શહેરનાં હાઇ પ્રોફાઇલ વૃષ્ટિ- શિવમ કેસમાં 7 દિવસ પછી પણ પોલીસને કોઇ ભાળ મળી નથી. પોલીસ વૃષ્ટિ- શિવમ કેસમાં હવે ઓનલાઇન કેબ અને ફુડ ડિલીવરી કરતી કંપનીઓની મદદ લઇ રહી છે. પોલીસે જાણીતી ઓનલાઇન કેબ સર્વિસ પ્રોવાઇડ કરતી કંપનીઓને બન્નેનાં ફોટોગ્રાફ્સ મોકલી આપ્યાં છે.
એરપોર્ટ, એસ.ટી. અને રેલ્વે સ્ટેશન પર પણ ફોટોગ્રાફ્સ મોકલી ત્યાંની સુરક્ષા એજન્સીને સતર્ક કરાઇ
બન્નેની શોધખોળ માટે આસપાસનાં રાજ્યોમાં ટીમ કાર્યરત
શહેરમાં રહસ્યમય રીતે ગુમ થયેલાં વૃષ્ટિ-શિવમને શોધવાં માટે પોલીસ તમામ દિશામાં તપાસ કરી રહી છે. જોકે 7 દિવસ પછી પણ પોલીસ તે બન્ને ક્યાં છે તેનો કોઇ પત્તો લગાવી શકી નથી. પોલીસે સોશિયલ મીડિયાનો પણ સહારો લીધો છે. પોલીસે શહેરનાં 30થી વધારે સીસીટીવી ચેક કર્યાં છે. પોલીસ બન્ને જે રિક્ષામાં બેસીને રેલ્વે સ્ટેશન પહોંચ્યાં હતા. તે રિક્ષા ચાલક સુધી પણ પહોંચી ગઇ છે. તેમ છતાં કોઇ લીડ નહીં મળતાં પોલીસે ઓનલાઇન કેબ સર્વિસ અને ફુડ સર્વિસ આપતી કંપનીઓનો સહારો લીધો છે.
ઓનલાઇન સર્વિસ આપતી કંપનીનો પોલીસને મદદ કરશે
શિવમ અવારનવાર ઓનલાઇન ફુડ ઓર્ડર કરતો હતો અને તેનું પેમેન્ટ પેટીએમથી કરતો હતો. જેથી પોલીસને આશા છે કે તે ઓનલાઇન ફુડ ઓર્ડર કરે તો તેની ભાળ મળે તેમ છે. જેનાં કારણે પોલીસે ઓનલાઇન ફુડ ઓર્ડર કરતી કંપનીઓ તથા ઓનલાઇન કેબ સર્વિસ આપતી કંપનીઓને બન્નેનાં ફોટોગ્રાફ્સ મોકલી આપ્યાં છે. જેનાં કારણે જો આ બન્ને જણાં કોઇ પણ ઓનલાઇન સેવાનો ઉપયોગ કરે તો તેમને શોધવામાં મદદ મળી રહે.
વૃષ્ટિ-શિવમ પ્લેટફોર્મ પરથી જ જતાં રહ્યાં હોવાની શંકા
છેલ્લા એક મહિનાંથી શિવમે પોતાનું પેટીએમ પણ બંધ કરી દીધું હોવાનું પણ પોલીસ તપાસમાં બહાર આવ્યું છે. આથી પોલીસે બન્નેના ફોટોગ્રાફ્સ એરપોર્ટ, રેલ્વે સ્ટેશન, બસ સ્ટેશનથી માંડી આસપાસનાં તમામ રાજ્યોમાં મોકલી આપ્યા છે. બન્નેનાં પરિવારજનો વિદેશ રહેતા હોઇ સંતાનોનાં ગુમ થયાનાં સમાચાર મળતાં અમદાવાદ આવી પહોંચ્યા હતાં.
વૃષ્ટિ અને શિવમ કાલુપુર રેલવે સ્ટેશનની સીડી ચઢી રહ્યાં હોવાનાં ફૂટેજ પોલીસને મળ્યાં છે, પરંતુ તે લોકો એક નંબરથી લઇને ૧૨ નંબરનાં પ્લેટફોર્મ પર ઊતર્યા હોવાનાં કોઇ ફૂટેજ મળ્યા નથી. જેથી પોલીસને શંકા છે કે બન્ને જણાં રેલવે સ્ટેશનની મેઇન સીડીઓથી ચઢીને ૧૨ નંબરનાં પ્લેટફોર્મ પર ઊતરીને જતાં રહ્યાં હોય.