અમદાવાદ / ગુજરાત કોલેજ પાસે રેસ્ટોરન્ટના નામે ચાલતું હુક્કાબાર ઝડપાયું, યુવાધન બરબાદી તરફ?

સરકારે હુક્કાબાર ઉપર પ્રતિબંધ લાદી દીધા બાદ કેટલાક હુક્કાબારના સંચાલકો હજુ પણ ગેરકાયદેસર હુક્કાબાર ચલાવી રહ્યાં છે. અમદાવાદના એક રેસ્ટોરન્ટના નામે ચાલતું હુક્કાબાર પોલીસે ઝડપી પાડ્યું છે. ગુજરાત કોલેજ પાસે આવેલ ટીસી હુક્કાબાર પર પોલીસે રેડ પાડી હતી. ત્યારે પોલીસને હુક્કાબારમાંથી 2 પેકેટ ટોબેકો યુક્ત ફ્લેવર મળી આવ્યા હતા. 

પોલીસે હુક્કામાં વપરાતી સામગ્રી અને 7 હુક્કા કબ્જે લીધા હતા. આ ઉપરાંત પોલીસે હુક્કાબારના માસિક અને યુવકોને ઝડપી પૂછપરછ હાથ ધરી છે. પોલીસ તપાસમાં રેસ્ટોરન્ટ અને લોજના નામે હુક્કાબાર ચલાવવામાં આવતો હોવાનું સામે આવ્યું છે. હુક્કાબારના સંચાલક હર્બલ હુક્કાબારના નામે ટોબેકો અને ફ્લેવર હુક્કા વેચતા હતા.

ત્યારે અહીં સવાલ થાય છે કે, કોની રહેમનજર હેઠળ ચાલે છે શહેરમાં હુક્કાબાર? શું યુવાધનને બરબાદ કરવા માટે ષડયંત્ર રચાઇ રહ્યું છે? હજુ કેટલા ચાલે છે શહેરમાં હુક્કાબાર?