ના હોય ! / પાકિસ્તાનમાં ન્યૂઝીલેન્ડ ટીમની સુરક્ષામાં તેનાત પોલીસકર્મીઓ ૨૭ લાખની બિરિયાની ઝાપટી ગયા

• ન્યૂઝીલેન્ડનો પાકિસ્તાન પ્રવાસ દુર્ભાગ્યપૂર્ણ રદ્દ કરાયો
• ન્યૂઝીલેન્ડના ખેલાડીઓની સુરક્ષા માટે પોલીસ કર્મીઓને કરાયા હતા તેનાત
• પોલીસ કર્મચારીઓ 27 લાખની બિરિયાની ઝાપટી ગયા

પીસીબીએ મોટું નુકસાન સહન કર્યુ

આ શ્રેણી પાકિસ્તાન ક્રિકેટ માટે બહુ જ મહત્ત્વપૂર્ણ હોવાથી પીસીબીએ ઘણી તૈયારીઓ કરી હતી. જોકે પ્રવાસ રદ થવાને કારણે પીસીબીને નિરાશાનો સામનો કરવો પડવાની સાથે સાથે નાણાકીય રીતે પણ બહુ મોટું નુકસાન સહન કરવું પડ્યું છે. આ નુકસાનમાં ૨૭ લાખ રૂપિયાની બિરિયાનીનો ખર્ચ પણ સામેલ છે.

ખેલાડીઓની સુરક્ષા માટે પોલીસ અધિકારીઓ કરાયા હતા તેનાત

હકીકતમાં ન્યૂઝીલેન્ડની ટીમ માટે તેનાત કરવામાં આવેલા સુરક્ષા કર્મચારીઓનાં જમવાનાં બિલની ચૂકવણી જોઈને ઘણાંને આશ્ચર્ય થયું છે. મીડિયા રિપોર્ટ અનુસાર, ન્યૂઝીલેન્ડ ટીમને સુરક્ષા આપવા માટે રોકવામાં આવેલી સિક્યોરિટી એજન્સીઓની મોટી કિંમત પીસીબીએ ચૂકવવી પડી છે. પાકિસ્તાની સૈન્ય સાથે ઈસ્લામાબાદ અને રાવલપિંડીમાં ન્યૂઝીલેન્ડના ખેલાડીઓની સુરક્ષા માટે પાંચ એસપી અને ૫૦૦થી વધુ એસએસપી (પોલીસ અધિકારી) તેનાત કરવામાં આવ્યા હતા.

સુરક્ષા કર્મચારીઓ 27 લાખની બિરિયાની ઝાપટી ગયા

આ દરમિયાન સુરક્ષા કર્મચારીઓને દિવસમાં બે વાર બિરિયાની પીરસવામાં આવી હતી, જેની કિંમત લગભગ ૨૭ લાખ રૂપિયા જેટલી થઈ છે. આ સમગ્ર મામલાનો ખુલાસો ત્યારે થયો, જ્યારે આટલું મોટું બિલ પાસ કરવા માટે ફાઇનાન્સ વિભાગને મોકલવામાં આવ્યું. તપાસ દરમિયાન આટલી મોટી રકમનું બિલ આવતાં હાલ તો તેને રોકી દેવામાં આવ્યું છે, પરંતુ પાકિસ્તાનમાં ચારે બાજુ ઝાપટી જવામાં આવેલી ૨૭ લાખની બિરિયાનીની ચર્ચા થઈ રહી છે.