પાસપોર્ટ મેળવવાની પ્રક્રિયામાં પોલીસ વેરિફિકેશન કરાવવું ફરજીયાત હોય છે. જોકે, ઘણી વખત નાગરિકોને હેરાનગતિનો સામનો પણ કરવો પડતો હોય છે. પરંતુ હવે લોકોને પાસપોર્ટ વેરિફિકેશન માટે પોલીસ સ્ટેશન જવાની જરૂર રહેશે નહીં. પોલીસ પોતે પાસપોર્ટ અરજદારના ઘરે વેરિફિકેશન માટે જશે. અમદાવાદના પોલીસ કમિશનર દ્વારા આ અંગે કડક આદેશ આપવામાં આવ્યા છે.
પાસપોર્ટ અરજદારો માટે ખુશખબર
વેરિફીકેશન માટે પોલીસ સ્ટેશને નહીં ખાવા પડે ધક્કા
પોલીસ ખુદ આવશે પાસપોર્ટ અરજદારના ઘરે
નોંધનીય છે કે, પોલીસ દ્વારા પાસપોર્ટ પોકેટકોપની મોબાઇલ એપ્લીકેશન અંતર્ગત વેરિફીકેશનની કામગીરી કરવામાં આવશે.અમદાવાદ પોલીસ કમિશન આશિષ ભાટીયાએ શહેરના તમામ પોલીસ સ્ટેશનના પોલીસ ઇન્સ્પેકટરોને પાસપોર્ટ પોકેટકોપ એપ્લીકેશનની મદદ થકી પાસપોર્ટ વેરિફીકેશનની કામગીરી કરવા માટે સૂચના આપી છે.
અમદાવાદ પોલીસ કમિશ્નરે આપ્યા આદેશ
આપને જણાવી દઇએ કે, પાસપોર્ટ માટેની ઓનલાઇન અરજી કર્યા બાદ જે તે વિસ્તારના પોલીસ સ્ટેશનના પોસપોર્ટ વિભાગ દ્વારા અરજદારોને પોસપોર્ટ વેરિફિકેશન રહેઠાણના પુરાવા સહિત જરૂરી દસ્તાવેજો સાથે પોલીસ સ્ટેશન બોલાવવામાં આવતા હતા.
અરજદારોને થતી હતી મુશ્કેલી
જો કે, સિનિયર સીટીઝન સહિતના કેટલાક નાગરિકોને જે-તે જવાબદાર અધિકારી પોલીસ સ્ટેશને સંજોગોવસાત હાજર નહીં મળતા ધક્કો ખાવો પડતો હતો. જો વળી કેટલાક પાસપોર્ટ અરજદારો દ્વારા ભાડા કરાર જેવા રહેઠાણના ખોટા પુરાવા રજુ કરવામાં આવતા હતા. ત્યારે તાજેતરમાં અમદાવાદ પોલીસ કમિશન આશિષ ભાટીયાએ આ અંગે ગંભીરતાથી નોંધ લઇને
પોલીસ જ અરજદારના ઘરે જઇ વેરિફિકેશન કરે તેવો નિર્ણય કર્યો છે.
નીચેનો વીડિયો જોઇને કરો પાસપોર્ટ મેળવવા માટે અરજી
પાસપોર્ટ માટે આ ડોક્યુમેન્ટ જરુરી છે
પાસપોર્ટ પ્રાપ્ત કરવા માટે જન્મનું પ્રમાણ પત્ર, ફોટો આઇડી અને એડ્રેસ પ્રૂફ એમ ત્રણ ડોક્યુમેન્ટની જરૂર પડે. બર્થ સર્ટિફિકેટ અથવા સ્કૂલ લીવિંગ સર્ટિફિકેટ જન્મના પ્રમાણ પત્ર તરીકે ચાલશે. જ્યારે ફોટો આઇડી તરીકે પાન કાર્ડ, ડ્રાઇવિંગ લાઇસન્સ, વોટર આઇડી અને આધાર કાર્ડ પણ માન્ય છે. એડ્રેસ પ્રૂફ તરીકે ઇનકમ ટેક્સ આઇડી, બેંક પાસબુક (ફોટોવાળી), વોટર આઇડી, ડ્રાઇવિંગ લાઇસન્સ અને આધાર કાર્ડ માન્ય છે.