ્ય જીતુભાઇ ચૌધરીએ પોતાના પદ અને કોંગ્રેસમાંથી પણ રાજીનામું આપી ભાજપમાં જોડાઇ જતા ખાલી પડેલી કપરાડા બેઠકની પેટા ચૂંટણીના પડઘમ વાગી રહ્યા છે. આથી જિલ્લામાં રાજકીય માહોલ ગરમાયો છે. ત્યારે કપરાડા બેઠકની પેટાચૂંટણી પહેલાં જ ભાજપમાં પણ ભંગાણ સર્જાયું છે. કપરાડા તાલુકાના ભાજપના દિગ્ગજ આગેવાન બાબુભાઇ વરઠાં આજે ભાજપને છોડી કોંગ્રેસનો હાથ પકડી લીધો છે. બાબુ વરઠાએ આજે કપરાડામાં યોજાયેલા કોંગ્રેસના એક જાહેર કાર્યક્રમમાં ભાજપ છોડી કોંગ્રેસમાં વિધિવત પ્રવેશ કર્યો હતો. પૂર્વ કેન્દ્રીય મંત્રી તુષાર ચૌધરી અને વલસાડ જિલ્લા કોંગ્રેસના આગેવાનોની હાજરીમાં યોજાયેલા એક કાર્યક્રમમાં બાબુભાઈ પોતાના સમર્થકો સાથે વિધિવત રીતે કોંગ્રેસમાં જોડાઇ ગયા હતા.
બાબુ વરઠા પહેલા પણ કોંગ્રેસના જ આગેવાન હતા
મહત્વપૂર્ણ છે કે બાબુ વરઠા અગાઉ કોંગ્રેસના જ આગેવાન હતા. પરંતુ થોડા વર્ષો પહેલાં તેઓ કોંગ્રેસ છોડી ભાજપમાં જોડાયા હતા. જોકે હવે ફરી એક વખત ચૂંટણીની મોસમ આવતા જ બાબુ વરઠા ભાજપ છોડી ફરી પાછા કોંગ્રેસમાં જોડાઈ ગયા હતા. આજે બાબુ વરઠા સાથે ભાજપના કાર્યકર્તાઓ પણ કોંગ્રેસમાં જોડાયા હતા. આગામી સમયમાં હજુ પણ બાબુભાઈના સમર્થનમાં કેટલાક ભાજપના કાર્યકર્તાઓ કોંગ્રેસમાં જોડાશે.
પેટાચૂંટણીમાં બાબુ વરઠાને કોંગ્રેસમાંથી અપાઇ શકે છે ટિકિટ
બાબુ વરઠાના કોંગ્રેસમાં પ્રવેશથી હવે કપરાડા વિધાનસભા બેઠકની પેટાચૂંટણીમાં કોંગ્રેસની જીત નિશ્ચિત બની ગઈ છે, તેવા કોંગ્રેસના અગ્રણીઓ દાવા કરી રહ્યા છે. જોકે બાબુ વરઠાને આગામી વિધાનસભાની ટિકિટ આપવામાં આવશે કે કેમ તે અંગે કોંગ્રેસના અગ્રણીઓ હજુ મગનું નામ મરી પાડવા તૈયાર નથી. પરંતુ લાગી રહ્યું છે કે બાબુ વરઠાને જ કોંગ્રેસની ટિકિટ પરથી જ ભાજપના સંભવિત ઉમેદવાર જીતુ ચૌધરીની સામે ચૂંટણી જંગમાં ઉતારશે તેવી શક્યતાઓ દેખાાઈ રહી છે.
ભાજપમાંથી જીતુ ચૌધરીનું નામ લગભગ નક્કી
મહત્વપૂર્ણ છે કે કોંગ્રેસના કપરાડાના પૂર્વ કોંગ્રેસી ધારાસભ્ય જીતુભાઇ ચૌધરી રાજ્યસભાની ચૂંટણી પહેલાં જ કોંગ્રેસ છોડી ભાજપમાં જોડાઈ ગયા હતા. જીતુ ચૌધરી સતત 4 ટર્મથી કપરાડા વિધાનસભા બેઠક પર ચૂંટાતા આવતા હતા. વલસાડ જિલ્લામાં કોંગ્રેસના દિગ્ગજ આગેવાન હતા. પરંતુ તેઓ હવે ભાજપમાં જોડાઈ ગયા છે. કપરાડા વિધાનસભા બેઠકની પેટાચૂંટણીમાં ભાજપના ઉમેદવાર તરીકે જીતુ ચૌધરીનું નામ લગભગ નક્કી જ છે. માત્ર હવે જાહેરાતની ઓપચારિક જ બાકી છે. એવા સમયે હવે ગત વિધાનસભાની ચૂંટણીમાં ભાજપના ટિકિટ માટેના પ્રબળ દાવેદાર એવા બાબુ વરઠા ભાજપ છોડી કોંગ્રેસમાં જતા હવે બંને પાર્ટીઓ ભાજપ અને કોંગ્રેસ બન્ને પાર્ટીઓમાં વિધાનસભા બેઠકની પેટાચૂંટણી પહેલા જ ભંગાણ સર્જાઈ ચૂક્યું છે. ત્યારે આગામી સમયમાં વિધાનસભા બેઠકની પેટાચૂંટણીનો જંગ પણ ખૂબ જ રસપ્રદ બની રહેશે તે નિશ્ચિત.
થોડા દિવસ અગાઉ 8 ગામોના 250 જેટલા કોંગ્રેસના કાર્યકર્તાઓ ભાજપમાં જોડાયા હતા
કપરાડા વિધાનસભાની પેટા ચૂંટણી પૂર્વે કપરાડાના મોટાપોંઢા ખાતે પૂર્વ ધારાસભ્ય જીતુભાઇ ચૌધરી, ધરમપુરના ધારાસભ્ય અરવિંદ પટેલની ઉપસ્થિતિમાં એક કાર્યક્રમ યોજાયો હતો. મોટાપોંઢા જિલ્લા પંચાયતના આવતાં ગામો કાકડકોપર, મોટાપોંઢા, ઓઝર, સુખાલા, અંભેટી, વાજવડ, અરનાલા, મોટાપોંઢા ઝંડાચોક સહિતના 8 ગામોના 250 જેટલા કોંગ્રેસના કાર્યકર્તાઓ વિધિવત્ રીતે ભાજપમાં જોડાયા હતા.