દક્ષિણ ગુજરાતના ગાંજા ડીલર પાંડી બ્રધર્સ સહિત નાસતા ફરસા આરોપીઓની પોલીસે કરી ધરપકડ, NDPS એક્ટ હેઠળ કરી કાર્યવાહી
દક્ષિણ ગુજરાતના ગાંજા ડીલર પાંડી બ્રધર્સ સામે કાર્યવાહી
NDPS એક્ટ કલમ 66 હેઠળ આરોપીની મિલકત જપ્ત કરાઇ
"અનિલ અને સુનિલ પાંડી ગુજરાતમાં ગાંજો સપ્લાય કરતા હતા"
ગુજરાતના યુવાધનને બરબાદ કરવાનું ષડયંત્ર ચાલી રહ્યું છે. શાળા-કોલેજના વિદ્યાર્થીઓ સુધી ડ્રગ્સની ડિલિવરી થઇ રહી છે. શહેરથી લઇને ગામડા સુધી ડ્રગ્સનો વેપાર પ્રવેશી ચૂક્યો છે. છેલ્લા બે મહિનાની અંદર ગુજરાત ડ્રગ્સ મામલે ચર્ચાનું કેન્દ્ર બન્યું છે. કારણકે પંજાબની જેમ જ ગુજરાતમાં પણ અનેક જગ્યાએથી ડ્રગ્સનો મોટા જથ્થો અચાનક ઝડપાવવા લાગ્યો છે. આશરે દર 3 દિવસે ડ્રગ્સ ઝડપાવાની કે ડ્રગ્સના આરોપીઓના ઝડપાવાની ઘટનાઓ સામે આવતી રહે છે. ત્યારે સુરત પોલીસે ડ્રગ્સના કાળા કારોબારનો સૌથી મોટો પર્દાફાશ કર્યો છે.
ગાંજાના ડીલર પાંડી બ્રધર્સ સામે કાર્યવાહી
દક્ષિણ ગુજરાતના સૌથી મોટા ડ્રગ્સ ડીલર સામે કાર્યવાહી કરવામાં આવી છે. ગાંજાના ડીલર પાંડી બ્રધર્સ સામે મોટી કાર્યવાહી કરવામાં આવી. NDPS એક્ટ કલમ 66 હેઠળ આરોપીની મિલકત જપ્ત કરાઇ. મહત્વનું છે કે સપ્ટેમ્બર 2020થી નો ડ્રગ્સ ઇને સુરત નામનું અભિયાન શરુ કરાયુ હતું, આ અભિયાન હેઠળ સુરત પોલીસે કુલ 155 આરોપીઓને ઝડપી પાડીને મિલકત પણ જપ્ત કરી હતી. આ અંગે સુરત પોલીસ કમિશનરે પ્રેસ કોન્ફરન્સ સંબોધતા જણાવ્યું હતું કે સુરત ગાંજાનું કેન્દ્ર બની ગયું હતું.
પાંડી બ્રધર્સ કેવી રીતે ડ્રગ્સ સપ્લાય કરતા
ડ્રગ પેડલર સંપત્તી જપ્ત મામલે પોલીસ કમિશનરની પત્રકાર પરિષદ સંબોધતા જણાવ્યું હતું કે બાય રોડ સુરતમાં ગાંજાની સપ્લાય કરવામાં આવતી હતી. બે ભાઈઓ અનિલ અને સુનિલ પાંડી ગુજરાતમાં ગાંજો સપ્લાય કરતા હતા. ગાંજાના મુખ્ય સપ્લાયરનું નામ અનિલ પાંડી છે. આ બંને ભાઇઓ સામે ગુજરાતમાં કુલ 11 ગુના નોંધાયા છે જેમાંથી 4 ગુના સુરતના છે.
પાંડી બ્રધર્સની સંપત્તિ કરાઇ જપ્ત
ગુજરાત પોલીસ દ્વારા આરોપીની આર્થિક કમર તોડવાનો પણ પ્રયાસ કરાયો છે. ઓરિસ્સા STF દ્વારા તેની પ્રોપર્ટી સિઝ કરવામાં આવી છે. મિલકત સિઝ થઇ તે અંદાજિત 2 કરોડ 9 લાખ જેટલી કિંમતની છે. આ ઉપરાંત કરોડોનો બંગલો પણ જપ્ત કરવામાં આવ્યો છે. .બન્ને ભાઈઓના બેંક ખાતામાંથી 26 લાખ સિઝ કરવામાં આવ્યા છે. હાલમાં સુનિલની અટક કરીને તેને સાબરમતી જેલમાં મોકલવામાં આવ્યો છે.
અન્ય નાસ્તા ફરતા આરોપીની પણ ધરપકડ કરાઇ
સુરત સિવાય અન્ય જિલ્લામાંથી વૉન્ટેડ અને નાસતા ફરતા કુલ 47 આરોપીઓની ધરપકડ કરવામાં આવી છે. જેમાં સુરત ગ્રામ્યના 9, સુરત રેલવેના 1, વડોદરા ગ્રામ્યના 1, અમદાવાદ-1, ભાવનગર-1, રાજકોટ-1, જૂનાગઢ-2, જામનગરના 3, દેવભૂમિ દ્વારકાના 1, ભૂજ-1, મહેસાણા-1, બનાસકાંઠા-2 અને સુરત શહેરના 22 નાસતા ફરતા આરોપીઓની આ ઝુંબેશ હેઠળ ધરપકડ કરવામાં આવી છે.